ವೈ.ಎಸ್. ಜಗನ್ ಮೋಹನ ರೆಡ್ಡಿ

ಯೆದುಗುರಿ ಸಂದಿಂಟಿ ಜಗನ್ ಮೋಹನ ರೆಡ್ಡಿ ಇವರು ಭಾರತದ ಪ್ರಮುಖ ರಾಜಕಾರಣಿಗಳಲ್ಲೊಬ್ಬರು. ಇವರು ಆಂಧ್ರ ಪ್ರದೇಶದವರಾಗಿದ್ದು, ವೈಎಸ್‌ಆರ್ ಕಾಂಗ್ರೆಸ್ ಪಕ್ಷ ಹಾಗೂ ಆಂಧ್ರ ಪ್ರದೇಶ ವಿಧಾನ ಸಭೆಯ ಮುಖಂಡರಾಗಿದ್ದಾರೆ. ಜಗನ್ ಮೋಹನ ರೆಡ್ಡಿಯವರು ರಾಜಕಾರಣದ ಹಿನ್ನೆಲೆಯ ಕುಟುಂಬದಿಂದ ಬಂದವರಾಗಿದ್ದಾರೆ. ಇವರು ಆಂಧ್ರ ಪ್ರದೇಶದ ಮಾಜಿ ಮುಖ್ಯಮಂತ್ರಿ ವೈ.ಎಸ್. ರಾಜಶೇಖರ ರೆಡ್ಡಿ ಅವರ ಸುಪುತ್ರ. ಇವರು ಆಂಧ್ರ ಪ್ರದೇಶದ ಕಡಪಾ ಜಿಲ್ಲೆಯ ಪುಲಿವೆಂದುಲ ಗ್ರಾಮದಲ್ಲಿ ಡಿಸೆಂಬರ್ 21, 1972 ರಂದು ಜನಿಸಿದರು. ಇವರು ತಮ್ಮ ಶಾಲಾಭ್ಯಾಸವನ್ನು ಹೈದರಾಬಾದ್ ಪಬ್ಲಿಕ್ ಸ್ಕೂಲ್‌ನಲ್ಲಿ ಮುಗಿಸಿದರು. ನಂತರ ನಿಜಾಮ್ ಕಾಲೇಜಿನಿಂದ ಪದವಿ ಶಿಕ್ಷಣ ಪೂರ್ಣಗೊಳಿಸಿದರು. ಇವರು ಬಿ.ಕಾಂ. ಪದವಿ ಹಾಗೂ ಮಾಸ್ಟರ್ ಆಫ್ ಬಿಸಿನೆಸ್ ಅಡ್ಮಿನಿಸ್ಟ್ರೇಶನ್ (ಎಂ.ಬಿ.ಎ) ಸ್ನಾತಕೋತ್ತರ ಶಿಕ್ಷಣ ಪದವಿಗಳನ್ನು ಪಡೆದುಕೊಂಡಿದ್ದಾರೆ. ಆಗಸ್ಟ್ 28, 1996 ರಂದು ಭಾರತಿ ಅವರೊಂದಿಗೆ ವಿವಾಹವಾದರು. ಭಾರತಿ ಇವರು ಸ್ಥಳೀಯ ಪುಲಿವೆಂದುಲದ ಚಿಕ್ಕ ಮಕ್ಕಳ ತಜ್ಞವೈದ್ಯ ಹಾಗೂ ಮಾನವತಾವಾದಿ ಡಾ. ಇ.ಸಿ. ಗಂಗಿರೆಡ್ಡಿ ಅವರ ಪುತ್ರಿ. ಜಗನ್ ರೆಡ್ಡಿ ದಂಪತಿಗೆ ಇಬ್ಬರು ಪುತ್ರಿಯರಿದ್ದಾರೆ.