ಸುಮಿತ್ರಾ ಮಹಾಜನ್

ಭಾರತೀಯ ಲೋಕಸಭೆಗೆ ಮೀರಾ ಕುಮಾರ ನಂತರದಲ್ಲಿನ ಎರಡನೇ ಮಹಿಳಾ ಸ್ಪೀಕರ್ ಎಂಬ ಗೌರವಕ್ಕೆ ಸುಮಿತ್ರಾ ಮಹಾಜನ್ ಭಾಜನರಾಗಿದ್ದಾರೆ. 1989ರಲ್ಲಿ ಮೊದಲ ಬಾರಿಗೆ ಇಂದೋರ್ ಲೋಕಸಭಾ ಕ್ಷೇತ್ರದಲ್ಲಿ ಸ್ಪರ್ಧಿಸಿ ಕಾಂಗ್ರೆಸ್ ನ ಹಿರಿಯ ನಾಯಕ ಮಾಜಿ ಸಿಎಂ ಆಗಿದ್ದ ಪ್ರಕಾಶ ಚಂದ್ರ ಸೇಥಿ ಅವರನ್ನು ಸೋಲಿಸಿ ಸಂಸದರಾಗಿ ಆಯ್ಕೆಯಾದರು.
ಒಂದೇ ಕ್ಷೇತ್ರದಿಂದ ಅತಿ ಹೆಚ್ಚು ಬಾರಿ ಜಯಗಳಿಸಿದ ಮಹಿಳಾ ಸಂಸದೆ ಹಾಗೂ ಸ್ಪೀಕರ್ ಎಂಬ ಗೌರವ ಇವರ ಹೆಸರಿನಲ್ಲಿ ದಾಖಲಾಗಿದೆ. ಸಾರ್ವಜನಿಕವಾಗಿ ಮಹಾಭಾರತ, ಭಗವದ್ಗೀತೆ ಮತ್ತು ರಾಣಿ ಅಹಲ್ಯಾಬಾಯಿ ಹೋಳ್ಕರ್ ಅವರ ಕುರಿತು ಮಾತನಾಡುವುದು, ಚರ್ಚೆಯಲ್ಲಿ ಪಾಲ್ಗೊಳ್ಳುವುದು ಮತ್ತು ಉಪನ್ಯಾಸಗಳನ್ನು ನೀಡುವ ಮೂಲಕ ಜನರ ಮಧ್ಯೆ ತಮ್ಮನ್ನು ತಾವು ಗುರುತಿಸಿಕೊಂಡು ಮೇಲೆ ಬಂದವರು. ಮಧ್ಯಪ್ರದೇಶದ ಮರಾಠಿ ಅಕಾಡೆಮಿಯ ಮಾಜಿ ಅಧ್ಯಕ್ಷೆ, ಇಂದೋರ್ ನ ಅಹಲ್ಯಾ ಉತ್ಸವ ಸಮೀತಿ ಅಧ್ಯಕ್ಷೆ, ಇಂದೋರ್ ನ ಸಮಕಾಲೀನ ಅಧ್ಯಯನ ಕೇಂದ್ರದ ಅಧ್ಯಕ್ಷೆಯಾಗಿ ಕಾರ್ಯನಿರ್ವಹಿಸಿದ್ದಾರೆ. ಅಲ್ಲದೇ 2018ರ ಮಾರ್ಚ್ ನಲ್ಲಿ ನಡೆದ ಮಹಿಳಾ ಶಾಸಕಿಯರು ಮತ್ತು ಸಂಸದರ ಮೊದಲ ರಾಷ್ಟ್ರೀಯ ಸಮ್ಮೇಳನದ ಪರಿಕಲ್ಪನೆ ರೂಪಿಸಿ, ಆಯೋಜಿಸಿ, ಅದರ ಅಧ್ಯಕ್ಷತೆಯನ್ನೂ ವಹಿಸಿದ ಕೀರ್ತಿ ಸುಮಿತ್ರಾ ಮಹಾಜನ್ ಅವರಿಗೆ ಸಲ್ಲುತ್ತದೆ.

2016 ಸೆಪ್ಟೆಂಬರ್ - ಅಕ್ಟೋಬರ್ ನಲ್ಲಿ ಕೋರಿಯಾ ಗಣರಾಜ್ಯಕ್ಕೆ (ಸಿಯೋಲ್)ಗೆ ಭಾರತೀಯ ಸಂಸದೀಯ ನಿಯೋಗದಲ್ಲಿ ಭೇಟಿ ನೀಡಿದ್ದರು. ಈ ವೇಳೆ ಅಲ್ಲಿನ ಹಂಕುಕ್ ವಿದೇಶಾಂಗ ವ್ಯವಹಾರಗಳ ವಿಶ್ವವಿದ್ಯಾಲಯ ಸುಮಿತ್ರಾ ಅವರಿಗೆ ಗೌರವ ಡಾಕ್ಟರೆಟ್ ನೀಡಿ ಗೌರವಿಸಿದೆ.