ಪವನ್ ಕುಮಾರ ಚಾಮ್ಲಿಂಗ್

ಸ್ವಾತಂತ್ರ್ಯಾನಂತರದ ಭಾರತದಲ್ಲಿ ಅತಿ ಹೆಚ್ಚಿನ ಅವಧಿಗೆ ಅಂದರೆ ಸತತ ಐದು ಅವಧಿಗೆ ಸಿಎಂ ಆಗಿ ಅಧಿಕಾರ ನಡೆಸಿದ ಕೀರ್ತಿ ಪವನಕುಮಾರ ಚಾಮ್ಲಿಂಗ್ ಅವರಿಗೆ ಸಲ್ಲುತ್ತದೆ. ಚಾಮ್ಲಿಂಗ್ ನೇಪಾಳಿ ಭಾಷೆಯ ಸಾಹಿತಿಯಾಗಿದ್ದು, ಸಿಕ್ಕೀಂ ಸಾಹಿತ್ಯ ಪರಿಷತ್ತಿನಿಂದ 2010ರಲ್ಲಿ ಬಾನು ಪುರಸ್ಕಾರ ಪಡೆದಿದ್ದಾರೆ. ಅವರ ಕಾವ್ಯನಾಮ ಪವನ್ ಚಾಮ್ಲಿಂಗ್ ಕಿರಣ್.

ಸಿಕ್ಕೀಂ ರಾಜ್ಯದ ಅಭೂತಪೂರ್ವ ಅಭಿವೃದ್ಧಿ ಹಾಗೂ ಶಾಂತಿಗೆ ಅವಿರತವಾಗಿ ಶ್ರಮಿಸಿದ ಕಾರಣ ಪವನ ಕುಮಾರ ಚಾಮ್ಲಿಂಗ್ ಅತಿ ಹೆಚ್ಚು ಅವಧಿಗೆ ಸಿಕ್ಕೀಂ ಸಿಎಂ ಹುದ್ದೆಯಲ್ಲಿ ಮುಂದುವರೆಯಲು ಸಾಧ್ಯವಾಯಿತು. 18 ಜನವರಿ 2016ರಲ್ಲಿ ಪ್ರಧಾನಿ ನರೇಂದ್ರ ಮೋದಿ ದೇಶದ ಏಕೈಕ ಹಾಗೂ ಮೊದಲ ಸಾವಯವ ರಾಜ್ಯ ಎಂದು ಸಿಕ್ಕೀಂ ರಾಜ್ಯವನ್ನು ಘೋಷಣೆ ಮಾಡಿದರು. ಅಲ್ಲಿ ರಾಜ್ಯಾದ್ಯಂತ ಸಾವಯವ ಕೃಷಿಯನ್ನು ಅನುಷ್ಠಾನಕ್ಕೆ ತರಲಾಗಿದೆ. ಈ ಕಾರಣಕ್ಕಾಗಿ 15 ಮೇ 2017ರಲ್ಲಿ ಚಾಮ್ಲಿಂಗ್ ಅವರಿಗೆ ಮೊದಲ ಬೈರೂನ್ ಸಿಂಗ್ ಶೇಖಾವತ್ ಜೀವಮಾನ ಸಾಧನೆ ಪುರಸ್ಕಾರ ನೀಡಿ ಗೌರವಿಸಲಾಗಿದೆ. ಅಮೇರಿಕದ ಬಯಾಗ್ರಫಿಕಲ್ ಇನ್ಸ್ಟಿಟ್ಯೂಟ್ ಕೂಡ ಇದೇ ಕಾರಣಕ್ಕೆ ಚಾಮ್ಲಿಂಗ್ ಅವರನ್ನು 1998 ರಲ್ಲಿ ಮ್ಯಾನ್ ಆಫ್ ದ ಇಯರ್ ಎಂದು ಗೌರವಿಸಿದ್ದಲ್ಲದೇ, ಸಮುದಾಯ ಹಾಗೂ ಗೆಳೆಯರಿಗಾಗಿ ಅದ್ಬುತವಾದ ಸಾಧನೆಯ ಮಾರ್ಗ ತೋರಿಸಿಕೊಟ್ಟಿದ್ದಾರೆ ಎಂದು ಮುಕ್ತಕಂಠದಿಂದ ಶ್ಲಾಘಿಸಿದೆ. ನವದೆಹಲಿಯ ಇನ್ಸ್ಟಿಟ್ಯೂಟ್ ಆಫ್ ಇಕನಾಮಿಕ್ ಸ್ಟಡೀಸ್ ಸಂಸ್ಥೆ 1999ರಲ್ಲಿ ಮಾನವ ಸೇವಾ ಪುರಸ್ಕಾರ, 2002ರಲ್ಲಿ ಕಲ್ಕತ್ತಾದ ಪೊಯಿಟ್ಸ್ ಫೌಂಡೇಷನ್ ಅವಾರ್ಡ್, ಸಿಕ್ಕೀಂ-ಮಣಿಪಾಲ ವಿವಿಯಿಂದ ಗೌರವ ಡಾಕ್ಟರೆಟ್ ಪ್ರಧಾನ, 2009ರಲ್ಲಿ ಲೀಡರ್ ಶಿಪ್, ಗುಡ್ ಗವರ್ನನ್ಸ್ ಅವಾರ್ಡ್, 2010ರಲ್ಲಿ ತೇಕೋಂಗ್ ಅಂಬಾಸಡರ್ ಆಫ್ ಪೀಸ್ ಅವಾರ್ಡ್, 2012ರಲ್ಲಿ ಭಾರತ್ ಅಸ್ಮಿತಾ ಜೀವನ್ ಗೌರವ ಪುರಸ್ಕಾರ, 2016ರಲ್ಲಿ ಯುವ ಕವಿ ಸಿದ್ಧಿ ಚರಣ ಅವಾರ್ಡ್, ಸಸ್ಟೇನೆಬಲ್ ಡೆವಲೆಪ್ಮೆಂಟ್ ಅವಾರ್ಡ್, ಅಂತಾರಾಷ್ಟ್ರೀಯ ಮಟ್ಟದ ಒನ್ ವರ್ಲ್ಡ್ ಅವಾರ್ಡ್, ಬುಕ್ ಆಫ್ ರೆಕಾರ್ಡ್ಸ್, ವರ್ಲ್ಡ್ ಬುಕ್ ಆಫ್ ರೆಕಾರ್ಡ್ಸ್ ಗೌರವಕ್ಕೆ ಭಾಜನರಾಗಿದ್ದಾರೆ.