ಪದ್ಮ ಪ್ರಿಯಾ ಶ್ರೀನಿವಾಸನ್

ಚೆನ್ನೈನ ಮಧುರಾವೊಯಲ್ ನಲ್ಲಿ ಹುಟ್ಟಿ ಬೆಳೆದ ಪದ್ಮ ಪ್ರಿಯಾ ಶ್ರೀನಿವಾಸನ್ ಯುವ ಪರಿಸರವಾದಿ ಮತ್ತು ಸಾಮಾಜಿಕ ಕಾರ್ಯಕರ್ತೆ. 2018 ರಲ್ಲಿ ತಿರುಚ್ಚಿಯ ಭಾರತಿದಾಸನ್ ವಿಶ್ವವಿದ್ಯಾಲಯದಿಂದ ಮೈಕ್ರೋಬಯಾಲಜಿಯಲ್ಲಿ ಸ್ನಾತಕೋತ್ತರ ಪದವಿ ಪಡೆದುಕೊಂಡರು.

ಪದ್ಮ ಪ್ರಿಯಾ ಅವರು ಪರಿಸರ ಸಮಸ್ಯೆಗಳ ಜೊತೆಗೆ ಸಾಮಾಜಿಕ ಸಮಸ್ಯೆಗಳ ಬಗ್ಗೆಯೂ ಧ್ವನಿ ಎತ್ತುತ್ತಿದ್ದರು. ಇವರು ತಮ್ಮ ಯೂಟ್ಯೂಬ್ ಚಾನೆಲ್ 'ಚೆನ್ನೈ ತಮಿಝಾಚಿ' ಮೂಲಕ ಖ್ಯಾತಿ ಪಡೆದುಕೊಂಡರು. ಇಲ್ಲಿ ಅವರು ಪರಿಸರ ಸಮಸ್ಯೆಗಳ ಕುರಿತು ವೀಡಿಯೊಗಳನ್ನು ಪೋಸ್ಟ್ ಮಾಡುತ್ತಿದ್ದರು. ಎನ್ವಿರಾನ್ಮೆಂಟಲ್ ಇಂಪ್ಯಾಕ್ಟ್ ಅಸೆಸ್ಮೆಂಟ್ (ಇಐಎ) 2020 ರ ಕರಡು ಕುರಿತಾದ ತಮ್ಮ ವೀಡಿಯೊಗಳಿಂದ ಹೆಚ್ಚು ಪ್ರಚಾರಕ್ಕೆ ಬಂದರು. ಇದು ವೈರಲ್ ಆಗಿ ಹಿರಿಯ ನಟ ಮತ್ತು ಎಂಎನ್ಎಂ ಮುಖ್ಯಸ್ಥ ಕಮಲ್ ಹಸನ್ ಅವರಿಂದ ಮೆಚ್ಚುಗೆ ಗಳಿಸಿತು. ನಂತರ ಕಮಲ್ ಹಸನ್ ಅವರ ಆಹ್ವಾನದ ಮೇರೆಗೆ ಮಕ್ಕಂ ನಿಧಿ ಮಾಯಂಗೆ ಸೇರಿಕೊಂಡರು ಮತ್ತು ಎಂಎನ್‌ಎಂನ ಪರಿಸರ ವಿಭಾಗದ ರಾಜ್ಯ ಕಾರ್ಯದರ್ಶಿಯಾದರು. 2021 ರಲ್ಲಿ ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ಮಧುರಾವೊಯಲ್ ಕ್ಷೇತ್ರದಿಂದ ಸ್ಪರ್ಧಿಸಲು ಅವಕಾಶ ಸಿಕ್ಕಿತು.