ಸೆಲ್ವಿ ಜೆ.ಜಯಲಲಿತಾ

ಚಿತ್ರರಂಗದಲ್ಲಿ ಬಾಲನಟಿಯಾಗಿ ಬೆಳೆದ ಜಯಲಲಿತಾ ಯೌವನದಲ್ಲಿ ಚಿತ್ರರಂಗದ ಖ್ಯಾತನಾಮ ಚಿತ್ರಗಳಲ್ಲಿ ಪ್ರಮುಖ ಭೂಮಿಕೆಯಲ್ಲಿ ನಟಿಸಿ ನಂತರ ರಾಜಕಾರಣದಲ್ಲಿ ಮಿಂಚಿದವರು. ಹುಟ್ಟಿದ್ದು ಕರ್ನಾಟಕವಾದರೂ ಅವರ ರಾಜಕೀಯ ಭವಿಷ್ಯವನ್ನು ಕಂಡುಕೊಂಡಿದ್ದು ಐದು ಬಾರಿ ತಮಿಳುನಾಡಿನ ಮುಖ್ಯಮಂತ್ರಿಯಾಗಿ ಅಧಿಕಾರ ನಡೆಸಿದರು. 1961ರಲ್ಲಿ ಶ್ರೀ ಶೈಲ ಮಹಾತ್ಮೆ ಕನ್ನಡ ಚಲನಚಿತ್ರದ ಮೂಲಕ ಬಾಲನಟಿಯಾಗಿ ಚಿತ್ರರಂಗಕ್ಕೆ ಕಾಲಿಟ್ಟ ಜಯಲಲಿತಾ 1965ರಲ್ಲಿ ಪ್ರಥಮ ತಮಿಳು ಚಿತ್ರ ವೆನ್ನಿರಾ ಆಡೈನಲ್ಲಿ ನಟಿಸಿ ಗಮನ ಸೆಳೆದರು. ನಂತರದಲ್ಲಿ ಎಂ.ಜಿ. ರಾಮಚಂದ್ರನ್ (ಎಂಜಿಆರ್) ಜತೆ 28, ಶಿವಾಜಿ ಗಣೇಶನ್ ಜತೆ 17 ಚಿತ್ರಗಳಲ್ಲಿ ನಟಿಸಿ ಹಲವಾರು ಪ್ರಶಸ್ತಿ, ಪುರಸ್ಕಾರಗಳಿಗೆ ಭಾಜನರಾದರು. ಎಂಜಿಆರ್ ಸ್ಥಾಪಿಸಿದ ಅಖಿಲ ಭಾರತ ಅಣ್ಣಾ ದ್ರಾವಿಡ ಮುನ್ನೇತ್ರ ಖಳಗಂ (ಎಐಎಡಿಎಂಕೆ) ರಾಜಕೀಯ ಪಕ್ಷ ಸೇರ್ಪಡೆಯೊಂದಿಗೆ ರಾಜಕಾರಣಕ್ಕೆ ಪಾದಾರ್ಪಣೆ ಮಾಡಿದರು.
1984-89ರಲ್ಲಿ ರಾಜ್ಯಸಭಾ ಸದಸ್ಯರು, 1987ರಲ್ಲಿ ಎಂಜಿಆರ್ ನಿಧನರಾದರು. 1989ರಿಂದ ಎಐಎಡಿಎಂಕೆಯ ನೇತೃತ್ವ ವಹಿಸಿಕೊಂಡ ಜಯಲಲಿತಾ 1991ರಲ್ಲಿ ಅಧಿಕಾರ ಹಿಡಿಯುವಲ್ಲಿ ಯಶಸ್ವಿಯಾದರು. ಪೂರ್ಣಪ್ರಮಾಣದ ಮತ್ತು ಪ್ರಥಮ ಮಹಿಳಾ ಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿದ ಅವರು ಆರು ಬಾರಿ ಸಿಎಂ ಪದವಿಗೇರಿದರು. ಅಕ್ರಮ ಆಸ್ತಿ ಸಂಪಾದನೆ ದೂರು, ವಿಚಾರಣೆ ಅಡಿಯಲ್ಲಿ ಅವರನ್ನು ಜೈಲಿಗೂ ಹಾಕಲಾಯಿತು. ಅನಾರೋಗ್ಯದ ಹಿನ್ನೆಲೆಯಲ್ಲಿ 75 ದಿನಗಳಿಗೂ ಹೆಚ್ಚು ಕಾಲ ಆಸ್ಪತ್ರೆಗೆ ಸೇರಿದ ಅವರು, 5 ಡಿಸೆಂಬರ್ 2016ರಂದು ಇಹಲೋಕ ತ್ಯಜಿಸಿದರು. ಅವರ ಸಾವೂ ಕೂಡ ವಿವಾದದೊಂದಿಗೆ ಅಂತ್ಯಕಂಡಿತು.