ಲಾಲ್ ಕೃಷ್ಣ ಅಡ್ವಾಣಿ

ಭಾರತೀಯ ಜನತಾ ಪಕ್ಷದ (ಬಿಜೆಪಿ) ಅತ್ಯಂತ ಹಿರಿಯ ಮುಖಂಡರಲ್ಲಿ ಲಾಲ್ ಕೃಷ್ಣ ಅಡ್ವಾಣಿ ಅಗ್ರಗಣ್ಯರು. 1941ರಲ್ಲಿ ರಾಷ್ಟ್ರೀಯ ಸ್ವಯಂ ಸೇವಕ ಸಂಘ (ಆರ್ ಎಸ್ ಎಸ್)ದ ಸ್ವಯಂ ಸೇವಕರಾಗಿ ತಮ್ಮ 14ನೇ ವರ್ಷದಲ್ಲಿ ಸೇರ್ಪಡೆಗೊಳ್ಳುವ ಮೂಲಕ ಸಾಮಾಜಿಕ ಜೀವನಕ್ಕೆ ಪಾದಾರ್ಪಣೆ ಮಾಡಿದರು. ನಂತರದಲ್ಲಿ ಪೂರ್ಣ ಪ್ರಮಾಣದಲ್ಲಿ ಕರಾಚಿ ವಿಭಾಗದಲ್ಲಿ ಪ್ರಚಾರಕರಾಗಿ, ವಿವಿಧ ಶಾಖೆಗಳ ಆರಂಭಕ್ಕೆ ಕಾರಣರಾದರು. ಭಾರತ -ಪಾಕ್ ಬೇರ್ಪಟ್ಟ ನಂತರ ರಾಜಸ್ಥಾನದ ಮತ್ಸ್ಯಾ- ಆಳ್ವರ್ ಪ್ರದೇಶಕ್ಕೆ ಪ್ರಚಾರಕ್ಕಾಗಿ ಕಳಿಸಲ್ಪಟ್ಟರು. ಅಲ್ಲಿ ಭಾರತ-ಪಾಕ್ ಬೇರ್ಪಟ್ಟ ಕಾರಣಕ್ಕೆ ಜನಾಂಗೀಯ ಅಥವಾ ಕೋಮ ಗಲಭೆ ಆರಂಭಗೊಂಡಿತು. ಆದಾಗ್ಯೂ ಸಮಾಜದಲ್ಲಿ ಶಾಂತಿ ಕಾಪಾಡುವ ನಿಟ್ಟಿನಲ್ಲಿ ಭರತ್ ಪುರ, ಕೋಟಾ, ಬುಂದಿ ಮತ್ತು ಜಾಲ್ವಾರ್ ಜಿಲ್ಲೆಗಳಲ್ಲಿ 1952ರವರೆಗೆ ನೆಲೆಸಿದ್ದರು.

ನಂತರದಲ್ಲಿ ಅಡ್ವಾಣಿ ಅವರು ಆರ್ ಎಸ್ ಎಸ್ ಮತ್ತು ಶ್ಯಾಮ್ ಪ್ರಸಾದ ಮುಖರ್ಜಿ ಅವರೊಂದಿಗೆ ಸೇರಿ 1951ರಲ್ಲಿ ಭಾರತೀಯ ಜನಸಂಘ ಎಂಬ ರಾಜಕೀಯ ಪಕ್ಷ ಸ್ಥಾಪಿಸಿದರು. 1957ರಲ್ಲಿ ದೆಹಲಿಗೆ ತೆರಳಿ ಸಂಸದೀಯ ವ್ಯವಹಾರಗಳಲ್ಲಿ ಪಾಲ್ಗೊಳ್ಳತೊಡಗಿದರು. ನಂತರದಲ್ಲಿ ದೆಹಲಿಯ ಜನಸಂಘದ ಕಾರ್ಯದರ್ಶಿ ಮತ್ತು ಕೆಲವೇ ದಿನಗಳಲ್ಲಿ ಅಧ್ಯಕ್ಷರಾಗಿ ಪದೋನ್ನತಿ ಪಡೆದರು. 1967ರಲ್ಲಿ ದೆಹಲಿಯ ನಗರಸಭೆಗೆ ನಡೆದ ಚುನಾವಣೆಯಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಆರ್.ಎಸ್.ಎಸ್.ನ ವಾರಪತ್ರಿಕೆಯ ನಿರ್ವಾಹಕರಾಗಿ, 1966ರಲ್ಲಿ ರಾಷ್ಟ್ರೀಯ ಆಡಳಿತ ಮಂಡಳಿಗೆ ನೇಮಕಗೊಂಡರು.

1970ರಿಂದ ದೆಹಲಿಯಿಂದ ರಾಜ್ಯಸಭೆಗೆ 6 ವರ್ಷ ಕಾಲ ನಾಮಕರಣಗೊಂಡರು. ಜನಸಂಘದ ವಿವಿಧ ಹುದ್ದೆಗಳನ್ನು ನಿರ್ವಹಿಸಿ 1973ರಲ್ಲಿ ಖಾನ್ ಪುರ ಸಮ್ಮೇಳನದಲ್ಲಿ ಅಧ್ಯಕ್ಷರಾಗಿ ನೇಮಕಗೊಂಡರು. 1976ರಿಂದ 1982 ರವರೆಗೆ ಗುಜರಾತ್ ನಿಂದ ರಾಜ್ಯಸಭಾ ಸದಸ್ಯರಾಗಿ ಮುಂದುವರೆದರು. ಇಂದಿರಾ ಗಾಂಧಿ ಅವರ ತುರ್ತುಪರಿಸ್ಥಿತಿ ಸಂದರ್ಭದ ನಂತರದಲ್ಲಿ ಜನಸಂಘ ಸೇರಿದಂತೆ ಹಲವು ರಾಜಕೀಯ ಪಕ್ಷಗಳು ಜನತಾ ಪಾರ್ಟಿಯಲ್ಲಿ ವಿಲೀನಗೊಂಡವು. ಅಡ್ವಾಣಿ ಮತ್ತು ಅವರ ಜತೆಗಾರ ಅಟಲ್ ಬಿಹಾರಿ ವಾಜಪೇಯಿ ಅವರು ಲೋಕಸಭೆಗೆ ಜನತಾ ಪಕ್ಷದಿಂದ 1977ರಲ್ಲಿ ಸ್ಪರ್ಧಿಸಿದರು. ನಂತರದಲ್ಲಿ ಅಡ್ವಾಣಿ ಅತಿ ಪ್ರಮುಖ ನಾಯಕರಾಗಿ ಹೊರಹೊಮ್ಮಿದರು ಮತ್ತು ಭಾರತೀಯ ಜನತಾ ಪಾರ್ಟಿಯ ಸಂಸ್ಥಾಪಕರಲ್ಲಿ ಒಬ್ಬರಾದರು. ನಂತರ 1982ರಿಂದ ಮಧ್ಯಪ್ರದೇಶದಿಂದ ಬಿಜೆಪಿ ಪಕ್ಷದಿಂದ ಎರಡು ಬಾರಿ ರಾಜ್ಯಸಭಾ ಸದಸ್ಯರಾಗಿ ಪುನರಾಯ್ಕೆಯಾದರು.