ಆನಂದಿಬೆನ್ ಎಂ. ಪಟೇಲ್

ಗುಜರಾತ ರಾಜ್ಯದ ಮೊದಲ ಮಹಿಳಾ ಸಿಎಂ ಎಂಬ ಗೌರವಕ್ಕೆ ಭಾಜನರಾಗಿರುವ ಆನಂದಿಬೆನ್ ಪಟೇಲ್ ಎನ್.ಎಂ. ಹೈಸ್ಕೂಲ್ ನಲ್ಲಿ ಕೇವಲ ಮೂರು ಹೆಣ್ಣುಮಕ್ಕಳು ಶಾಲೆಗೆ ಪ್ರವೇಶ ಪಡೆದಿದ್ದು ಅದರಲ್ಲಿ ಆನಂದಿಬೆನ್ ಕೂಡ ಒಬ್ಬರು. ಕ್ರೀಡೆಯಲ್ಲಿ ಅತ್ಯಂತ ಆಸಕ್ತಿ ಹೊಂದಿದ್ದ ಇವರು ತಮ್ಮ ಹೈಸ್ಕೂಲ್ ಅಧ್ಯಯನ ವೇಳೆ ಮೂರು ವರ್ಷ ಕಾಲ ಚಾಂಪಿಯನ್ ಪಟ್ಟ ಉಳಿಸಿಕೊಂಡಿದ್ದರು. ಇದಕ್ಕಾಗಿ ಅವರಿಗೆ ಮೆಹ್ಸಾನಾ ಜಿಲ್ಲೆಯ ವೀರ್ ಬಾಲಾ ಪ್ರಶಸ್ತಿಯನ್ನು ಪಡೆದುಕೊಂಡಿದ್ದರು. ಮಹಿಳಾ ಉನ್ನತಿಗಾಗಿ ಸದಾ ಶ್ರಮಿಸುತ್ತಿದ್ದ ಆನಂದಿಬೆನ್ ಮಹಿಳಾ ವಿಕಾಸ ಗ್ರೂಪ್ ಗೆ ಕೆಲಸಕ್ಕೆ ಸೇರಿಕೊಂಡರು. ಅಲ್ಲಿ 50ಕ್ಕೂ ಹೆಚ್ಚು ವಿಧವೆಯರಿಗೆ ವಿವಿಧ ಉದ್ಯೋಗಗಳ ಕುರಿತ ಕೌಶಲವನ್ನು ಕಲಿಸಿಕೊಟ್ಟರು.

1988ರಲ್ಲಿ ಅತ್ಯುತ್ತಮ ಶಿಕ್ಷಕಿ ಎಂಬ ರಾಜ್ಯಪಾಲರ ಪ್ರಶಸ್ತಿ ಪುರಸ್ಕಾರ ಗಳಿಸಿದರು. 1989ರಲ್ಲಿ ಶ್ರೇಷ್ಠ ಶಿಕ್ಷಕಿ ಎಂಬ ರಾಷ್ಟ್ರಪತಿ ಪದಕಕ್ಕೂ ಭಾಜನರಾದರು. 1999ರಲ್ಲಿ ಮುಂಬೈನ ಪಟೇಲ್ ಜಾಗೃತಿ ಮಂಡಳದ ವತಿಯಿಂದ ಸರ್ದಾರ ಪಟೇಲ ಪುರಸ್ಕಾರ, 2000ರಲ್ಲಿ ತಪೋಧನ ಬ್ರಾಹ್ಮಣ ವಿಕಾಸ ಮಂಡಳದಿಂದ ವಿದ್ಯಾ ಗೌರವ, 2005ರಲ್ಲಿ ಪಟೇಲ್ ಸಮುದಾಯದಿಂದ ಪಾಟೀಧಾರ ಶಿರೋಮಣಿ, ನರ್ಮದಾ ನವಗಂ ಜಲಾಶಯದಲ್ಲಿ ಮುಳುಗುತ್ತಿದ್ದ ಇಬ್ಬರು ಶಾಲಾ ಬಾಲಕಿಯರನ್ನು ಜೀವ ಸಹಿತ ಕಾಪಾಡಿದ್ದಕ್ಕಾಗಿ ಶೌರ್ಯ ಪ್ರಶಸ್ತಿ ಸೇರಿದಂತೆ ಹತ್ತಾರು ಪ್ರಶಸ್ತಿಗಳಿಗೆ ಭಾಜನರಾಗಿದ್ದಾರೆ.