ಎ. ಟಿ. ರಾಮಸ್ವಾಮಿ

ಎ. ಟಿ. ರಾಮಸ್ವಾಮಿ ಹಾಸನ ಜಿಲ್ಲೆಯ ಅರಕಲಗೂಡು ಕ್ಷೇತ್ರದ ಜೆಡಿಎಸ್ ಶಾಸಕರು. 2018ರ ಚುನಾವಣೆಯಲ್ಲಿ 85,064 ಮತಗಳನ್ನು ಪಡೆದು ಜಯಗಳಿಸಿದ್ದಾರೆ.

2013ರ ಚುನಾವಣೆಯಲ್ಲಿಯೂ ಅರಕಲಗೂಡು ಕ್ಷೇತ್ರದಲ್ಲಿ ಅವರು ಚುನಾವಣೆಗೆ ಸ್ಪರ್ಧಿಸಿದ್ದರು. 52,575 ಮತಗಳನ್ನು ಪಡೆದು ಕಾಂಗ್ರೆಸ್‌ನ ಎ. ಮಂಜು ವಿರುದ್ಧ ಸೋಲು ಕಂಡಿದ್ದರು.

ಎಂಎಸ್‌ಸಿ (ಎಜಿ) ವ್ಯಾಸಂಗ ಮಾಡಿರುವ ಎ. ಟಿ. ರಾಮಸ್ವಾಮಿ ಕೃಷಿಕರಾಗಿದ್ದರು. 1999ರಲ್ಲಿ ಅರಕಲಗೂಡು ಕ್ಷೇತ್ರದಲ್ಲಿ ಎ. ಮಂಜು ಬಿಜೆಪಿಯಿಂದ ಗೆದ್ದು ಶಾಸಕರಾದರು. ಕಾಂಗ್ರೆಸ್‌ನ ಎ. ಟಿ. ರಾಮಸ್ವಾಮಿ ಸೋಲುಕಂಡರು.

2004ರಲ್ಲಿ ರಾಮಸ್ವಾಮಿ ಜೆಡಿಎಸ್‌ನಿಂದ ಗೆದ್ದು ಬಂದರು. 2006ರಲ್ಲಿ ಸರ್ಕಾರ ಬೆಂಗಳೂರು ನಗರದ ಸುತ್ತಲೂ ಸರ್ಕಾರಿ ಭೂಮಿ ಒತ್ತುವರಿ ಪತ್ತೆ ಹಚ್ಚಲು ಎ. ಟಿ. ರಾಮಸ್ವಾಮಿ ಅಧ್ಯಕ್ಷತೆಯಲ್ಲಿ ಜಂಟಿ ಸದನ ಸಮಿತಿ ರಚನೆ ಮಾಡಿತು.

ರಾಮಸ್ವಾಮಿ ಅವರು ಪ್ರಾಮಾಣಿಕತೆಯಿಂದ ತನಿಖೆ ನಡೆಸಿ 2007ರಲ್ಲಿ ವರದಿ ತಯಾರು ಮಾಡಿದರು. ಸುಮಾರು 40 ಸಾವಿರ ಕೋಟಿ ರೂ. ಮೌಲ್ಯದ ಭೂಮಿ ಒತ್ತುವರಿಯಾಗಿದೆ ಎಂದು ವರದಿ ಕೊಟ್ಟರು.

2008ರಲ್ಲಿ ಚುನಾವಣೆಗೆ ಸ್ಪರ್ಧಿಸಲ್ಲ ಎಂದು ಎ. ಟಿ. ರಾಮಸ್ವಾಮಿ ಹೇಳಿದರು. ಆದರೆ, ಪಕ್ಷ, ಕಾರ್ಯಕರ್ತರ ಒತ್ತಡದಿಂದ ಕಣಕ್ಕಿಳಿದು ಸೋತರು. ಬಳಿಕ 2013ರ ಚುನಾವಣೆಯಲ್ಲಿಯೂ ಸೋತರು.

ಸಿದ್ದರಾಮಯ್ಯ ಮುಖ್ಯಮಂತ್ರಿಯಾಗಿದ್ದಾಗ ಎ. ಟಿ. ರಾಮಸ್ವಾಮಿ ಬೆಂಗಳೂರಿನ ಟೌನ್‌ಹಾಲ್ ಮುಂದೆ ಭೂ ಒತ್ತುವರಿದಾರರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು 39 ದಿನಗಳ ಧರಣಿ ನಡೆಸಿದರು. 2018ರ ಚುನಾವಣೆಯಲ್ಲಿ ಮತ್ತೆ ಗೆದ್ದು ಶಾಸಕರಾದರು.