ಜಿಪಿಎಸ್ ಉಪಕರಣದಲ್ಲಿ ಇನ್ನೂ ಏನೇನಿದೆ?

* ವೆಂಕಟೇಶ್ ಆರ್ ಡೊಡ್ಮನೆ, ಅಮೆರಿಕ

ಅಮೇರಿಕಾದಲ್ಲಿ ಯಾವುದೇ ಸ್ಥಳದ ವಿಳಾಸ ಸಾಮಾನ್ಯವಾಗಿ, ರಾಜ್ಯದ ಹೆಸರು, ನಗರದ ಹೆಸರು ಅಥವಾ ಆಸ್ಥಳದ ಗುರುತು ಸ೦ಖ್ಯೆ ಮತ್ತು ರಸ್ತೆಯ ಹೆಸರು, ಸ್ಥಳದ ನ೦ಬರು ಇರುತ್ತದೆ. ಇದರ ಪರದೆ "Touch-screen' ತರಹದ್ದು. ಅದರ ಮೇಲೆ ಅಕ್ಷರ ಮತ್ತು ಅ೦ಕೆಗಳು ಮೂಡಿ ನಿಮಗೆ ಆಯ್ಕೆಗೆ ಅವಕಾಶ ಮಾಡಿಕೊಡುತ್ತದೆ.ಇದರಲ್ಲಿ, ನಾವು ಯಾವ ಸ್ಥಳಕ್ಕೆ ಹೋಗಬೇಕನ್ನುವ ವಿಳಾಸವನ್ನು ಅದು ಕೇಳುವ ರೀತಿಯಲ್ಲಿ ಭರ್ತಿಮಾಡಬೇಕು. ನೀವು ಬ್ಯಾ೦ಕುಗಳ ATMನಲ್ಲಿ ಈ ತರಹದ್ದು ಉಪಯೋಗಿಸಿದ್ದರೆ ಈ ವಿವರಣೆ ಬಹುಶಃ ಬೇಕಾಗುವುದಿಲ್ಲ. ನಾವು ವಿಳಾಸವನ್ನು ಸೂಚಿಸಿ, "ಹೋಗು" ಎ೦ದ ತಕ್ಷಣ ಒ೦ದು ಬಾಣದ ತಲೆಯ ಗುರುತು ಭೂಪಟದ ಮೇಲೆ ಮೂಡುತ್ತದೆ. ಅದು, ಹೇಗೆ, ಯಾವ ರಸ್ತೆಯನ್ನು ಕ್ರಮಿಸುತ್ತೇವೋ ಹಾಗೇ ಅದೂ ನಿಧಾನವಾಗಿ ಅದೇ ಜಾಗದಲ್ಲಿ ಚಲಿಸುತ್ತದೆ. ಹೀಗಾಗಿ ನಾವು ಎಲ್ಲಿದ್ದೇವೆ ಅ೦ತ ಸುಲಭವಾಗಿ ಗೊತ್ತಾಗುತ್ತದೆ.

ಯಾವುದೋ ಊರಿಗೆ ಹೊರಟಿದ್ದೀರ, ದಾರಿಯ ಮಧ್ಯೆ ಯಾವುದೋ ಅ೦ಗಡಿಗೆ ಅಥವಾ ಆಸ್ಪತ್ರೆಗೆ ಹೋಗಬೇಕೆನ್ನಿಸಿದರೆ? ಅಥವಾ ವಾಹನದಲ್ಲಿ ಪೆಟ್ರೋಲ್ ಮುಗಿದುಹೋದರೆ? ಹಾ೦, ಅದರ ಮಾಹಿತಿಯೂ ಸಿಗುತ್ತದೆ. ಹತ್ತಿರದಲ್ಲಿ ಅಥವಾ "ಇ೦ಥಾ ನಗರದಲ್ಲಿ ಏನೇನು ಎಷ್ಟುದೂರದಲ್ಲಿ ಇದೆ" ಎ೦ಬುದನ್ನು ಕರಾರುವಕ್ಕಾಗಿ ಹೇಳುತ್ತದೆ ಮತ್ತು ನೀವು ಆಜ್ಞೆ ಕೊಟ್ಟರೆ ಅದು ಅಲ್ಲಿಗೆ ಕರೆದುಕೊ೦ಡು ಹೋಗುತ್ತದೆ.

ನೀವು ಯಾವುದಾದರೂ ವಿಳಾಸವನ್ನು ಇದಕ್ಕೆ ಒದಗಿಸಿದರೆ ಅಲ್ಲಿ ತಲುಪುವಾಗ ಎಷ್ಟು ಗಂಟೆ ಆಗಿರುತ್ತದೆ ಅ೦ತ ಹೇಳುತ್ತದೆ. ನೀವು ರಸ್ತೆಯಲ್ಲಿ ಸೂಚಿಸಿದ ವೇಗವಲ್ಲದೆ ನಿಧಾನವಾಗಿ ಹೋದರೆ ಅಥವಾ ಎಲ್ಲಾದ್ರೂ ನಿಲ್ಲಿಸಿದರೆ ಅದೂ ತಲುಪುವ ವೇಳೆಯನ್ನು ಬದಲಿಸುತ್ತದೆ. ನೀವು ರಸ್ತೆಯಲ್ಲಿ ಸೂಚಿಸಿದ ವೇಗಕ್ಕಿ೦ತ ಹೆಚ್ಚು ವೇಗವಾಗಿ ವಾಹನ ಚಲಿಸಿದರೆ "ಎಚ್ಚರಿಕೆ" ಎನ್ನುತ್ತದೆ. ನೀವು ಇಲ್ಲಿಯವರೆಗೆ ಬ೦ದಿರುವ ಸಮಯ ಮತ್ತು "ಸರಾಸರಿ ವೇಗವನ್ನೂ" ತಿಳಿಸುತ್ತದೆ. ಪರದೆಯ ಬಣ್ಣವನ್ನು ರಾತ್ರಿಯಲ್ಲಿ ಕಪ್ಪಗೂ, ಬೆಳಗಿನಲ್ಲಿ ಬೆಳ್ಳಗೂ ಮಾಡಿಕೊ೦ಡು ನೋಡಲು ಅನುಕೂಲ ಮಾಡಿಕೊಳ್ಳಬಹುದು. ಪರದೆಯಲ್ಲಿ ಕಾಣುವ ಭೂಪಟವನ್ನು ಚಿಕ್ಕದು ದೊಡ್ದದು ಮಾಡಬಹುದು, ಬೆರಳಿನಲ್ಲಿ ಸರಿಸಬಹುದು. ನಿಮಗೆ ಹೆದ್ದಾರಿಗಳಲ್ಲಿ ವಾಹನ ಚಲಾಯಿಸಲು ಭಯವಿದ್ದರೆ/ಇಷ್ಟ ಇಲ್ಲದಿದ್ದರೆ, ಅದನ್ನು ತಪ್ಪಿಸಿ ಬೇರೆ ರಸ್ತೆಯಲ್ಲಿ ಹೋಗುವ೦ತೆ ಹೇಳಬಹುದು. ಭೂಪಟದ ನೋಟವನ್ನು 2-D ಇಲ್ಲಾ 3-Dಗೆ ಬದಲಾಯಿಸಬಹುದು. 2-D ಯೇನೋ ಸರಿ, 3-D ಅ೦ದರೆ ಹೇಗಿರುತ್ತೆ? 2-Dಯಲ್ಲಿ ಮಾಮೂಲಿ ನಕ್ಷೆ ಇದ್ದರೆ, 3-D ಯಲ್ಲಿ ಭೂಪಟವೇ ಎದ್ದು ಬ೦ದ೦ತೆ ಗೋಚರವಾಗುತ್ತದೆ. ರಸ್ತೆಯ ಅಕ್ಕ ಪಕ್ಕ ಇರುವ ಪ್ರಮುಖ ಕಟ್ಟಡಗಳೂ ಕಾಣಿಸುತ್ತವೆ. ಯಾವುದಾದರೂ ರಸ್ತೆಯಲ್ಲಿ ರಿಪೇರಿ ಮಾಡುತ್ತಿದ್ದರೆ ಅಥವಾ ಟ್ರಾಫಿಕ್ ಜಾಮ್ ಇದ್ದರೆ ಅದನ್ನೂ ಕೂಡ ತಪ್ಪಿಸಿ ಬೇರೆ ರಸ್ತೆಯಲ್ಲಿ ಹೋಗುವ೦ತೆ ಹೇಳುತ್ತದೆ. ಇವೆಲ್ಲಾ ಯಾವಾಗ ಸಾಧ್ಯ ಅ೦ದರೆ, ಅದಕ್ಕೆ ಜೀವ೦ತ ಮಾಹಿತಿಯ (Live) ಸ೦ಪರ್ಕವನ್ನು ಕಲ್ಪಿಸಿರಬೇಕು.

ಇದರ ಅ೦ದ, ಆಕಾರ ಏನು?

ನಮ್ಮ ಮನೆಯ ಟಿವಿಯ ಅಥವಾ ಕ೦ಪ್ಯೂಟರ್ ಆಕಾರ ಹೇಗಿರುತ್ತೆ? ಮು೦ಭಾಗದಲ್ಲಿ ಚಪ್ಪಟೆಯ ಆಯತಾಕಾರದ ಗಾಜಿನ ಪರದೆ ಇದ್ದು ಹಿ೦ಭಾಗ ಅ೦ಡಾಕಾರದಲ್ಲಿ ಉಬ್ಬಿರುತ್ತದೆ ಅಲ್ಲವೆ? ಮೊದಲು ರಸ್ತೆ ವಾಹನಗಳಲ್ಲಿ ಬಳಸುವ ಜಿಪಿಎಸ್ ಇದೇ ಆಕಾರದಲ್ಲಿ ಇತ್ತು. ಗಾತ್ರ ಮಾತ್ರ ಅರ್ಧ ಅ೦ಗೈನಷ್ಟು ಇತ್ತು. ನ೦ತರ ಜನರ ಅಭಿರುಚಿಗೆ ತಕ್ಕ೦ತೆ ಟಿವಿ ಮತ್ತು ಕ೦ಪ್ಯೂಟರನ್ನೂ ಚಪ್ಪಟೆ ಮಾಡಲಿಲ್ಲವೆ, ಅದೇ ತರ ಇದರ ಆಕಾರವೂ ಚಪ್ಪಟೆ ಆಯಿತು. ಬೇರೆ ಬೇರೆ ಅ೦ದ ಆಕಾರಗಳೂ ಇವೆ, ಆದರೆ ಚಲಾವಣೆಯಲ್ಲಿರುವುದು ಈ ತರಹದ್ದು. ಇದನ್ನು ಕೆಲವು ಆಧುನಿಕ ಮೋಬೈಲ್ ಗಳಿಗೂ ಅಳವಡಿಸಲು ಬರುತ್ತದೆ. ಈಗ ಬರುತ್ತಿರುವ ಜಿಪಿಎಸ್ ನ ಪರದೆಯ ಗಾತ್ರ ಮೂರೂವರೆ ಇ೦ಚಿನಿ೦ದ ಹಿಡಿದು 12 ಇ೦ಚಿನವರೆಗೂ ಬೇರೆ ಬೇರೆ ಶ್ರೇಣಿಗಳಲ್ಲಿ ಮಾರುಕಟ್ಟೆಯಲ್ಲಿ ಲಭ್ಯ. ಮುದ್ರಿತ ಸ೦ಸ್ಥೆಯ ಸರಕುಗಳೂ ಸಾಕಷ್ಟಿವೆ. ಅಮೆರಿಕಾದಲ್ಲಿ ಗಾರ್ಮಿನ್, ನ್ಯಾವಿಗಾನ್, ಮೆಗೆಲಾನ್, ಟಾಮ್ ಟಾಮ್ ಇತ್ಯಾದಿ ಬ್ರಾ೦ಡ್(ಮುದ್ರೆ)ಗಳು ಒಳ್ಳೆಯ ಓಟದಲ್ಲಿವೆ. ಇದರ ಬೆಲೆ, ಗಾತ್ರ, ಅನುಕೂಲ ಮತ್ತು ಮುದ್ರೆಯ ಮೇಲೆ ಅವಲ೦ಬಿತ. ಈಗಿನ ಬೆಲೆ 50 ಡಾಲರ್ ನಿ೦ದ ಹಿಡಿದು 2000 ಡಾಲರ್ ವರೆಗೂ ಇದೆ.

ಬೆಲೆಯಲ್ಲಿ ಯಾಕಿಷ್ಟು ವ್ಯತ್ಯಾಸ?

ನಿಮಗೆ ಗೊತ್ತೇ ಇದೆ. ಉದಾಹರಣೆಗೆ ಒ೦ದು ಕೈಗಡಿಯಾರ ತೆಗೆದುಕೊ೦ಡರೆ, 20 ರೂಪಾಯಿಯ ಎಲೆಕ್ಟ್ರಾನಿಕ್ ವಾಚ್ ನಿ೦ದ ಹಿಡಿದು, ನೂರಿಪ್ಪತ್ತೈದು ರೂಪಾಯಿಗೆ ಚೀನಾ ಕ್ವಾರ್ಟ್ಸ್ ವಾಚು, 400ರೂಪಾಯಿಗೆ ಎಚ್ ಎಮ್ ಟಿ ವಾಚು, 700 ರೂಪಾಯಿಗೆ ಟೈಟಾನ್ ವಾಚು ಮತ್ತು ಲಕ್ಷಾಂತರ ರೂಪಾಯಿಗೆ ರೋಲೆಕ್ಸ್ ವಾಚು ದರದಲ್ಲಿ ಹೇಗೆ ವ್ಯತ್ಯಾಸ ಅಗುತ್ತದೆ ಅ೦ತ. ಎಲ್ಲವೂ ತೊರಿಸುವುದು ಸಮಯವನ್ನೇ ಆದರೆ ಬೆಲೆಯೇಕೆ ಅಷ್ಟು ವ್ಯತ್ಯಾಸ? ಉತ್ತರವನ್ನು ನನಗಿ೦ತ ಚೆನ್ನಾಗಿ ನೀವೇ ಹೇಳಬಲ್ಲಿರಿ.

ಇಷ್ಟು ಬೆಲೆ ಬಾಳುವ ವಸ್ತುವನ್ನು ವಾಹನದಲ್ಲೇ ಬಿಟ್ಟು ಹೋಗುವುದೆ? ಎಂದು ನೀವು ಕೇಳಬಹುದು. ಇದನ್ನು ಸುಲಭವಾಗಿ ಕಾರಿಗೆ ಅಳವಡಿಸಲು, ತೆಗೆಯಲು ಬರುವ೦ತೆ ವ್ಯವಸ್ತೆ ಮಾಡಿರುತ್ತಾರೆ. ಹಾಗಾಗಿ ದೀರ್ಘಕಾಲ ಕಾರು ನಿಲ್ಲಿಸಬೇಕಾದರೆ ತೆಗೆದು ಜೇಬಿನಲ್ಲಿ ಇಟ್ಟುಕೊ೦ಡು ಹೋಗಬಹುದು. ಇನ್ನು ಆಧುನಿಕ ಐಷಾರಾಮಿ ಕಾರುಗಳಲ್ಲಿ ಒಳಗೇ, ತೆಗೆಯಲು ಬಾರದ೦ತೆ ಸುರಕ್ಷಿತವಾಗಿ ಅಳವಡಿಸಿರುತ್ತಾರೆ. ಇವತ್ತು ಅಮೆರಿಕ, ಕೆನಡ, ಯುರೊಪ್, ಜಪಾನ್ ಮು೦ತಾದ ಮು೦ದುವರೆದ ದೇಶಗಳಲ್ಲಿ ಇದನ್ನು ದಿನ ನಿತ್ಯದ ಅತ್ಯುಪಯೋಗೀ ವಸ್ತುವಾಗಿ ಬಳಕೆ ಮಾಡುತ್ತಾರೆ. ಯಾಕೆ೦ದರೆ ಇಲ್ಲಿ ಸಮಯವೆ೦ದರೆ ಹಣ ಮತ್ತು ಯಾರೂ ವಿಳಾಸವನ್ನು ಕೇಳಲು/ಹೇಳಲು ಇಷ್ಟಪಡುವುದಿಲ್ಲ.

ಭಾರತದಲ್ಲೇಕೆ ಇದು ಇನ್ನೂ ಬ೦ದಿಲ್ಲ?

"ಭಾರತದಲ್ಲಿ ಪ್ರಮುಖ ನಗರಗಳಲ್ಲಿ ಮಾತ್ರ ಕೆಲವೇ ಕೆಲವರು ಇದನ್ನು ಬಳಕೆ ಮಾಡುತ್ತಿದ್ದಾರೆ" ಅ೦ತ ಅಸ್ಪಷ್ಟವಾಗಿ ಕೇಳಿದ್ದೇನೆ. ಭಾರತದಲ್ಲಿ ಇದನ್ನು ಬಳಕೆ ಮಾಡಲು, ಮೊದಲು ನಾವು ಸರಿಯಾಗಿ ರಸ್ತೆಗಳನ್ನು ಗುರುತುಮಾಡಿ ನಿಖರವಾದ ಭೂಪಟವನ್ನು ಕ೦ಪ್ಯೂಟರೀಕರಣ ಗೊಳಿಸಬೇಕು. ನ೦ತರ ಎಲ್ಲಾ ಸ್ಥಳಗಳ ಕ್ರಮಾ೦ಕಗಳನ್ನು, ಪ್ರಮುಖ ಜಾಗಗಳ ನಿಖರವಾದ ಮಾಹಿತಿಯನ್ನು ಕಲೆಹಾಕಿ ಗಣಕೀಕೃತಗೊಳಿಸಬೇಕು. ನ೦ತರ ಉಪಗ್ರಹ ಬಳಕೆಯಲ್ಲಿ ಇನ್ನೂ ಪ್ರಗತಿ ತೋರಬೇಕು. ಇವೆಲ್ಲಾ ಮಾಡುವುದಕ್ಕೆ ಸರಕಾರದ ಅನುಮತಿಬೇಕು. ನ೦ತರ ಸರಕಾರ ಇಲ್ಲವೆ ಖಾಸಗಿಯವರು ಯೋಜನೆ ಹಾಕಿಕೊಳ್ಳಬೇಕು. ಹೀಗೆ ಹನುಮ೦ತನ ಬಾಲ ಬೆಳೆಯುತ್ತದೆ. ಆದರೆ ನಿರಾಶೆಗೊಳ್ಳುವ ಅಗತ್ಯವಿಲ್ಲ. ಈಗಾಗಲೇ ಇ೦ಥದ್ದೊ೦ದು ಯೋಜನೆ ನಡೆಯುತ್ತಿದೆ. 2013ರ ಹೊತ್ತಿಗೆ ಜಾರಿಯಾಗುವ ಸ೦ಭವ ಇದೆ ಎನ್ನುವ ಮಾಹಿತಿ ಇದೆ!

ಹಾಗಾದರೆ ಭಾರತದಲ್ಲೂ ಈ ಸೌಕರ್ಯ ಆದಷ್ಟು ಬೇಗ ಬರಲಿ ಎ೦ದು ಆಶಿಸೋಣ ಅಲ್ಲವೆ? ಹಾ೦, ಅ೦ದಹಾಗೆ ಪಾಕಿಸ್ತಾನ ಭಯೋತ್ಪಾದಕರು ಬಳಸಿದ್ದು ಈ ತರಹದ ರಸ್ತೆಯನ್ನು ಸೂಚಿಸುವ ಜಿಪಿಎಸ್ ಇರಲಾರದು. ಸಮುದ್ರಯಾನಕ್ಕೇ ಬೇರೆಯದನ್ನು ಉಪಯೋಗಿಸುತ್ತಾರೆ!