ಬಾಷ್ ಕಂಪೆನಿ ಘಟಕ ಲಾಕೌಟ್

ಬೆಂಗಳೂರು, ಮಾ 10 : ನಗರದ ನಾಗನಾಥಪುರದಲ್ಲಿರುವ ಘಟಕವನ್ನು ಮಾರ್ಚ್ 8ರಾತ್ರಿ 10 .30 ರಿಂದ ಅನ್ವಯವಾಗುವಂತೆ ಲಾಕ್ಔಟ್ ಎಂದು ಬಾಷ್ ಇಂಡಿಯಾ ಲಿಮಿಟೆಡ್ ಘೋಷಿಸಿದೆ. ಈ ಘಟಕದ ಕಾರ್ಮಿಕರ ಬೆದರಿಕೆ ಹಾಗೂ ಮುಷ್ಕರದಿಂದಾಗಿ ಯಂತ್ರ ಮತ್ತು ಸಲಕರಣೆಗಳ ಸುರಕ್ಷತೆಯ ದೃಷ್ಟಿಯಿಂದ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಆಡಳಿತ ಮಂಡಳಿ ತಿಳಿಸಿದೆ. ವಿಶ್ವದ ಪ್ರತಿಷ್ಠಿತ 25 ಆಟೋಮೋಟಿವ್ ಕಂಪೆನಿಗಳಲ್ಲಿ ಬಾಷ್ ಇಂಡಿಯಾ(ಮೈಕೋ) ಕೂಡ ಸೇರಿದೆ.

ಕಂಪೆನಿಯ ಕಾರ್ಮಿಕರು ವ್ಯವಸ್ಥಾಪಕರಿಗೆ ದೈಹಿಕ ಬೆದರಿಕೆ ಹಾಕಿ ವೇತನ ಪರಿಷ್ಕರಣೆಗೆ ಆಗ್ರಹಿಸಿ ಟೂಲ್ ಡೌನ್ ಮುಷ್ಕರ ಘೋಷಿಸಿದ್ದರು. ಈ ಮುಷ್ಕರದಿಂದಾಗಿ ಘಟಕಗಳಲ್ಲಿರುವ ಯಂತ್ರಗಳ ಸಾಮರ್ಥ್ಯಕ್ಕೆ ಹೋಲಿಸಿದರೆ ಕಳೆದ ಫೆಬ್ರವರಿ ತಿಂಗಳಲ್ಲಿ ಸುಮಾರು ಆರು ಕೋಟಿ ರೂಪಾಯಿ ಆದಾಯ ಕಡಿಮೆ ಗಳಿಸಿದೆ. ಇದರಿಂದ ಕಾರ್ಮಿಕರು ಕೂಡ ಭತ್ಯೆ ಮತ್ತು ಇತರ ಸೌಲಭ್ಯಗಳನ್ನೂ ಕಳೆದು ಕೊಂಡಿದ್ದರೂ ತಮ್ಮ ಮುಷ್ಕರವನ್ನು ಮುಂದುವರಿಸಿದ್ದರು.

ಇಲ್ಲಿನ ಘಟಕದ ಕಾರ್ಮಿಕರು ದೇಶದಲ್ಲಿರುವ ತನ್ನ ಇತರ ಘಟಕಗಳಲ್ಲಿನ ಕಾರ್ಮಿಕರಿಗಿಂತ ಅಧಿಕ ವೇತನ ಪಡೆಯುತ್ತಿದ್ದಾರೆ. ನಾಗನಾಥಪುರ ಘಟಕದ ಕಾರ್ಮಿಕನ್ನೊಬ್ಬನ ಸರಾಸರಿ ತಿಂಗಳಿಗೆ 37 ಸಾವಿರ ವೇತನ ಪಡೆಯುತ್ತಿದ್ದಾರೆ ಎಂದು ಆಡಳಿತ ಮಂಡಳಿಸ್ಪಷ್ಟೀಕರಣ ನೀಡಿದೆ.