ಇ-ಸಿಟಿ ಟೆಕ್ಕಿಗಳ ರಕ್ಷಣೆಗೆ ಸಿಐಎಸ್ಎಫ್

ಬೆಂಗಳೂರು, ಜ. 29: ಉಗ್ರರ ದಾಳಿ ಭೀತಿ ಹಿನ್ನೆಲೆಯಲ್ಲಿ ನಗರದ ಐಟಿ ಸಂಸ್ಥೆಗಳಿಗೆ ಕೈಗಾರಿಕೆಗಳಿಗೆ ಸುರಕ್ಷತೆ ನೀಡುವಲ್ಲಿ ಪರಿಣತರಾದ ಸಿಐಎಸ್ಎಫ್ ಸಿಬ್ಬಂದಿಯನ್ನು ನೇಮಿಸಲಾಗಿದೆ. ಎಲೆಕ್ಟ್ರಾನಿಕ್ ಸಿಟಿಯ ಸುಮಾರು 178 ಐಟಿ ಸಂಸ್ಥೆಗಳಿಗೆ ಸಿಐಎಸ್ಎಫ್ ಭದ್ರತಾ ವ್ಯವಸ್ಥೆಯನ್ನು ಇಂದು ಕಲ್ಪಿಸಲಾಗಿದೆ. ಯೋಧರು ದಿನದ 24 ಗಂಟೆಗಳ ಕಾಲ ಗಸ್ತು ತಿರುಗಲಿದ್ದಾರೆ.

ಇದುವರೆವಿಗೂ ಇನ್ಫೋಸಿಸ್ ಸಂಸ್ಥೆ ಮಾತ್ರ ಸಿಐಎಸ್ಎಫ್ ಭದ್ರತಾ ವ್ಯವಸ್ಥೆಯನ್ನು ಹೊಂದಿತ್ತು. ಆದರೆ, ಎಲೆಕ್ಟ್ರಾನಿಕ್ ಸಿಟಿಯ ಕೈಗಾರಿಕಾ ಸಂಘದ ಮನವಿಯ ಮೇರೆಗೆ ಸಿಐಎಸ್ಎಫ್ ಭದ್ರತೆಯನ್ನು ಒದಗಿಸಲಾಗಿದೆ. ಕ್ಷಿಪ್ತ ಕಾರ್ಯಾಚರಣೆ ಪಡೆಯನ್ನು ಹೊಂದಿರುವ ಸಿಐಎಸ್ಎಫ್ ಹಗಲು-ರಾತ್ರಿ ಲಕ್ಷಾಂತರ ಟೆಕ್ಕಿಗಳ ಜೀವ ರಕ್ಷಣೆಯ ಕಾಯಕದಲ್ಲಿ ತೊಡಗಿದ್ದಾರೆ. ಸದ್ಯ ಸಿಐಎಸ್ಎಫ್ ಭದ್ರತಾ ಪಡೆಯ 68 ಸದಸ್ಯರು ಕಾರ್ಯನಿರ್ವಹಿಸಲಿದ್ದಾರೆ. ಅಗತ್ಯಬಿದ್ದರೆ ಗಸ್ತು ತಿರುಗಲು ಹೆಚ್ಚಿನ ಸಿಬ್ಬಂದಿಯನ್ನು ನಿಯೋಜಿಸಲಾಗುವುದು ಎಂದು ಹಿರಿಯ ಅಧಿಕಾರಿಗಳು ಹೇಳಿದ್ದಾರೆ.