ಜಮ್ಮುವಿನಲ್ಲಿ ಪಾಕ್‌ ಗುಂಡಿನ ದಾಳಿಗೆ 9 ತಿಂಗಳ ಕೂಸು ಸೇರಿ ಮೂವರ ಬಲಿ

ಜಮ್ಮು ಮತ್ತು ಕಾಶ್ಮೀರ, ಮಾರ್ಚ್ 2: ಪಾಕ್‌ನಲ್ಲಿ ಸಿಲುಕಿದ್ದ ವಿಂಗ್ ಕಮಾಂಡರ್ ಅಭಿನಂದನ್ ವರ್ಧಮಾನ್ ಅವರು ಭಾರತಕ್ಕೆ ಬಂದಿರುವ ಸಂಭರಮದಲ್ಲಿದ್ದರೆ ಇನ್ನೊಂದೆಡೆ ಗಡಿ ನಿಯಂತ್ರಣ ರೇಖೆ ಬಳಿ ಪಾಕಿಸ್ತಾನ ಮತ್ತೆ ಬಾಲ ಬಿಚ್ಚಿದೆ.

ಗಡಿನಿಯಂತ್ರಣ ರೇಖೆ ಬಳಿ ಪಾಕಿಸ್ತಾನದ ಪುಂಡಾಟ ಮುಂದುವರಿದಿದೆ. ರಜೌರಿ, ಪೂಂಚ್​ ಮತ್ತು ಮೇಂದಾರ್​ ವಲಯಗಳಲ್ಲಿ ಪಾಕ್​ ಯೋಧರು ಗುಂಡಿನ ದಾಳಿ ಮುಂದುವರಿಸಿದ್ದಾರೆ. ನಾಗರಿಕ ವಸತಿ ಪ್ರದೇಶದ ಮೇಲೆ ಶೆಲ್​ ದಾಳಿ ಮಾಡುತ್ತಿದ್ದಾರೆ.

ರುಬಾನಾ ಕೌಸರ್​ (24), ಫಜಾನ್​ (5) ಮತ್ತು ಶಬನಂ (9 ತಿಂಗಳ ಮಗು) ಮೃತರು. ರುಬಾನಾ ಕೌಸರ್​ ಪತಿ ಮೊಹಮ್ಮದ್​ ಯೂನಿಸ್​ ಗಂಭೀರವಾಗಿ ಗಾಯಗೊಂಡಿದ್ದಾರೆ.

ಮನ್​ಕೋಟ್​ನಲ್ಲಿ ನಸೀಂ ಅಖ್ತರ್​ ಎಂಬ ಮಹಿಳೆಗೂ ಪಾಕ್​ ಯೋಧರು ಸಿಡಿಸಿದ ಗುಂಡು ತಗುಲಿ ಗಂಭೀರವಾಗಿ ಗಾಯಗೊಂಡಿದ್ದಾಳೆ. ಇದಲ್ಲದೆ ಕೃಷ್ಣಘಾಟಿ ಮತ್ತು ಬಾಲಕೋಟ್​ ಪ್ರದೇಶದಲ್ಲಿ ಕೂಡ ಪಾಕ್​ ಯೋಧರು ಅಪ್ರಚೋದಿತ ಗುಂಡಿನ ದಾಳಿ ಮುಂದುವರಿಸಿದ್ದಾರೆ ಎನ್ನಲಾಗಿದೆ.

ಜಮ್ಮು ಮತ್ತು ಕಾಶ್ಮೀರದ ಪೂಂಚ್​ ಜಿಲ್ಲೆಯ ನಾಗರಿಕ ವಸತಿ ಪ್ರದೇಶದ ಮೇಲೆ ತೀವ್ರತರದ ದಾಳಿ ನಡೆಸಿದ ಪಾಕ್​ ಯೋಧರು, ಮಾರ್ಟಾರ್​ ಬಾಂಬ್​ಗಳನ್ನು ಸಿಡಿಸುತ್ತಿದ್ದಾರೆ. ಹೋವಿಟ್ಜರ್​ 105 ಎಂಎಂ ಸೇರಿ ಭಾರಿ ಗನ್​ಗಳನ್ನು ಬಳಸಿ ಗುಂಡಿನ ಸುರಿಮಳೆಗೈಯ್ಯುತ್ತಿದ್ದಾರೆ.

ಈ ದಾಳಿಯಲ್ಲಿ ಪೂಂಚ್​ನ ಸಲ್ಟೋರಿ ಎಂಬಲ್ಲಿ 9 ತಿಂಗಳ ಹೆಣ್ಣು ಮಗು, 5 ವರ್ಷದ ಬಾಲಕ ಹಾಗೂ ಒಬ್ಬ ಮಹಿಳೆ ಸೇರಿ ಒಂದೇ ಕುಟುಂಬದ ಮೂವರು ಮೃತಪಟ್ಟಿದ್ದಾರೆ ಎನ್ನುವ ಮಾಹಿತಿ ಲಭ್ಯವಾಗಿದೆ.

English summary

Three members of a family were killed and some others injured in shelling by Pakistan troops along the Line of Control (LoC) in Salotri area of Jammu and Kashmir’s Poonch district late on Friday night.