ದಾವಣಗೆರೆ : ಕಾಂಗ್ರೆಸ್ ಗೆ ಬೆಣ್ಣೆ, ಬಿಜೆಪಿಗೆ ಸುಣ್ಣ

ದಾವಣಗೆರೆ, ಮೇ 9 : ಟಿಕೆಟ್ ಹಂಚಿಕೆ ವಿಚಾರದಿಂದಲೇ ರಾಜ್ಯದ ಜನರ ಗಮನ ಸೆಳೆದಿದ್ದ ದಾವಣಗೆರೆ ಜಿಲ್ಲೆಯಲ್ಲಿ ಕಾಂಗ್ರೆಸ್ ತನ್ನ ಪ್ರಾಬಲ್ಯ ಮೆರೆದಿದೆ. ಜೆಡಿಎಸ್ ಪಕ್ಷಕ್ಕೆ ಒಂದು ಕ್ಷೇತ್ರವನ್ನು ಬಿಟ್ಟುಕೊಟ್ಟು, ಜಿಲ್ಲೆಯಲ್ಲಿ ಕಮಲದ ಹೂ ಅರಳದಂತೆ ಮಾಡುವಲ್ಲಿ ಕೈ ನಾಯಕರು ಯಶಸ್ವಿಯಾಗಿದ್ದಾರೆ.

ಜಿಲ್ಲೆಯ ನಾಲ್ವರು ಶಾಸಕರು ಬಿಜೆಪಿ ಬಿಟ್ಟು ಕೆಜೆಪಿ ಸೇರಿದ್ದರು. ಆದರೆ, ಯಾವ ಅಭ್ಯರ್ಥಿಗಳು ಗೆಲುವು ಸಾಧಿಸಿಲ್ಲ ಎಂಬುದು ಗಮನಾರ್ಹ. ಹರಪನಹಳ್ಳಿ ಕ್ಷೇತ್ರದಲ್ಲಿ ಸಜ್ಜನ ರಾಜಕಾರಣಿ ದಿ.ಎಂ.ಪಿ.ಪ್ರಕಾಶ್ ಪುತ್ರ ಎಂ.ಪಿ.ರವೀಂದ್ರ ಮಾಜಿ ಸಚಿವ ಜಿ.ಕರುಣಾಕರ ರೆಡ್ಡಿ ಅವರಿಗೆ ಸೋಲುಣಿಸಿದ್ದಾರೆ.

ದಾವಣಗೆರೆ ನಗರದಲ್ಲಿ ಕೆಪಿಸಿಸಿ ಖಜಾಂಚಿ ಶಾಮನೂರು ಶಿವಶಂಕರಪ್ಪ ಮತ್ತು ಅವರ ಪುತ್ರ ಎಸ್.ಎಸ್.ಮಲ್ಲಿಕಾರ್ಜುನ್ ದಕ್ಷಿಣ ಮತ್ತು ಉತ್ತರ ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಿದ್ದು, ಅಪ್ಪ-ಮಗ ಇಬ್ಬರು ವಿಧಾನಸಭೆ ಪ್ರವೇಶಿಸಲಿದ್ದಾರೆ. ಕೊನೆಯ ಹಂತದಲ್ಲಿ ಟಿಕೆಟ್ ಪಡೆದ ಶಾಮನೂರು ಪುತ್ರ ಗೆಲುವಿನ ನೆಗೆ ಬೀರಿದ್ದಾರೆ.

ಮಾಜಿ ಸಚಿವ ಎಂ.ಪಿ.ರೇಣುಕಾಚಾರ್ಯ, ಹರಿಹರ ಮಾಜಿ ಶಾಸಕ ಬಿ.ಪಿ.ಹರೀಶ್, ಜಗಳೂರು ಮಾಜಿ ಶಾಸಕ ಎಸ್.ವಿ.ರಾಮಚಂದ್ರ, ಚನ್ನಗಿರಿ ಮಾಜಿ ಶಾಸಕ ಮಾಡಾಳು ವಿರೂಪಾಕ್ಷಪ್ಪ ಮುಂತಾದ ನಾಯಕರು ಬಿಜೆಪಿ ತೊರೆದು ಕೆಜೆಪಿ ಸೇರಿದ್ದರು. ಆದರೆ, ಯಾವ ನಾಯಕರು ಚುನಾವಣೆಯಲ್ಲಿ ಜಯಗಳಿಸಿಲ್ಲ.

ಬಿಜೆಪಿ ಶಾಸಕರಾಗಿ ತೋಟಗಾರಿಕಾ ಸಚಿವರಾಗಿದ್ದ ದಾವಣಗೆರೆ ಉತ್ತರ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಎಸ್.ವಿ.ರವೀಂದ್ರನಾಥ್ ಅವರಿಗೆ ಎಸ್.ಎಸ್.ಮಲ್ಲಿಕಾರ್ಜುನ್ ಸೋಲಿನ ರುಚಿ ತೋರಿಸಿದ್ದಾರೆ. 20ಕ್ಕೂ ಹೆಚ್ಚು ಸ್ಪರ್ಧಿಗಳಿದ್ದ ಮಾಯಕೊಂಡ ಮೀಸಲು ಕ್ಷೇತ್ರ ಸಹ ಬಿಜೆಪಿ ಕೈ ತಪ್ಪಿದೆ.

ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿಯೂ ದಾವಣಗೆರೆ ಮಹಾನಗರ ಪಾಲಿಕೆಯಲ್ಲಿ ಒಂದು ಸ್ಥಾನವನ್ನು ಪಡೆಯಲು ಬಿಜೆಪಿ ವಿಫಲವಾಗಿತ್ತು. ಅದೇ ಫಲಿತಾಂಶ ವಿಧಾನಸಭೆ ಚುನಾವಣೆಯಲ್ಲಿಯೂ ಬಂದಿದ್ದು, ಜಿಲ್ಲೆಯಲ್ಲಿ ಕಮಲ ಅರಳಲು ವಿಫಲವಾಗಿದೆ.

ದಾವಣಗೆರೆ ಜಿಲ್ಲೆ ವಿಧಾನಸಭಾ ಕ್ಷೇತ್ರಗಳಲ್ಲಿ : ಗೆದ್ದವರು, ಸೋತವರ ವಿವರ ಹೀಗಿದೆ:

ಕ್ಷೇತ್ರ	ಗೆದ್ದವರು	ಪಕ್ಷ	ಪಡೆದ ಮತಗಳು	ಸೋತವರು	ಪಕ್ಷ	ಪಡೆದ ಮತಗಳು
ದಾವಣಗೆರೆ (ದಕ್ಷಿಣ)	ಶಾಮನೂರು ಶಿವಶಂಕರಪ್ಪ	ಕಾಂಗ್ರೆಸ್	66,320	ಸೈಯದ್ ಸೈಫುಲ್ಲಾ	ಜೆಡಿಎಸ್	26,162
ದಾವಣಗೆರೆ (ಉತ್ತರ)	ಎಸ್.ಎಸ್.ಮಲ್ಲಿಕಾರ್ಜುನ್	ಕಾಂಗ್ರೆಸ್	87,521	ಎಸ್.ವಿ.ರವೀಂದ್ರನಾಥ್	ಬಿಜೆಪಿ	30,639
ಜಗಳೂರು	ಎಚ್.ಪಿ.ರಾಜೇಶ್	ಕಾಂಗ್ರೆಸ್	77,805	ಎಸ್.ವಿ.ರಾಮಚಂದ್ರ	ಕೆಜೆಪಿ	40,915
ಹರಿಹರ	ಎಚ್.ಎಸ್.ಶಿವಶಂಕರ್	ಜೆಡಿಎಸ್	59,666	ಎಸ್.ರಾಮಪ್ಪ	ಕಾಂಗ್ರೆಸ್	40,613
ಮಾಯಕೊಂಡ (ಮೀಸಲು)	ಶಿವಮೂರ್ತಿ ನಾಯಕ್	ಕಾಂಗ್ರೆಸ್	32,435	ಪ್ರೊ.ಲಿಂಗಣ್ಣ	ಕೆಜೆಪಿ	31,741
ಚನ್ನಗಿರಿ	ವಡ್ನಾಳ್ ರಾಜಣ್ಣ	ಕಾಂಗ್ರೆಸ್	53,355	ಮಾಡಾಳು ವಿರೂಪಾಕ್ಷಪ್ಪ	ಕೆಜೆಪಿ	51,582
ಹೊನ್ನಾಳಿ	ಡಿ.ಜಿ.ಶಾಂತನಗೌಡ	ಕಾಂಗ್ರೆಸ್	78,789	ಎಂ.ಪಿ.ರೇಣುಕಾಚಾರ್ಯ	ಕೆಜೆಪಿ	60,051
ಹರಪನಹಳ್ಳಿ	ಎಂ.ಪಿ.ರವೀಂದ್ರ	ಕಾಂಗ್ರೆಸ್	56,525	ಕರುಣಾಕರ ರೆಡ್ಡಿ	ಬಿಜೆಪಿ	48,427

English summary

Karnataka assembly Election Results. Here is complete information about winners and losers with their constituencies and party of Davanagere district. Senior Congress leader Shamanur Shivashankarappa showed his power in district. BJP could not get single seat in hole district.