ಎರಡು ಪದ್ಯ : ಮಕ್ಕಳಿಗೂ, ಮಕ್ಕಳಂಥವರಿಗೂ

• ಚಂದ್ರಗೌಡ ಕುಲಕರ್ಣಿ, ಕಡದಳ್ಳಿ, ತಾಳೀಕೋಟೆ
  [email protected]

ಅಕ್ಷರವು ಮೂರುಂಟು
ಕುಳಿತಾವ ಅಡಗಿ!
ಅರ್ಥವನು ಹೇಳ್ಯಾವ
ಹಿರಿದಾದ ಗಡಿಗಿ !

ಶಿವನೆಂದು ನೂಡಿತಾವ
ಒಂದ್‌-ಎರಡು ಸೇರಿ !
ದಿನಕರನ ಕರಿತಾವ
ಕೊನೆಯೆರಡು ಸೇರಿ !

ಒಂದನೆಯ ಅಕ್ಷರಕೆ
ಕೊನೆದೊಂದು ಕೂಡಿ !
ಯಜ್ಞಕ್ಕೆ ಕೊಡುವಂಥ
ತುಪ್ಪವದು ನೋಡಿ !

ತಿಮ್ರುವು ಮಡ್ದ್ಯಾಗ
ಅಗಲಿಕೆಯ ಅರ್ಥ !
ಪದ ಹುಡುಕಿ ಕೊಡಬೇಕು
ಜಾಣರೆ ತುರ್ತ !

***

ಹಾಲಹಸುಳೆ

ಎಳೆಯ ಕಂಗಳ ಹೊಳೆವ ನೋಟಕೆ
ಚಂದ್ರಕಳೆ ಸಮ ಬಾರದು !
ಹಾಲ ಹಸುಳೆಯ ಜೋಲು ಜೊಲ್ಲಿಗೆ
ಜೇನು ಹನಿ ಸಮವೆನಿಸದು !

ಮಧುರ ಕಂಠದ ಇಂಪು ಗಾನವ
ಕೇಳಿ ಕೋಗಿಲೆ ಹಾಡದು !
ಉಲಿವ ಗೆಜ್ಜೆಯ ಬೆಡಗಿನಾಟಾವ
ನೋಡಿ ನವಿಲು ಕುಣಿಯದು !

ತುಂಟ ಭಾವದ ಅರಳು ನಗುವಿಗೆ
ಹೂಚೆಲುವು ಸಮದೋರದು !
ತೊದಲು ನುಡಿಯನು ಕೇಳಿ ಗಿಳಿಯು
ಮೌನ ತಾಳಿ ಬಿಡುವುದು !

ಚಂದ್ರ ಕೋಗಿಲೆ ಜೇನು ಹೂ ಗಿಳಿ
ನವಿಲು ಒಟ್ಟಿಗೆ ಸೇರಿಯೆ !
ಪುಟ್ಟಕಂದನ ಮೇಲೆ ಸ್ಪರ್ಧೆಯ
ಹೂಡಿ ತಾವೆ ಸೋತಿವೆ !

ಮುಖಪುಟ / ಸಾಹಿತ್ಯ-ಸಂಸ್ಕೃತಿ