• search
  • Live TV
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ಸಿಕೇಡಾಯನ(Autobiography of a Cicada)

By Staff
|
ಸಿಕೇಡಾಯನ

(Autobiography of a Cicada)

H.K. Ramapriyan Autobiography of a Cicada
  • ಹಂ. ಕ. ರಾಮಪ್ರಿಯನ್‌

ಕ್ಲಾರ್ಕ್ಸ್‌ವಿಲ್‌, ಮೇರಿಲೆಂಡ್‌

ramapriya@direcway.com

ಅಮೇರಿಕದ ಪೂರ್ವದಲ್ಲಿರುವ ಕೆಲವು ದೇಶಗಳಲ್ಲಿ ಈ ವರ್ಷದ (2004ರ) ಮೇ ತಿಂಗಳ ಮಧ್ಯದಲ್ಲಿ ‘ಸಿಕೇಡಾ’ ಎಂಬ ಹುಳುಗಳು ಹೊರಬಂದು 2-3 ವಾರಗಳು ಬಹಳ ಶಬ್ದ ಮಾಡುತ್ತ ಬದುಕಿದ್ದು ನಂತರ ಹೋಗಿಬಿಡುತ್ತವೆ. ಇಲ್ಲಿ ಸಿಕೇಡಾಗಳು ಈ ರೀತಿ 17 ವರ್ಷಗಳಿಗೊಮ್ಮೆ ಬರುತ್ತವೆ. ನೋಡುವುದಕ್ಕೆ ಸ್ವಲ್ಪ ನಮ್ಮೂರಿನ (ಬೆಂಗಳೂರ) ದೊಡ್ಡ ಜಿರಳೆಗಳಂತಿದ್ದು ಇನ್ನೂ ದೊಡ್ಡದಾಗಿರುತ್ತವೆ. ಅವುಗಳಲ್ಲೊಂದು ಹೇಳಿಕೊಂಡ ಆತ್ಮಕಥೆಯೇ ಈ ಕವನ. (‘ಅದಕ್ಕೆ ಕನ್ನಡ ಹೇಗೆ ಗೊತ್ತು ?’ ಎಂದು ಕೆಲವರು ಕೇಳಬಹುದು. ಅದಕ್ಕೆ ಉತ್ತರ - ‘ಅದಕ್ಕೆ ಇಂಗ್ಲಿಷ್‌ ಎಷ್ಟು ಚೆನ್ನಾಗಿ ಬರುತ್ತದೋ ಅಷ್ಟೇ ಚೆನ್ನಾಗಿ ಕನ್ನಡವೂ ಬರುತ್ತದೆ.’)

ಹದಿನೇಳು ವರುಷಗಳ ಹಿಂದೆನ್ನ ತಾಯ್ತಂದೆ ಜನುಮವನ್ನೆನಗಿತ್ತು

ಮೊಟ್ಟೆಯಾಗಿದ್ದೆನ್ನ ಪುಟ್ಟವೃಕ್ಷದ ಕಾಂಡ ಕೊರೆಯುತ್ತಲವಿತಿಟ್ಟು ।

ನೂರಾರು ಸೋದರರ ಸೋದರಿಯರನ್ನವರು ಮರಗಳಲಿ ಹುದುಗಿಟ್ಟು

ಎಮ್ಮ ಪೀಳಿಗೆಯಿಂತು ಬೆಳೆಯುತಿರಲೆನ್ನುತಲಿ ಮುಚ್ಚಿದರು ಕಣ್ಗಳನು ।।1।।

ಎಂಟು ವಾರಗಳಲ್ಲಿ ಕಿರಿಯಿರುವೆಯಷ್ಟಾಗಿ ನೆಲದಲ್ಲಿ ನಾ ಬಿದ್ದೆ

ದಂಟಿನೆಳೆಗಿಂತಲೂ ತೆಳ್ಳಗಿಹ ಬಿಲವ ನಾ ಭೂಮಿಯಲಿ ಕೊರೆದಿದ್ದೆ ।

ಇಂತು ಒಂದಡಿಯಿಳಿದು ಕತ್ತಲಲಿ ಮನೆ ಮಾಡಿ ಬಲು ವರುಷ ನೆಲೆಸಿದ್ದೆ

ಸಂತತವು ಬೇರುಗಳ ರಸವ ಹೀರುತಲಲ್ಲಿ ಸುಖದಿಂದ ಬೆಳೆದಿದ್ದೆ ।।2।।

ಶೈಶವದಿ ಬಾಲ್ಯದಲಿ ಮೆರೆಯುತ್ತ ಬಂದಿರಲು ಬಿಲದಲ್ಲೆ ನಾನಿಂತು

ಒಂದು ದಿನ ಕನಸಿನಲಿ ಜನನಿಜನಕರು ಬಂದು ಹೇಳಿದರು ನನಗಿಂತು ।

‘ಎದ್ದೇಳೊ ಮತ್ತೆಷ್ಟು ದಿನವಿಲ್ಲಿ ಕತ್ತಲಲಿ ನಿದ್ರಿಸುತ ನೀನಿರುವೆ?

ಎಂದು ನೀ ಹೊರಹೊರಟು ವಂಶವರ್ಧಕನಾಗಿ ಮೊಮ್ಮಕ್ಕಳನು ತರುವೆ?’ ।।3।।

ಇದ ಕೇಳುತಿರಲೆನಗೆ ಹೊಸಹರೆಯದರಿವಾಗಿ ಬಿಲದಿಂದ ಹೊರಬಂದೆ

‘ಇದುವೆಂಥ ಸೋಜಿಗವೊ ರೆಕ್ಕೆಗಳು ಹುಟ್ಟಿರುವುವೆನ್ನ ದೇಹದೊಳ್‌’+ಎಂದೆ ।

ಅತ್ತಿತ್ತ ನೋಡುತಲಿ ರೆಕ್ಕೆಗಳನಲುಗಿಸುತ ಮೆಲ್ಲಮೆಲ್ಲನೆ ಹಾರಿ

ಮತ್ತಷ್ಟು ಬಂಧುಗಳನೊಡಗೂಡಿ ಕುಳಿತೆ ನಾ ಮರದ ಕೊಂಬೆಯನೇರಿ ।।4।।

ಒಂದೆಕರೆ ಕಾಡಿನಲಿ ದಶಲಕ್ಷ ನಮ್ಮವರು ಮರಗಳಲಿ ಕುಳಿತಿರಲು

‘ಇಂದು ಸಿಕ್ಕಿಹುದೆಮಗೆ ಔತಣವು’ ಎನ್ನುತಲಿ ಹಕ್ಕಿಗಳು ಬಳಿ ಬರಲು ।

‘ಕೀಚು ಕೀಚ್‌’ ಎಂದೆನುತಲುತ್ಕಂಠಘೋಷವನು ನಾವೆಲ್ಲ ಮಾಡಿದೆವು

ಮುಚ್ಚಲಾಗದೆ ಕಿವಿಯ ಹಕ್ಕಿಗಳು ಬೆದರುತಲಿ ದೂರಕ್ಕೆ ಚೆದುರಿದವು ।।5।।

ನನ್ನ ಕೀರಲು ದನಿಯು ಸಂತತವು ಕಾಡಿನಿಂ ತಾರದಲಿ ಹೊಮ್ಮುತಿರೆ

ಅನ್ಯಜೀವಿಗಳೆಲ್ಲ ಕೇಳಲಿದು ಬಲು ಕಠಿನ ಕರ್ಕಶವಿದೆನ್ನುತಿರೆ ।

ಎನ್ನ ಹಾಡನು ಮೆಚ್ಚಿ ಚೆಲುವೆಯಾಬ್ಬಳು ಬಂದಳಾದಳೆನ್ನಯ ಮಡದಿ

ಗಂಡು ಕತ್ತೆಯ ಹಾಡ ಕೇಳಿ ಮೆಚ್ಚುತ ಬಂದ ಹೆಣ್ಣು ಕತ್ತೆಯ ತೆರದಿ ।।6।।

ಸಗ್ಗವಿದುವೆಂದೆಣಿಸಿ ಕೆಲವೆ ದಿನ ನಲಿದಿರಲು ಚೆಲುವೆಯಾ ಸಂಗದಲಿ

ಹಿಗ್ಗ ಬಿಡಬೇಕೆನುವ ಸಮಯವಾಯಿತು ಬೇಗ ಜೀವನದ ರಂಗದಲಿ ।

ಎನ್ಮಡದಿ ನೂರಾರು ಮೊಟ್ಟೆಗಳನಿಟ್ಟಿಹಳು ಹುದುಗುವೆಡೆ ಹುಡುಕುತಲಿ

ಜನ್ಮ ಸಾರ್ಥಕವಾಯ್ತು ಬಿಟ್ಟು ಹೋಗುವೆವೀಗ ಕಣ್ಗಳನು ಮುಚ್ಚುತಲಿ ।।7।।

ಮುಖಪುಟ / ಎನ್‌ಆರ್‌ಐ

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more