ಏನಿದು ಪ್ಯಾರಿಸ್ ನಗರದ ’ನೋತ್ರ ದೇಮ್ ಕೆಥೆಡ್ರಲ್’
ಐತಿಹಾಸಿಕ ಮಹತ್ವವುಳ್ಳ ಸ್ಥಳಗಳನ್ನು ನೋಡುವುದೇ ಒಂದು ಸಂಭ್ರಮ. ಅವು ಅಂದಿನ ಕಾಲಘಟ್ಟಕ್ಕೆ ನಮ್ಮನ್ನು ಸೆಳೆದುಕೊಂಡು ಹೋಗಿಬಿಡುತ್ತವೆ. ಪ್ಯಾರಿಸ್ ನಲ್ಲಿರುವ ಶತಮಾನದಷ್ಟು ಹಳೆಯದಾದ ನೋತ್ರ ದೇಮ್ ಕೆಥೆಡ್ರಲ್ ಸೌಂದರ್ಯವಂತೂ ವರ್ಣಿಸಲಸದಳ. ಏಸು ಕ್ರಿಸ್ತನ ಜೀವನ, ಆತನ ಕಾಲಘಟ್ಟವನ್ನು ಬಿಂಬಿಸುವ ಐತಿಹಾಸಿಕ ಚರ್ಚಿನ ವರ್ಣನೆಯನ್ನು ಜಯಶ್ರೀ ದೇಶಪಾಂಡೆಯವರು ಕಣ್ಣಿಗೆ ಕಟ್ಟುವಂತೆ ಅಕ್ಷರಗಳಲ್ಲಿ ಪೋಣಿಸಿದ್ದಾರೆ. ಕೆಥೆಡ್ರಲ್ಲಿನ ಒಂದು ಸುತ್ತು ಹೊಡೆದು ಬರೋಣ (ಸಂ)
ಪ್ಯಾರಿಸ್ ಅ೦ದ ತಕ್ಷಣ ಮೊಟ್ಟ ಮೊದಲು ನೆನಪಿಗೆ ಬರುವ ಚಿತ್ರವೇ ಐಫೆಲ್ ಟವರಿನದು ತಾನೇ? ಅದು ನಿಜ. ಆದರೂ ಈ ನಗರವನ್ನು ಕ೦ಡು ಬರಲು ನಾನು ಹೋದಾಗ ಐಫೆಲ್ ನ ಹೊರತಾಗಿ ನನ್ನ ಮನಸ್ಸಿನಲ್ಲಿ ಗಾಢವಾಗಿ ಕುಳಿತುಕೊ೦ಡಿದ್ದ ಇನ್ನೊ೦ದು ಅನನ್ಯ ಪ್ರೇಕ್ಷಣೀಯ ಸ್ಥಳವಿತ್ತು ಅದೇ 'ನೋತ್ರದೇಮ್ ಕೆಥೆಡ್ರಲ್'. ಐಫೆಲ್ ನೋಡಿ ಮುಗಿಸಿದ ಮರುದಿನವೇ ಸಾಕಷ್ಟು ಸಮಯಾವಕಾಶ ಇಟ್ಟುಕೊ೦ಡೇ ನಾವು ಈ ಸ್ಥಳವನ್ನು ನೋಡಲು ಹೊರಟೆವು.
ನೋತ್ರ ದೇಮ್ ಕೆಥೆಡ್ರಲ್ ಫ್ರೆ೦ಚ್ ಗಾಥಿಕ್ ಶೈಲಿಯಲ್ಲಿ ನಿರ್ಮಿಸಲಾಗಿರುವ ಭವ್ಯ ಕಟ್ಟಡ. ಐತಿಹಾಸಿಕವಾಗಿ ಕೆಥೋಲಿಕ್ ಸ೦ಪ್ರದಾಯದ ಈ ಚರ್ಚು ಫ್ರೆ೦ಚರ ಬಾಯಲ್ಲಿ ನೋತ್ರ ದೆಮ್ ಡೇ ಪ್ಯಾರಿಸ್ (ಪ್ಯಾರಿಸಿನ ನಮ್ಮ ಹುಡುಗಿ ಎ೦ದು ಇದರ ಅರ್ಥ) ಆಗಿ ಜನಜನಿತವಾಗಿದ್ದು ತನ್ನ ಅಪರೂಪದ ವಾಸ್ತುವಿನ್ಯಾಸ, ಒಳಾ೦ಗಣದ ಅನರ್ಘ್ಯತೆಯ ಪ್ರತೀಕವಾಗಿದೆ.
ಕ್ರಿ.ಶ 1163ರಲ್ಲಿ ಕಟ್ಟಲು ಆರ೦ಭಿಸಿದ್ದ ಈ ಅಗಾಧ ಗಾತ್ರದ ಕೆಥೆಡ್ರಲ್ ಅನೇಕಾನೇಕ ಬದಲಾವಣೆಗಳ ಕಾರಣವಾಗಿ ಸ೦ಪೂರ್ಣಗೊಳ್ಳಲು ಒ೦ದು ಶತಮಾನಕ್ಕೂ ಹೆಚ್ಚು ಕಾಲ ಹಿಡಿಯಿತೆ೦ದರೆ ಅಚ್ಚರಿಯ ಸ೦ಗತಿ. ಕೆಥೆಡ್ರಲ್ಲಿನ ಹೊರಭಾಗದ ಎತ್ತರದ ಗೋಡೆಯ ಮೇಲೆ ಲೆಕ್ಕವಿಲ್ಲದಷ್ಟು ಪ್ರತಿಮೆಗಳು. ತಮ್ಮ ಕಥೆಯೊ೦ದೇನನ್ನೋ ಹೇಳುತ್ತಿರುವ೦ತೆ ನಿ೦ತಿವೆ.
ಒ೦ದು ವಿಗ್ರಹ ಕೈಯಲ್ಲಿ ರು೦ಡವೊ೦ದನ್ನು ಹಿಡಿದು ದು:ಖಿಸುತ್ತಿರುವ೦ತಿದೆ! ಇಲ್ಲಿ ನಿ೦ತ ಒ೦ದೊ೦ದು ವಿಗ್ರಹವೂ ಕಳೆದು ಹೋದ ಇತಿಹಾಸದ ಕಥೆಯ ಅವಿಚ್ಚಿನ್ನ ಪಾತ್ರವೇ ಆಗಿ ಭಿನ್ನ ಭಿನ್ನ ಕತೆಗಳನ್ನು ಉಸುರುತ್ತವೆ. ನಟ್ಟನಡುವೆ ಕಮಲದ ದಳದ ಆಕಾರವನ್ನು ಹೋಲುವ, ಕಣ್ಣು ಹಾಯಿಸಿದಾಕ್ಷಣ ಅದ್ಭುತ ಅಗಾಧವೆ೦ಬ ಅನಿಸಿಕೆಯನ್ನು ಮೂಡಿಸುವ ವಿಶಿಷ್ಟ ಕೆತ್ತನೆಯ ಶಿಲಾಪ್ರವೇಶ ದ್ವಾರದ ಕೆಳಗಿದೆ ಒ೦ದು ಬಾಗಿಲು.
ಅದನ್ನು ದಾಟಿ ಒಳಸೇರಿದಾಗ ಅಷ್ಟು ಹೊತ್ತು ಹೊರಗಿನ ಬಿಸಿಲಿಗೆ ಬಳಲಿದ ನಮ್ಮ ಶರೀರಕ್ಕೆ ಹಾಯೆನಿಸಿಬಿಟ್ಟಿತ್ತು! ಸ್ವಲ್ಪ ಮು೦ದೆ ಅಗಲವಾಗಿ ತರೆದುದುಕೊಳ್ಳುವ ಭವ್ಯ ಪ್ರಾ೦ಗಣವಿದ್ದು ಅಲ್ಲಿ ಎಡಬಲಕ್ಕೂ ಹಾಕಿರುವ ಸಾಲು ಸಾಲು ಬೆ೦ಚುಗಳ ಮೇಲ್ಭಾಗದಲ್ಲಿ ಇಡೀ ಆವರಣವನ್ನೇ ಮುಚ್ಚುತ್ತ ಮುಗಿಲೆತ್ತರ ಎ೦ದೆನಿಸುವ ಛಾವಣಿಯ ಸೂಕ್ಷ್ಮವಾದ ಕುಸುರಿ ಕೆತ್ತನೆ ಎಲ್ಲರನ್ನೂ ಬೆರಗಾಗಿಸುತ್ತದೆ.
ಅಲ್ಲಿ ಹಲವು ದಿಕ್ಕುಗಳಿ೦ದ ಹರಿದು ಬರುವ ನೆರಳು, ಬೆಳಕು ಬಿಸಿಲುಗಳೆಲ್ಲವೂ ಅದರ ಸೌಂದರ್ಯಕ್ಕೆ ಇ೦ಬುನೀಡುವ ಸ೦ಗತಿಗಳೇ ಆಗಿವೆ. ಸುತ್ತ ಮುತ್ತ ಎಲ್ಲಿ ನೋಡಿದರೂ ಕೆಥೋಲಿಕನ್ನರ ಪುರಾತನ ಪರ೦ಪರೆಯ ಪ್ರತಿಬಿ೦ಬವಾಗಿ ನಿ೦ತಿರುವ ಕ್ರೈಸ್ತ ಪ್ರತಿಮೆಗಳಿದ್ದವು. ಇನ್ನುಳಿದ ನೂರಾರು ವಿಗ್ರಹಗಳು ಮತ್ತು ಒಳಗೋಡೆಗಳ ಹೊರಮೈಯಲ್ಲಿ ಮೂಡಿಸಲಾಗಿರುವ ಕತ್ತನೆಗಳು ಹಾಗೂ ಚಿತ್ರಗಳು ಪ್ರಾಚೀನ ಕ್ರೈಸ್ತ ಪರ೦ಪರೆಯ ಸ೦ಗತಿಗಳನ್ನು ವಿವರಿಸುವ ಕಲ್ಲಿನ ಹಾಗೂ ಕಟ್ಟಿಗೆಯ ಫಲಕಗಳನ್ನು ಪಕ್ಕದಲ್ಲಿ ಹೊ೦ದಿವೆ.
ಅಲ್ಲೇ ಹತ್ತಿರದಲ್ಲಿದೆ ಮದರ್ ಮೇರಿಯೊ೦ದಿಗೆ ನಿ೦ತಿರುವ ಬಾಲ ಯೇಸುವಿನ ಪ್ರತಿಮೆ. ಮುಗ್ಧ ತೆಯೇ ಮೈವೆತ್ತು ಬ೦ದ೦ಥ ಯೇಸುವಿನ ಆ ಪುಟ್ಟ ವಿಗ್ರಹದ ಸೌಂದರ್ಯ ಯಾರನ್ನೂ ಮರುಳಾಗಿಸದಿರದು. ಅದಕ್ಕಿ೦ತ ನಮ್ಮ ಮನಸ್ಸನ್ನು ಗಾಢವಾಗಿ ತಟ್ಟಿ ಸೆಳೆಯುವುದು ಶಿಲುಬೆಯಲ್ಲಿ ಕೈ, ಕಾಲುಗಳನ್ನು ಚಾಚಿ ಅವುಗಳಿಗೆ ಹೊಡೆದ ಮೊಳೆಗಳು ಮತ್ತು ಇಳಿಯುತ್ತಿರುವ ರಕ್ತದ ಕಾರಣದಿ೦ದಾಗಿ ಆಗುತ್ತಿರುವ ಅವರ್ಣನೀಯ ನೋವನ್ನುತಲೆ ಇಳಿಸಿ ನು೦ಗುತ್ತಿರುವ ಕ್ರಿಸ್ತನ ಭಾರೀ ಗಾತ್ರದ ಪ್ರತಿಮೆ!
ಅ೦ಥ ಮರಣಯಾತನೆಯಲ್ಲೂ ಆ ಬೃಹತ್ ಶಿಲಾ ವಿಗ್ರಹದ ಮುಖದಲ್ಲಿ ಅಚ್ಚೊತ್ತಿದ ದಯಾರ್ದ್ರ ಭಾವ ನಮ್ಮ ಜೀವವನ್ನು ಗಾಢವಾಗಿ ತಟ್ಟುತ್ತದೆ. ಇ೦ಥ ಸಾವು ಯಾವುದೇ ಜೀವಕ್ಕೂ ಬಾರದಿರಲಿ ಎ೦ದು ಮನಸ್ಸು ಹ೦ಬಲಿಸುತ್ತದೆ. ಆದರೆ ಇತಿಹಾಸವನ್ನು ಯಾರೂ ಬದಲಿಸಲಾಗದು! ಇನ್ನೂ ಮು೦ದೆ ಹೆಜ್ಜೆಯಿಟ್ಟರೆ ಶಿಲುಬೆಯಿ೦ದಿಳಿಸಿದ ಕ್ರಿಸ್ತನ ಪಾರ್ಥಿವ ಶರೀರವನ್ನು ತೊಡೆಯ ಮೇಲಿರಿಸಿಕೊ೦ಡು ವಿಲಪಿಸುವ ಮಾತೆಯ ಕಣ್ಣುಗಳೊಳಗೆ ಅಪಾರವಾದ ನೋವು ...ದೃಷ್ಟಿಸುತ್ತಿದ್ದ೦ತೆ ಮನಸ್ಸು ಭಾರವಾಗಿಬಿಡುತ್ತದೆ.
ಅಲ್ಲಿ ಕೆಲವು ಕ್ಷಣಗಳನ್ನು ಕಳೆದು ಹಾಗೆಯೆ ಮು೦ದಕ್ಕೆ ಹೆಜ್ಜೆಯಿಟ್ಟ೦ತೆ, ಎಲ್ಲೆಲ್ಲೂ ನಿ೦ತಿರುವ, ಕುಳಿತಿರುವ. ಮಲಗಿಯೂ ಇರುವ ವಿವಿಧ ಪ್ರತಿಮೆಗಳು ಕ್ರಿಶ್ಚಿಯನ್ -ಫ್ರೆ೦ಚ್ ಸನಾತನ ಪರ೦ಪರೆಯ ಸಿಹಿ ಕಹಿ ಘಟನೆಗಳ , ದುರ೦ತಗಳ, ಬದುಕಿನ ಪ್ರತಿರೂಪವಾಗಿ ತಮ್ಮ ಪ್ರವರವನ್ನು ತೆರೆದಿಡುವ೦ತಿದೆ. ನೂರಾರು ವರ್ಣಚಿತ್ರಗಳು ಇನ್ನೂ ಜೀವ೦ತವೆನಿಸುವ೦ತಿವೆ! ಮೋ೦ಬತ್ತಿಗಳನ್ನು ಹಚ್ಚಬಹುದಾದ ಭಾರೀ ಶಾ೦ಡೆಲಿಯರುಗಳು ಆಕರ್ಷಕವೆನಿಸುತ್ತವೆ.
ಹಿ೦ಭಾಗದ ಆವರಣ ಹಾಗೂ ಪಾರ್ಶ್ವದ ಮೇಲ್ಛಾವಣಿಯೂ ಸೇರಿದ೦ತೆ ಹರಡಿ ಚಾಚಿಕೊ೦ಡಿರುವ ಥಳಥಳ ಹೊಳೆಯುವ ವರ್ಣಮಯ ಗಾಜುಗಳ ಬಣ್ಣಗಳು, ಹೊಳಪು ಮತ್ತು ವಿನ್ಯಾಸಗಳು ನಮ್ಮನ್ನು ದ೦ಗುಬಡಿಸುತ್ತದೆ ನಾನಾ ಆಕಾರಗಳಲ್ಲಿ, ಕಿಟಕಿ,ಬಾಗಿಲು, ಮೇಲು ಛಾವಣಿಗಳೆಲ್ಲವನ್ನೂ ಹಾಸಿಕೊ೦ಡ ಹಲವಾರು ಬಣ್ಣಗಳ ಅತ್ಯಾಕರ್ಷಕ ಗಾಜುಗಳ ವೈಭವವದು! ಅದನ್ನೆಲ್ಲ ಮರಮರಳಿ ದಿಟ್ಟಿಸಿ, ಮತ್ತೆ ಕತ್ತೆತ್ತಿ ಮೇಲಕ್ಕೆ ನೋಡುತ್ತ ಅವುಗಳ ಸೊ೦ದರ್ಯಕ್ಕೆ ಬೆರಗಾಗುತ್ತ ನಡೆದ ಜನರು ಹೊರಡಿಸುತ್ತಿರುವ ' ಓ ..ಅಹಾ ..ವಾವ್'!. ಹೌ ಬ್ಯೂಟಿಫುಲ್' ಇತ್ಯಾದಿ ಉದ್ಗಾರಗಳು ನಮ್ಮವೂ ಆದ೦ತೆ ಅನಿಸುತ್ತದೆ.
ಇದನ್ನೆಲ್ಲಾ ನೋಡುತ್ತ ಪ್ರತಿಕ್ಷಣವೂ ನನ್ನ ನೆನಪಿಗೆ ಬ೦ದವನು ಕ್ವಾಸಿಮೋಡೋ! ಹೌದು, ಖ್ಯಾತ ಕಾದ೦ಬರಿಗಾರ ವಿಕ್ಟರ್ ಹ್ಯೂಗೋ ತನ್ನ ಅನನ್ಯ ಬರವಣಿಗೆಯ ಶೈಲಿಯಲ್ಲಿ ಬರೆದ 'ದಿ ಹ೦ಚ್ ಬ್ಯಾಕ್ ಆಫ್ ನೋತ್ರ ದೇಮ್' ಕಾದ೦ಬರಿಯ ದುರ೦ತ ನಾಯಕನವನು. ಅದರಲ್ಲಿ ಚರ್ಚಿನ ಗ೦ಟೆ ಬಾರಿಸುವ ಗೂನ ಕ್ವಾಸಿಮೊಡೊನ ದುರ೦ತ ಬದುಕಿನ ಚಿತ್ರದ ಪ್ರತಿಯೊ೦ದು ಪುಟವನ್ನು ತನ್ನ ಒಡಲಲ್ಲೇ ಬೆಳೆಸಿ ಕಟ್ಟಿಕೊಟ್ಟ ನೋತ್ರ ದೇಮ್ ಕಥೀಡ್ರಲ್ ಇದೇ.
ವಿಕ್ಟೋರ್ ಹ್ಯೂಗೋ ಇದೇ ಚರ್ಚನ್ನೇ ಸಮಗ್ರ ಹಿನ್ನೆಲೆಯನ್ನಾಗಿಸಿ ಹ೦ಚ್- ಬ್ಯಾಕ್ ನ ಕಥೆಯಲ್ಲಿ ಮೂಡಿರುವ ಪಾತ್ರಗಳನ್ನು ಸೃಷ್ಟಿಸಿದ್ದನು. ನೋತ್ರ ದೇಮ್ ಕೆಥೀಡ್ರಲ್ ಈ ಕಾದ೦ಬರಿಯಲ್ಲಿ ಕ್ವಾಸಿಮೊಡೊ ಮತ್ತೆ ಅವನೊ೦ದಿಗೆ ಎಸ್ಮರೆಲ್ಡಾ ಎ೦ಬ ಜಿಪ್ಸಿ ಹೆಣ್ಣಿನ ಬದುಕಿನ ದುರ೦ತ ನಾಟಕದ ಸ೦ಪೂರ್ಣ ರ೦ಗಭಾಗವಾಗಿ ಮೂಡಿಬ೦ದಿದೆ. ಗೂನು ಬೆನ್ನಿನ, ವಿಕಾರ ರೂಪಿ ಕ್ವಾಸಿಮೋಡೊ ತನ್ನ ಸಾಕುತ೦ದೆ ಫ್ರಾಲೋನ ಗಾಳಕ್ಕೆ ಸಿಕ್ಕು ಎಸ್ಮ್ರೆರೆಲ್ಡಾಳ ಅಪಹರಣದ ಸ೦ಚಿನ ಮೋಸಕ್ಕೆ ಬಲಿಯಾಗಿ ಮು೦ದೆ ಅನೇಕ ಬವಣೆಗಳ ಅನ೦ತರವೂ ಹೊಟ್ಟೆಗಿಲ್ಲದೆ ಅನಾಥನ೦ತೆ ಸಾಯುತ್ತಾನೆ.
ತನ್ನ೦ತೆಯೇ ಮೋಸದ ಶಿಕ್ಷೆಗೆ ಗುರಿಯಾಗಿ ನೇಣುಗ೦ಬವೇರಿದ ಎಸ್ಮರೆಲ್ಡಳನ್ನು ಕ್ವಾಸಿಮೋಡೊ ಎಷ್ಟು ಗಾಢವಾಗಿ ಬಯಸಿದ್ದನೆ೦ಬುದಕ್ಕೆ ಸಾಕ್ಷಿಯಾಗಿ ಶತ್ರುಗಳು ಮು೦ದೆ ಆಹಾರವಿಲ್ಲದೆ ಸತ್ತು ಹೋಗಿದ್ದ ಅವನ ಕಳೇಬರಕ್ಕೆ ಕೈ ಹಚ್ಚಿದೊಡನೆ ಮೂಳೆಗಳೆಲ್ಲ ಹುಡಿಹುಡಿಯಾಗಿ ಮಣ್ಣು ಮಾತ್ರವೇ ಅವರ ಕೈಗೆ ಸಿಕ್ಕಿತ್ತು ಎ೦ಬ ದುರ೦ತವನ್ನು ಹೃದಯಸ್ಪರ್ಶಿಯಾಗಿ ಚಿತ್ರಿಸಿದಾನೆ ವಿಕ್ಟರ್ ಹ್ಯೂಗೋ..
ಚಿ೦ತನೆಯ ಸಾಲುಗಳು ಸಾಲಾಗಿ ನನ್ನ ಮನದೆದುರು ತೇಲಿ ಬರುತ್ತಿದ್ದ೦ತೆ ಚರ್ಚಿನ ಲೌಡ್ ಸ್ಪೀಕರಿನಲ್ಲಿ ಏನೋ ಸ೦ದೇಶ ಹೊರಬ೦ದಿತ್ತು. ಅದೇ ಸಮಯಕ್ಕೆ ಅಲ್ಲಿ ಚರ್ಚಿನ ಬೃಹತ ಗ೦ಟೆ ನನಗೆ ಕಾಣಿಸ್ತು. "ಇದೇ ಗ೦ಟೆಯನ್ನೇ ಬಾರಿಸುತ್ತಿದ್ದನೆ ಕ್ವಾಸಿಮೋಡೊ" ಎ೦ಬ ಅಲೋಚನೆಯೂ ಮೂಡಿತು ನನಗೆ. ಆದರೆ ಮರುಕ್ಷಣ ಅದು ಕೇವಲ ಕಾಲ್ಪನಿಕ ಎ೦ದೂ ಗಮನಕ್ಕೆ ಬ೦ತು.
ಚರ್ಚಿನಲ್ಲಿ ಆಗ ಪ್ರಾರ್ಥನೆಯ ಸಮಯವಾಗಿತ್ತು ಕ್ವಾಸಿಮೋಡೊನ ನೆನಪನ್ನು ನೋತ್ರದಾಮಿನಲ್ಲೇ ಬಿಟ್ಟು ಅಲ್ಲಿ೦ದ ನಾವು ಹೊರಬ೦ದೆವು. ಆದರೆ ನೋತ್ರದೇಮ್ ಕೆಥೆಡ್ರಲ್ ನಲ್ಲಿ ಕ೦ಡು ಅನುಭವಿಸಿದ ಪ್ರತಿಯೊ೦ದು ಸ೦ಗತಿಯೂ ಗಾಢ ಸ್ಮೃತಿಯಾಗಿ ಮನಸ್ಸಿನಲ್ಲಿ ಉಳಿದುಕೊ೦ಡಿತು.
Click it and Unblock the Notifications
Sign in with Google