ಅಮೆರಿಕಾದಲ್ಲಿ ಅದ್ಧೂರಿ ವಿಶ್ವ ವೀರಶೈವ ಸಮ್ಮೇಳನ
ಆದರೆ ಈ ದೃಶ್ಯ ಕಂಡು ಬಂದಿದ್ದು "ಅಂದು 12ನೇ ಶತಮಾನದಲ್ಲಿ ನುಡಿದಂತೆ ನಡೆದು ವೀರಶೈವ ಧರ್ಮ ಪ್ರಾರಂಭಿಸಿದ ವಿಶ್ವಗುರು ಬಸವಣ್ಣ ಹಾಗು ಎಲ್ಲ ಶಿವ ಶರಣರ ವಚನಗಳನ್ನು, ಜಗದೆಲ್ಲೆಡೆ ಸಾರುವ ಉದ್ದೇಶದಿಂದ" ಉತ್ತರ ಅಮೆರಿಕಾದಲ್ಲಿರುವ ವೀರಶೈವ ಸಮಾಜ ನ್ಯೂಇಂಗ್ಲಂಡ್ ಚಾಪ್ಟರ್(ಶಾಖೆ) ಜುಲೈ 2 ಮತ್ತು 3ರಂದು ನಡೆದ 34ನೇ ವಿಶ್ವ ವೀರಶೈವ ಸಮ್ಮೇಳನ ಮತ್ತು ವಿಶ್ವ ಬಸವ ಚರ್ಚಾ ಗೋಷ್ಠಿಯಲ್ಲಿ. ಬೋಸ್ಟನ್ ನಗರಕ್ಕೆ ಹೊಂದಿಕೊಂಡಿರುವ Newton, MA - ಚಾರ್ಲ್ಸ್ ನದಿ ತೀರದಲ್ಲಿರುವ Marriott ಹೋಟೆಲ್ನ ವಿಶಾಲವಾದ ಸಭಾಂಗಣದಲ್ಲಿ ನಡೆಯಿತು.
ಪ್ರತಿ ವರ್ಷ ನಡೆಯುವ ಉತ್ತರ ಅಮೆರಿಕಾ ವಿಶ್ವ ವೀರಶೈವ ಸಮ್ಮೇಳನ ಈ ಬಾರಿ ಬೋಸ್ಟನ್ ನಗರದಲ್ಲಿ ಪ್ರಥಮ ಬಾರಿಗೆ ಅತ್ಯಂತ ಅದ್ದೂರಿಯಾಗಿ ವಿಜೃಂಭಣೆಯಿಂದ ನಡೆಯಿತು. ಸಮಾವೇಶವನ್ನು ನಡೆದಾಡುವ ದೇವರು ಎಂದೇ ಕರೆಯಲ್ಪಡುವ ಸಿದ್ದಗಂಗಾ ಮಠದ ಶ್ರೀ ಶ್ರೀ ಶ್ರೀ ಡಾ : ಶಿವಕುಮಾರ ಸ್ವಾಮೀಜಿಗಳು ವಿಡಿಯೋ ಕಾನ್ಫೆರೆನ್ಸ್ ಮೂಲಕ ಉದ್ಘಾಟಿಸಿ ಆಶೀರ್ವಚನ ನೀಡಿದರು. ಸ್ವಾಗತ ಗೀತೆಯ ನಂತರ ತರಳುಬಾಳು ಜಗದ್ಗುರುಗಳಾದ ಡಾ. ಶ್ರೀ ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿಗಳು ದೀಪ ಹಚ್ಚುವುದರೊಂದಿಗೆ ಈ ಎರಡು ದಿನದ ಕಾರ್ಯಕ್ರಮ ಆರಂಭವಾಯಿತು.
ನಂತರ ಇದೇ ಮೊದಲಬಾರಿಗೆ ನಡೆದ ವಿಶ್ವ ಬಸವ ಚರ್ಚಾ ಗೋಷ್ಠಿಯಲ್ಲಿ ಅತಿಥಿಗಳಾಗಿ ಭಾಗವಹಿಸಿದ್ದ ಶ್ರೀ ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ, ಅರವಿಂದ್ ಜತ್ತಿ - ಬಸವ ಸಮಿತಿ ಅಧ್ಯಕ್ಷರು, ಗೊರೂರು ಚನ್ನಬಸಪ್ಪ - ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ ಅಧ್ಯಕ್ಷರು, ಡಾ| ಸಿ. ಸೋಮಶೇಖರ - ಐಎಎಸ್ , ಜಿಲ್ಲಾಧಿಕಾರಿಗಳು, ತುಮಕೂರು, ಎಚ್.ವಿ. ನಾಗೇಂದ್ರಪ್ಪ - ಅಖಿಲ ಭಾರತ ವೀರಶೈವ ಮಹಾಸಭಾ, ಉಪಾಧ್ಯಕ್ಷರು, ಜರಗನಹಳ್ಳಿ ಶಿವಶಂಕರ್ - ಬರಹಗಾರರು, ಸುರೇಶ ಅಂಗಡಿ, ಲೋಕಸಭಾ ಸದಸ್ಯರು, ಪ್ರಖ್ಯಾತ ಉದ್ಯಮಿ ಡಾ| ಗುರುರಾಜ್ ದೇಶಪಾಂಡೆ, ಜನಾರ್ಧನ ಸ್ವಾಮಿ, ಲೋಕಸಭಾ ಸದಸ್ಯರು, ಡಾ| ಸೋಮಶೇಖರ್ ಪಳ್ಯೇಗಾರ್ - VSNA ಪ್ರೆಸಿಡೆಂಟ್ ಇವರೆಲ್ಲ - ಬಸವ ತತ್ವ, ವೀರಶೈವ ಸಂಸ್ಕೃತಿ, ಶರಣರ ವಚನಗಳ ಬಗ್ಗೆ ಮಾತನಾಡಿದರು.
ಅಮೆರಿಕ, ಕೆನಡಾ, ಮೆಕ್ಸಿಕೋ, ಯುರೋಪ್, ಇಂಡಿಯಾ ಹೀಗೆ ಎಲ್ಲೆಡೆಯಿಂದ ನೂರಾರು ಶಿವ ಶರಣ-ಶರಣೆಯರು ಎರಡು ದಿನದ ಈ ಸಮ್ಮೇಳನಕ್ಕೆ ಆಗಮಿಸಿ ಎಲ್ಲ ಕಾರ್ಯಕ್ರಮಗಳಲ್ಲಿ ಆಸಕ್ತಿಯಿಂದ ಭಾಗವಹಿಸಿ, ರುಚಿ ರುಚಿಯಾದ ಕರ್ನಾಟಕದ ಪ್ರಸಿದ್ದ ಇಡ್ಲಿ- ವಡಾ, ಉಪ್ಪಿಟ್ಟು, ಕೇಸರಿಬಾತ್, ಹೋಳಿಗೆ, ರೊಟ್ಟಿ ಊಟ ಮಾಡಿ ಆನಂದಿಸಿದರು.
ಕೊನೆಯದಿನ ಸಂಜೆ ನಡೆದ ಮಲ್ಲಿ ಸಣ್ಣಪ್ಪನವರ ವಿರಚಿತ ಸಾಮಾಜಿಕ ನೀತಿಕತೆ ಸಾರುವ "ಅಮೇರಿಕಾದಲ್ಲಿ ಬಸವಣ್ಣ" ಎಂಬ ಹಾಸ್ಯಭರಿತ ನಾಟಕ ಎಲ್ಲರ ಮನಸೆಳೆದು ಭರ್ಜರಿ ಕರತಾಡನ ಗಿಟ್ಟಿಸಿದ್ದಲ್ಲದೆ ಬಸವಣ್ಣನವರ ಕಾಯಕವೇ ಕೈಲಾಸದ ಸಂದೇಶವನ್ನು ಎಲ್ಲರಲ್ಲಿ ಅರಿವು ಮಾಡಿಸಿತು. [34ನೇ ವಿಶ್ವ ವೀರಶೈವ ಸಮ್ಮೇಳನ ಚಿತ್ರಪಟ]
Click it and Unblock the Notifications
Sign in with Google