ಬ್ರಿಟನ್ನಿಂದ ಬಂದವರಲ್ಲಿ ಸೋಂಕು; ವಿಮಾನಗಳ ನಿರ್ಬಂಧ ವಿಸ್ತರಣೆ ಸಾಧ್ಯತೆ
ನವದೆಹಲಿ, ಡಿಸೆಂಬರ್ 29: ಬ್ರಿಟನ್ ನಲ್ಲಿ ಈಚೆಗೆ ಕೊರೊನಾ ವೈರಸ್ ರೂಪಾಂತರ ಸೋಂಕು ಪತ್ತೆಯಾಗುತ್ತಿದ್ದಂತೆ ಎಚ್ಚೆತ್ತುಕೊಂಡ ಕೆಲವು ದೇಶಗಳು ತಕ್ಷಣವೇ ಬ್ರಿಟನ್ ನಿಂದ ವಿಮಾನ ಯಾನವನ್ನು ರದ್ದುಗೊಳಿಸಿದ್ದವು.
ಭಾರತ ಕೂಡ ಡಿ.22ರಿಂದಲೇ ಬ್ರಿಟನ್ ನಿಂದ ಬರುವ ವಿಮಾನಗಳನ್ನು ಡಿ.31ರವರೆಗೂ ತಾತ್ಕಾಲಿಕವಾಗಿ ರದ್ದುಗೊಳಿಸಿತ್ತು. ಇದೀಗ ಆ ಅವಧಿಯನ್ನು ಇನ್ನಷ್ಟು ವಿಸ್ತರಿಸುವ ಸಾಧ್ಯತೆಯಿರುವುದಾಗಿ ತಿಳಿದುಬಂದಿದೆ.
ಬ್ರಿಟಿನ್ ನಿಂದ ಭಾರತಕ್ಕೆ ಮರಳಿದ್ದ ಆರು ಮಂದಿಯಲ್ಲಿ ಮಂಗಳವಾರ ಕೊರೊನಾ ರೂಪಾಂತರ ಸೋಂಕು ಪತ್ತೆಯಾಗಿದ್ದು, ಈ ಬೆಳವಣಿಗೆಯಿಂದ ಭಾರತ-ಬ್ರಿಟನ್ ನಡುವಿನ ವಿಮಾನಗಳ ರದ್ದತಿಯನ್ನು ಇನ್ನಷ್ಟು ಸಮಯ ವಿಸ್ತರಿಸುವುದಾಗಿ ನಾಗರೀಕ ವಿಮಾನಯಾನ ಸಚಿವ ಹರ್ದೀಪ್ ಸಿಂಗ್ ಪುರಿ ತಿಳಿಸಿದ್ದಾರೆ.
ಬ್ರಿಟನ್ -ಭಾರತದ ನಡುವಿನ ವಿಮಾನಗಳ ರದ್ದತಿ ಅವಧಿಯನ್ನು ಇನ್ನಷ್ಟು ವಿಸ್ತರಿಸಲಾಗುವುದು. ಆದರೆ ಇದು ದೀರ್ಘವಾಗಿರುವುದಿಲ್ಲ. ಇನ್ನು ಎರಡು ದಿನಗಳಲ್ಲಿ, ಈ ರೂಪಾಂತರ ಸೋಂಕಿನ ಕುರಿತು ಒಂದು ಚಿತ್ರಣ ಸಿಗುತ್ತಿದ್ದಂತೆ, ಏನೇನು ಕ್ರಮಗಳನ್ನು ತೆಗೆದುಕೊಳ್ಳಬೇಕು ಎಂದು ತೀರ್ಮಾನಿಸಲಾಗುತ್ತದೆ. ಈ ತಾತ್ಕಾಲಿಕ ರದ್ದತಿಯನ್ನು ಯಾವಾಗ ಹಿಂಪಡೆಯಬಹುದು ಎಂಬ ಕುರಿತು ನಿರ್ಧರಿಸಲಾಗುತ್ತದೆ ಎಂದು ತಿಳಿಸಿದ್ದಾರೆ.
ಬ್ರಿಟನ್ ನಿಂದ ಮರಳಿದ ಹಲವರಲ್ಲಿ ಕೊರೊನಾ ಸೋಂಕು ಇರುವುದು ದೃಢಪಡುತ್ತಿದ್ದು, ರೂಪಾಂತರ ಸೋಂಕಿನ ಜೆನೋಮ್ ಪರೀಕ್ಷೆಗೆ ಮಾದರಿಗಳನ್ನು ಕಳುಹಿಸಲಾಗುತ್ತಿದೆ.
Click it and Unblock the Notifications
Sign in with Google