ಅಂಧೇರಿಯಲ್ಲಿ ಸಚಿನ್ ಸ್ಟಾರ್ ನೈಟ್

By Mahesh

Updated: Tuesday, November 19, 2013, 22:09 [IST]

ಮುಂಬೈ, ನ.19: ಕ್ರಿಕೆಟ್ ಗೆ ವಿದಾಯ ಹೇಳಿದ ಮೇಲೆ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ವಿಶೇಷ ಭೋಜನ ಕೂಟ ಆಯೋಜಿಸಿದ್ದರು. ಬಾಲಿವುಡ್ ಅತಿರಥ-ಮಹಾರಥರ ಜತೆಗೆ ಟೀಂ ಇಂಡಿಯಾದ ಸದಸ್ಯರು ಆಗಮಿಸಿ ಸಚಿನ್ ಜತೆ ಸಂಭ್ರಮದಿಂದ ಕಾಲಕಳೆದರು.

ಮುಂಬೈನ ಪಶ್ಚಿಮ ಅಂಧೇರಿಯಲ್ಲಿರುವ ಸ್ಟಾರ್ ಹೊಟೇಲ್ ನಡೆದ ಭೋಜನಕೂಟದಲ್ಲಿ ಹಲವು ತಾರೆಗಳ ಮಧ್ಯೆ ಸಚಿನ್ ' ಮಿನುಗು ತಾರೆ' ಆಗಿ ಕಂಗೊಳಿಸಿದರು. ಬಾಲಿವುಡ್ ನ ಬಾದ್ ಷಾ ಅಮಿತಾಬ್ ಬಚ್ಚನ್, ಅಮೀರ್ ಖಾನ್, ರಾಹುಲ್ ಬೋಸ್, ಖ್ಯಾತ ನಿರ್ದೇಶಕ ಕರಣ್ ಜೋಹರ್, ತೆಂಡೂಲ್ಕರ್ ಅವರ ಕ್ರಿಕೆಟ್ ಗುರು ರಮಾಕಾಂತ ಆಚ್ರೇಕರ್ ಸೇರಿದಂತೆ ಹಲವು ಗಣ್ಯರು ಕಾರ್ಯಕ್ರಮಕ್ಕೆ ಆಗಮಿಸಿದ್ದರು.

ಕಪ್ಪು ಸೂಟ್ ಧರಿಸಿದ್ದ ತೆಂಡೂಲ್ಕರ್ ಕಪ್ಪು ಉಡುಗೆಯಲ್ಲೇ ಇದ್ದ ಪತ್ನಿ ಅಂಜಲಿ ಜತೆ ಸೇರಿ ಅತಿಥಿ ಗಣ್ಯರನ್ನು ಆಹ್ವಾನಿಸಿ ಭೋಜನ ಆತಿಥ್ಯ ಕೊಟ್ಟರು. ಕೇವಲ ಬಾಲಿವುಡ್ ನ ಖ್ಯಾತ ನಾಮರ ಜತೆಗೆ ಕೇಂದ್ರ ಕೃಷಿ ಸಚಿವ ಶರದ್ ಪವಾರ್, ಮಹಾರಾಷ್ಟ್ರ ಮುಖ್ಯಮಂತ್ರಿ ಪೃಥ್ವಿರಾಜ್ ಚೌವ್ಹಾಣ್, ರಾಜ್ ಠಾಕ್ರೆ, ಕ್ರಿಕೆಟಿಗರಾದ ಸುನೀಲ್ ಗಾವಸ್ಕರ್, ಕೆ.ಶ್ರೀಕಾಂತ್, ಸಂದೀಪ್ ಪಾಟೀಲ್,ಸೌರವ್ ಗಂಗೂಲಿ, ವಿ.ವಿ.ಎಸ್.ಲಕ್ಷ್ಮಣ್, ವೀರೇಂದ್ರ ಸೆಹ್ವಾಗ್, ಮುಂಬೈ ಇಂಡಿಯನ್ ಒಡತಿ ನೀತಾ ಅಂಬಾನಿ, ಸಹಾರಾ ಸಂಸ್ಥೆಯ ಸುಬ್ರತೋ ರಾಯ್, ಗಾಯಕಿ ಆಶಾಬೋಸ್ಲೆ ಮತ್ತಿತರರು ಸಾಕ್ಷಿಯಾದರು. ಟೀಂ ಇಂಡಿಯಾದಿಂದ ಯಾರು ಬಂದಿದ್ದರು., ಸಚಿನ್ ಹೇಳಿಕೆ ಮುಂತಾದ ಸಚಿತ್ರ ವಿವರ ಮುಂದೆ ಓದಿ...

ವಿರಾಟ್ ಕೊಹ್ಲಿ ಆಗಮನ

ವಿರಾಟ್ ಕೊಹ್ಲಿ, ಯುವರಾಜ್ ಸಿಂಗ್, ಗೌತಮ್ ಗಂಭೀರ್, ರೋಹಿತ್ ಶರ್ಮ ಈ ಸಂತಸದ ಕ್ಷಣಕ್ಕೆ ಸಾಕ್ಷಿಯಾದರು. ದಿನವಿಡೀ ಬ್ಯುಸಿಯಾಗಿದ್ದ ಭಾರತ ರತ್ನ ತೆಂಡೂಲ್ಕರ್ ಗೆ ಇದು ಭಾವನಾತ್ಮಕ ಕಾರ್ಯಕ್ರಮವೇ ಆಗಿತ್ತು. ಕ್ರಿಕೆಟ್ ವಲಯದ ಎಲ್ಲ ಗಣ್ಯರು, ಗೆಳೆಯರು ಸಚಿನ್ ರನ್ನು ಭೋಜನ ಕೂಟದಲ್ಲೂ ಹಾಡಿ ಹೊಗಳಿದರು.

ಧೋನಿ ಆಗಮನ

24 ವರ್ಷಗಳ ಕಾಲ ಸತತವಾಗಿ ಭಾರತಕ್ಕೆ ಆಡಿದ ತೃಪ್ತಿ ಇದೆ. ನನಗೀಗ ಕನಿಷ್ಠ 24 ದಿನಗಳ ವಿಶ್ರಾಂತಿಯ ಅಗತ್ಯವಿದೆ. ನಂತರವಷ್ಟೇ ನನ್ನ ನಡೆಯ ಬಗ್ಗೆ ತಿಳಿಸಲು ಸಾಧ್ಯ ಎಂದು ಮಾಧ್ಯಮಗಳಿಗೆ ಸಚಿನ್ ಉತ್ತರಿಸಿದರು.

ಹರ್ಭಜನ್ ಸಿಂಗ್

ಇದೊಂದು ಖಾಸಗಿ ಸಮಾರಂಭವಾಗಿದ್ದು, ಯಾವುದೇ ಮಾಧ್ಯಮ ಸಂಸ್ಥೆಗಳಿಗೆ ಕಾರ್ಯಕ್ರಮದ ವರದಿ ಪ್ರಸಾರಕ್ಕೆ ಅನುಮತಿ ನೀಡಿರಲಿಲ್ಲ. ಬಿಗಿ ಭದ್ರತೆ ನಡುವೆ ಭೋಜನಕೂಟ ಸಾಂಗವಾಗಿ ಸಾಗಿತ್ತು. ಅನ್ನದಾತ ಸುಖಿಭವ ಎಂದು ಸಚಿನ್ ದಂಪತಿಯನ್ನು ಎಲ್ಲರೂ ಹರಸಿ ಹೋದರಂತೆ.