20 ದಿನದ ಹಸುಗೂಸಿಗೆ ವಕ್ಕರಿಸಿದ ಕೊರೊನಾ ವೈರಸ್

ಮುಂಬೈ, ಏಪ್ರಿಲ್ 30: ಮಹಾಮಾರಿ ಕೊರೊನಾ ವೈರಸ್‌ಗೆ 20 ದಿನ ಹಸುಗೂಸು ತುತ್ತಾಗಿದೆ. ಮಹಾರಾಷ್ಟ್ರದ ಠಾಣೆ ಜಿಲ್ಲೆಯ ಕಲ್ಯಾಣ್ ನಗರದಲ್ಲಿ 20 ದಿನದ ಮಗುವಿಗೆ ಕೊರೊನಾ ವೈರಸ್ ತಗುಲಿರುವುದು ಖಚಿತವಾಗಿದೆ.

20 ದಿನದ ಗಂಡು ಮಗು ಸೇರಿದಂತೆ ಇತರೆ ಆರು ಮಂದಿಗೆ ಕೊವಿಡ್ ಪಾಸಿಟಿವ್ ಆಗಿದ್ದು, ಕಲ್ಯಾಣ್ ನಗರ ಪ್ರದೇಶದಲ್ಲಿ ಒಟ್ಟು ಸೋಂಕಿತರ ಸಂಖ್ಯೆ 162ಕ್ಕೆ ಏರಿಕೆಯಾಗಿದೆ. ಇದರಲ್ಲಿ ಮೂವರು ಮೃತಪಟ್ಟಿದ್ದಾರೆ ಎಂದು ವೈದ್ಯಕೀಯ ಅಧಿಕಾರಿ ಡಾ ರಾಜು ಲೊವಾಂಗರೆ ಮಾಹಿತಿ ನೀಡಿದ್ದಾರೆ.

ಈಗಷ್ಟೇ ಹೊರಜಗತ್ತನ್ನು ನೋಡುತ್ತಿರುವ ಮಗುವಿಗೆ ತನ್ನ ತಾಯಿಯಿಂದ ಸೋಂಕು ತಗುಲಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಆ ಮಗುವಿನ ತಾಯಿ ಕೊರೊನಾ ಸೋಂಕಿನಿಂದ ಬಳಲುತ್ತಿದ್ದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಕೊರೊನಾ ವೈರಸ್‌ ಎಲ್ಲ ವಯಸ್ಸಿನವರಿಗೆ ತಗುಲಿದೆ. ಆದರೆ, ಆರಂಭದಲ್ಲಿ ಅಂಕಿ ಅಂಶ ಗಮನಿಸಿದರೆ ಹಿರಿಯ ವಯಸ್ಸಿನ ವ್ಯಕ್ತಿಗಳಲ್ಲಿ ಹೆಚ್ಚು ಸೋಂಕಿ ಕಾಣಿಸಿಕೊಂಡಿತ್ತು. ಆದರೆ, ಇತ್ತೀಚಿನ ದಿನಗಳಲ್ಲಿ ಚಿಕ್ಕ ವಯಸ್ಸಿನ ಮಕ್ಕಳಿಗೂ ಕೊರೊನಾ ಅಂಟಿಕೊಳ್ಳುತ್ತಿದೆ.

ಈ ಹಿಂದೆ ಮಹಾರಾಷ್ಟ್ರದಲ್ಲಿ ಮೂರು ವರ್ಷದ ಮಗುವಿಗೆ ಕೊವಿಡ್ ಸೋಂಕು ದೃಢಪಟ್ಟಿತ್ತು. ಠಾಣೆಯ ಕಲ್ಯಾಣ್ ನಗರದಲ್ಲೇ ಈ ಮಗು ನೆಲೆಸಿರುವುದು ಗಮನಾರ್ಹ.

ದೆಹಲಿಯಲ್ಲಿ 45 ದಿನ ಮಗು ಕೊರೊನಾ ಸೋಂಕಿನಿಂದ ಮೃತಪಟ್ಟಿತ್ತು. ಗುಜರಾತ್‌ನ ಅಹಮದಬಾದ್‌ನಲ್ಲಿ 14 ತಿಂಗಳು ಮಗು ಕೊವಿಡ್‌ನಿಂದ ಸಾವನ್ನಪ್ಪಿತ್ತು. ತಮಿಳುನಾಡಿನಲ್ಲಿ ಸುಮಾರು 120ಕ್ಕೂ ಹೆಚ್ಚು ಮಕ್ಕಳಲ್ಲಿ ಕೊರೊನಾ ಪತ್ತೆಯಾಗಿದೆ ಎಂಬ ಮಾಹಿತಿ ಇದೆ.

English summary

20 days old baby boy tested positive for coronavirus In kalyan towan of maharashtra.