ಮಂಗಳೂರನ್ನು 'ಡ್ರಗ್ಸ್ ಫ್ರೀ ಸಿಟಿ' ಮಾಡಲು ಪೊಲೀಸರ ಹದ್ದಿನ ಕಣ್ಣು
ಮಂಗಳೂರು, ಜುಲೈ 20: ಮಾದಕ ವಸ್ತುಗಳನ್ನು ಮಾರಾಟ ಮಾಡುವ ಪ್ರಕರಣಗಳು ನಗರದ ಕೆಲವೆಡೆ ದಾಖಲಾಗುತ್ತಿವೆ. ಎಷ್ಟೇ ಹದ್ದಿನ ಕಣ್ಣಿಟ್ಟರೂ ಮಾದಕ ವಸ್ತುಗಳ ರವಾನೆ ಕದ್ದುಮುಚ್ಚಿ ನಡೆಯುತ್ತಲೇ ಇದೆ. ಆದ್ದರಿಂದ ಈ ಡ್ರಗ್ಸ್ ಮಾಫಿಯಾ ತಡೆದು ಮಂಗಳೂರು ನಗರವನ್ನು "ಮಾದಕವಸ್ತುರಹಿತ ನಗರ" (ಡ್ರಗ್ಸ್ ಫ್ರೀ ಸಿಟಿ) ಮಾಡುವ ನಿಟ್ಟಿನಲ್ಲಿ ಮಂಗಳೂರು ಪೊಲೀಸರು ಪಣತೊಟ್ಟಿದ್ದಾರೆ.
ನಗರದಲ್ಲಿ ಮಾದಕ ವಸ್ತುಗಳ ಮಾರಾಟ ಮತ್ತು ಸಾಗಾಟ ಮಾಡುವವರನ್ನು ಮಟ್ಟಹಾಕುವ ನಿಟ್ಟಿನಲ್ಲಿ ಪೊಲೀಸರು ಕಾರ್ಯಾಚರಣೆ ಆರಂಭಿಸಿದ್ದಾರೆ.
ಮಂಗಳೂರಿನಲ್ಲಿ ಇನ್ನು ಪಿಜಿ, ಹಾಸ್ಟೆಲ್ ನಡೆಸಲು ಅನುಮತಿ ಕಡ್ಡಾಯ
ಮಂಗಳೂರಿನಲ್ಲಿ ಮಾಧ್ಯಮ ಗೋಷ್ಠಿಯಲ್ಲಿ ಮಾತನಾಡಿದ ಪೊಲೀಸ್ ಕಮಿಷನರ್ ಸಂದೀಪ್ ಪಾಟೀಲ್, "ಕಮಿಷನರೇಟ್ ವ್ಯಾಪ್ತಿಯಲ್ಲಿ ಹಲವು ದಿನಗಳಿಂದ ಮಾದಕ ವಸ್ತುಗಳ ವಿರುದ್ಧ ಕಾರ್ಯಾಚರಣೆ ನಡೆಸಲಾಗುತ್ತಿದೆ. ಮಾದಕ ವಸ್ತುಗಳನ್ನು ಪೂರೈಕೆ ಮಾಡುತ್ತಿರುವವರನ್ನು ಬಂಧಿಸಲಾಗುತ್ತಿದೆ. ಸೇವನೆ ಮಾಡುವವರನ್ನೂ ಬಂಧಿಸಲಾಗಿದೆ. ಶಾಲಾ ಕಾಲೇಜುಗಳಲ್ಲಿ ಮಾದಕವಸ್ತುವಿನಿಂದಾಗುವ ತೊಂದರೆಗಳ ಬಗ್ಗೆ ಜಾಗೃತಿ ಮೂಡಿಸುವ ಕೆಲಸವನ್ನು ಪೊಲೀಸ್ ಇಲಾಖೆ ವತಿಯಿಂದ ಮಾಡಲಾಗುತ್ತಿದೆ. ಈ ಕೆಲಸಕ್ಕೆ ಶಾಲಾ ಕಾಲೇಜು ಆಡಳಿತ ಮಂಡಳಿ ಹಾಗೂ ಪೋಷಕರ ಸಹಕಾರ ಅತಿ ಅಗತ್ಯವಾಗಿದೆ" ಎಂದು ಹೇಳಿದರು.
"ಮಕ್ಕಳ ಪೋಷಕರು ಹಾಗೂ ಶಿಕ್ಷಕರು ಮಕ್ಕಳ ಮೇಲೆ ನಿಗಾವಹಿಸಿ ಅವರ ಬ್ಯಾಗ್, ಬೈಕ್, ಕೋಣೆಗಳನ್ನು ತಪಾಸಣೆ ನಡೆಸಬೇಕು. ಸಕ್ಕರೆ, ಉಪ್ಪು, ಹುಲ್ಲು ಮಾದರಿಯ ನಿಷೇಧಿತ ಮಾದಕ ವಸ್ತುಗಳು ಅಥವಾ ಯಾವುದೇ ಅನುಮಾನಾಸ್ಪದ ವಸ್ತುಗಳು ಕಂಡು ಬಂದಲ್ಲಿ ಪೊಲೀಸರಿಗೆ ತಿಳಿಸಬೇಕು" ಎಂದು ಮನವಿ ಮಾಡಿದರು.