Moon Trees: ಚಂದ್ರನ ಕಕ್ಷೆ ಸುತ್ತಿ ಬಂದು ಭೂಮಿಯಲ್ಲಿ ಹೆಮ್ಮರವಾಗಿ ಬೆಳೆದು ನಿಂತಿವೆ ಈ 'ಮೂನ್ ಟ್ರೀಸ್ʼ
ವಾಷಿಂಗ್ಟನ್: ಮಾನವನ ಬಾಹ್ಯಾಕಾಶ ಇತಿಹಾಸದಲ್ಲಿ ರಾಕೆಟ್ಗಳು, ಉಪಗ್ರಹಗಳು ಮತ್ತು ಚಂದ್ರನ ಕಲ್ಲುಗಳ ಬಗ್ಗೆ ನಾವೆಲ್ಲರೂ ಕೇಳಿರುತ್ತೇವೆ. ಆದರೆ ಚಂದ್ರನ ಕಕ್ಷೆಯನ್ನು ಪ್ರದಕ್ಷಿಣೆ ಹಾಕಿ ಬಂದು, ಭೂಮಿಯ ಮಣ್ಣಿನಲ್ಲಿ ಅಪ್ಪಟ ಹಸಿರಾಗಿ ಬೆಳೆದು ನಿಂತಿರುವ "ಜೀವಂತ ಸ್ಮಾರಕ"ಗಳ ಬಗ್ಗೆ ನಿಮಗೆ ಗೊತ್ತೇ? ಇವುಗಳನ್ನು ಜಗತ್ತು 'ಮೂನ್ ಟ್ರೀಸ್' (Moon Trees-ಚಂದ್ರನ ಮರಗಳು) ಎಂದು ಕರೆಯುತ್ತದೆ. ಸುಮಾರು ಐದು ದಶಕಗಳ ಹಿಂದೆ ನಾಸಾ (NASA) ಕೈಗೊಂಡಿದ್ದ ವಿಶಿಷ್ಟ ಪ್ರಯೋಗದ ಫಲವಾಗಿ, ಇಂದು ಅಮೆರಿಕದಾದ್ಯಂತ ನೂರಾರು ಮರಗಳು ಹೆಮ್ಮರವಾಗಿ ಬೆಳೆದು ಸಾರ್ವಜನಿಕರಿಗೆ ನೆರಳು ನೀಡುತ್ತಿವೆ. ಈ ರೋಚಕ ಬಾಹ್ಯಾಕಾಶ ಜರ್ನಿಯ ಸಂಪೂರ್ಣ ವಿವರ ಇಲ್ಲಿದೆ:
1971ರಲ್ಲಿ ನಾಸಾ 'ಅಪೊಲೊ 14' (Apollo 14) ಮಿಷನ್ ಅನ್ನು ಉಡಾವಣೆ ಮಾಡಿತು. ಈ ನೌಕೆಯಲ್ಲಿದ್ದ ಕಮಾಂಡ್ ಮಾಡ್ಯೂಲ್ ಪೈಲಟ್ ಸ್ಟುವರ್ಟ್ ರೂಸಾ (Stuart Roosa) ಅವರಿಗೆ ವಿಶಿಷ್ಟ ಹಿನ್ನೆಲೆಯಿತ್ತು. ನಾಸಾಗೆ ಸೇರುವ ಮುನ್ನ ಅವರು ಅಮೆರಿಕದ ಅರಣ್ಯ ಇಲಾಖೆಯಲ್ಲಿ 'ಸ್ಮೋಕ್ಜಂಪರ್' ಆಗಿ ಕಾಡ್ಗಿಚ್ಚು ನಂದಿಸುವ ಕೆಲಸ ಮಾಡುತ್ತಿದ್ದರು. ಅರಣ್ಯ ಇಲಾಖೆಯ ಮೇಲಿನ ಪ್ರೀತಿಯಿಂದಾಗಿ, ಅವರು ನಾಸಾ ಹಾಗೂ ಯುಎಸ್ ಫಾರೆಸ್ಟ್ ಸರ್ವೀಸ್ ಜಂಟಿಯಾಗಿ ರೂಪಿಸಿದ ಪ್ರಯೋಗಕ್ಕೆ ಕೈಜೋಡಿಸಿದರು.
ಬಾಹ್ಯಾಕಾಶದ ಶೂನ್ಯ ಗುರುತ್ವಾಕರ್ಷಣೆ ಮತ್ತು ತೀವ್ರ ವಿಕಿರಣಗಳು ಸಸ್ಯಗಳ ಬೀಜಗಳ ಮೇಲೆ ಎಂತಹ ಪ್ರಭಾವ ಬೀರುತ್ತವೆ ಎಂದು ತಿಳಿಯಲು, ಐದು ಜಾತಿಯ (ಲಾಬ್ಲೊಲಿ ಪೈನ್, ಸಿಕಾಮೋರ್, ಸ್ವೀಟ್ಗಮ್, ರೆಡ್ವುಡ್ ಮತ್ತು ಡೌಗ್ಲಾಸ್ ಫಿರ್) ನೂರಾರು ಬೀಜಗಳನ್ನು ರೂಸಾ ಅವರ ವೈಯಕ್ತಿಕ ಕಿಟ್ನಲ್ಲಿ ಇಟ್ಟು ಬಾಹ್ಯಾಕಾಶಕ್ಕೆ ಕಳುಹಿಸಲಾಯಿತು.
ಚಂದ್ರನ ಮಣ್ಣನ್ನು ಮುಟ್ಟದಿದ್ದರೂ ಕಕ್ಷೆ ಸುತ್ತಿದ ಬೀಜಗಳು
ಅಪೊಲೊ 14ರ ಗಗನಯಾತ್ರಿಗಳಾದ ಅಲಾನ್ ಶೆಪರ್ಡ್ ಮತ್ತು ಎಡ್ಗರ್ ಮಿಚೆಲ್ ಚಂದ್ರನ ಮೇಲ್ಮೈಗೆ ಇಳಿದು ಸಂಶೋಧನೆ ನಡೆಸುತ್ತಿದ್ದರೆ, ಸ್ಟುವರ್ಟ್ ರೂಸಾ ಅವರು ಈ ಬೀಜಗಳಿದ್ದ ನೌಕೆಯನ್ನು ಚಂದ್ರನ ಕಕ್ಷೆಯಲ್ಲೇ ಸುತ್ತಿಸುತ್ತಿದ್ದರು. ಬೀಜಗಳು ಚಂದ್ರನ ನೆಲವನ್ನು ನೇರವಾಗಿ ಸ್ಪರ್ಶಿಸದಿದ್ದರೂ, ಚಂದ್ರನ ಕಕ್ಷೆಯಲ್ಲಿ ಅತಿ ಹೆಚ್ಚು ದೂರ ಪ್ರಯಾಣಿಸಿದ ಅಪರೂಪದ ಜೈವಿಕ ವಸ್ತುಗಳು ಎಂಬ ಹೆಗ್ಗಳಿಕೆಗೆ ಪಾತ್ರವಾದವು.
ಭೂಮಿಗೆ ಬಂದಾಗ ಸಂಭವಿಸಿದ ಆಕಸ್ಮಿಕ ಅಪಘಾತ
ಬಾಹ್ಯಾಕಾಶ ಯಾನ ಮುಗಿಸಿ ಭೂಮಿಗೆ ಮರಳಿದ ನಂತರ ವಿಜ್ಞಾನಿಗಳಿಗೆ ದೊಡ್ಡ ಆಘಾತ ಕಾದಿತ್ತು. ಪರೀಕ್ಷಾಗಾರದಲ್ಲಿ ಪರಿಶೀಲನೆ ನಡೆಸುವಾಗ ಬೀಜಗಳಿದ್ದ ಕಂಟೈನರ್ಗಳು ಆಕಸ್ಮಿಕವಾಗಿ ಸ್ಫೋಟಗೊಂಡು ಸೀಳುಬಿಟ್ಟವು. ಇದರಿಂದ ಪ್ರಯೋಗವೇ ನಾಶವಾಯಿತು ಎಂದು ಎಲ್ಲರೂ ಭಾವಿಸಿದ್ದರು. ಆದರೆ ವಿಜ್ಞಾನಿಗಳು ಧೃತಿಗೆಡದೆ ಆ ಬೀಜಗಳನ್ನು ಸಂಗ್ರಹಿಸಿ ಮೊಳಕೆ ಬರಿಸುವ ಪರೀಕ್ಷೆಗೆ ಒಳಪಡಿಸಿದಾಗ ಆಶ್ಚರ್ಯ ಕಾದಿತ್ತು. ಬಹುತೇಕ ಎಲ್ಲ ಬೀಜಗಳು ಯಶಸ್ವಿಯಾಗಿ ಚಿಗುರಿದವು. ವಿಜ್ಞಾನಿಗಳು ಇವುಗಳನ್ನು ಸಾಮಾನ್ಯ ಬೀಜಗಳೊಂದಿಗೆ ಹೋಲಿಸಿ ನೋಡಿದಾಗ ಅವುಗಳ ಜೈವಿಕ ಗುಣಲಕ್ಷಣಗಳಲ್ಲಿ ಯಾವುದೇ ವ್ಯತ್ಯಾಸ ಕಂಡುಬರಲಿಲ್ಲ.
ಇಂದು ಈ ಅಪರೂಪದ ಮರಗಳು ಎಲ್ಲಿವೆ?
1975 ಮತ್ತು 1976ರ ಅವಧಿಯಲ್ಲಿ ಅಮೆರಿಕದ ಸ್ವಾತಂತ್ರ್ಯದ ದ್ವಿಶತಮಾನೋತ್ಸವದ ಅಂಗವಾಗಿ ಈ ಸಸಿಗಳನ್ನು ಶ್ವೇತಭವನ, ನಾಸಾ ಕೇಂದ್ರಗಳು, ಪ್ರಮುಖ ವಿಶ್ವವಿದ್ಯಾಲಯಗಳು ಮತ್ತು ಉದ್ಯಾನವನಗಳಲ್ಲಿ ನೆಡಲಾಯಿತು. ಕೆಲವು ಸಸಿಗಳನ್ನು ಜಪಾನ್, ಬ್ರೆಜಿಲ್ ಹಾಗೂ ಸ್ವಿಟ್ಜರ್ಲೆಂಡ್ ದೇಶಗಳಿಗೂ ಉಡುಗೊರೆಯಾಗಿ ನೀಡಲಾಯಿತು. ಆದರೆ, ಅಂದು ನಾಸಾ ಇವುಗಳ ಅಧಿಕೃತ ಮಾಸ್ಟರ್ ರೆಕಾರ್ಡ್ ಇಟ್ಟುಕೊಳ್ಳದ ಕಾರಣ, ಪ್ರಸ್ತುತ ಎಷ್ಟು 'ಮೂನ್ ಟ್ರೀಸ್' ಜೀವಂತವಾಗಿವೆ ಎಂಬ ನಿಖರ ಮಾಹಿತಿ ಲಭ್ಯವಿಲ್ಲ.
ಜನರು ಇವುಗಳನ್ನು ಗುರುತಿಸದಿರಲು ಕಾರಣವೇನು?
ಈ ಮರಗಳು ಚಂದ್ರನ ಕಕ್ಷೆ ಸುತ್ತಿ ಬಂದಿದ್ದರೂ, ನೋಡಲು ಭೂಮಿಯ ಸಾಮಾನ್ಯ ಮರಗಳಂತೆಯೇ ಕಾಣುತ್ತವೆ. ಇವುಗಳ ಎಲೆ ಅಥವಾ ಗಾತ್ರದಲ್ಲಿ ಯಾವುದೇ ವಿಚಿತ್ರ ಬದಲಾವಣೆಗಳಿಲ್ಲ. ಮರದ ಕೆಳಗೆ ಹಾಕಲಾಗಿರುವ ಸಣ್ಣ ಮಾಹಿತಿ ಫಲಕಗಳನ್ನು ಗಮನಿಸದ ಹೊರತು, ಇದರ ಕೆಳಗೆ ನಿಲ್ಲುವ ಕೋಟ್ಯಂತರ ಜನರಿಗೆ ತಾವೊಂದು ಬಾಹ್ಯಾಕಾಶದ ಜೀವಂತ ಇತಿಹಾಸದ ನೆರಳಿನಲ್ಲಿ ನಿಂತಿದ್ದೇವೆ ಎಂಬುದು ತಿಳಿಯುವುದೇ ಇಲ್ಲ.
ಅಪೊಲೊ 14ರ ಈ ಯಶಸ್ಸಿನಿಂದ ಪ್ರೇರಿತವಾಗಿರುವ ನಾಸಾ, ಇತ್ತೀಚಿನ ತನ್ನ ಬಿಗ್ ಬಜೆಟ್ 'ಆರ್ಟೆಮಿಸ್ 1' (Artemis I) ಮಿಷನ್ನಲ್ಲೂ ಸಹ ಸಾವಿರಾರು ಮರಗಳ ಬೀಜಗಳನ್ನು ಬಾಹ್ಯಾಕಾಶಕ್ಕೆ ಕಳುಹಿಸಿ ಮರಳಿ ತಂದಿದೆ. ಈ ಹೊಸ ತಲೆಮಾರಿನ "ಆರ್ಟೆಮಿಸ್ ಮೂನ್ ಟ್ರೀ" ಸಸಿಗಳನ್ನು ಈಗಿನ ಶಾಲಾ-ಕಾಲೇಜು ಮತ್ತು ಸಾರ್ವಜನಿಕ ಸಂಸ್ಥೆಗಳಿಗೆ ವಿತರಿಸಲಾಗುತ್ತಿದೆ. ಆ ಮೂಲಕ ಬಾಹ್ಯಾಕಾಶ ಸಂಶೋಧನೆಯ ಇತಿಹಾಸವನ್ನು ಭೂಮಿಯ ಮಣ್ಣಿನಲ್ಲಿ ಸದಾ ಹಸಿರಾಗಿಡುವ ಪ್ರಯತ್ನ ಮುಂದುವರಿದಿದೆ.
Click it and Unblock the Notifications
Sign in with Google