ನಾವು ಸಹಿ ಹಾಕುವ ಮೊದಲ ವ್ಯಾಪಾರ ಒಪ್ಪಂದಗಳಲ್ಲಿ ಭಾರತವೂ ಒಂದು: ಅಮೇರಿಕಾ

ಅಮೇರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪರಸ್ಪರ ಸುಂಕಗಳನ್ನು ತಪ್ಪಿಸಲು ಅಮೆರಿಕದೊಂದಿಗೆ ದ್ವಿಪಕ್ಷೀಯ ವ್ಯಾಪಾರ ಒಪ್ಪಂದವನ್ನು ಅಂತಿಮಗೊಳಿಸುವ ಮೊದಲ ದೇಶಗಳಲ್ಲಿ ಭಾರತವೂ ಒಂದಾಗುವ ಸಾಧ್ಯತೆಯಿದೆ ಎಂದು ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಹೇಳಿದ್ದಾರೆ. ಟ್ರಂಪ್ ಅವರ ಇತರ ದೇಶಗಳೊಂದಿಗಿನ ವ್ಯಾಪಾರ ಮಾತುಕತೆಗಳ ಇತ್ತೀಚಿನ ಬೆಳವಣಿಗೆಗಳ ಕುರಿತು ಚರ್ಚಿಸಲು ಸಿಎನ್‌ಬಿಸಿಯ ಸ್ಕ್ವಾಕ್ ಬಾಕ್ಸ್‌ಗೆ ನೀಡಿದ ಸಂದರ್ಶನದಲ್ಲಿ ಬೆಸೆಂಟ್ ಈ ಹೇಳಿಕೆಗಳನ್ನು ನೀಡಿದ್ದಾರೆ.

ಜಾಗತಿಕವಾಗಿ ನಡೆಯುತ್ತಿರುವ ವ್ಯಾಪಾರ ಮಾತುಕತೆಗಳ ನಡುವೆ ಭಾರತವು ಒಪ್ಪಂದ ಮಾಡಿಕೊಳ್ಳುವ ಸಾಧ್ಯತೆಯ ಬಗ್ಗೆ ಅಮೆರಿಕ ಸುಳಿವು ನೀಡಿದೆ. ಅಮೆರಿಕದ ಪ್ರಮುಖ ವ್ಯಾಪಾರ ಪಾಲುದಾರರು ಅಮೆರಿಕದ ಹೊಸ ಸುಂಕಗಳನ್ನು ತಪ್ಪಿಸಲು ಉತ್ತಮ ಕೊಡುಗೆಗಳನ್ನು ನೀಡಿದ್ದಾರೆ ಎಂದು ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಹೇಳಿದ್ದಾರೆ. ಭಾರತದೊಂದಿಗೆ ಮೊದಲ ವ್ಯಾಪಾರ ಒಪ್ಪಂದಗಳಲ್ಲಿ ಒಂದನ್ನು ಸಹಿ ಮಾಡುವ ಸಾಧ್ಯತೆಯಿದೆ ಎಂದು ಅವರು ಹೇಳಿದ್ದಾರೆ.

ನಮ್ಮ ಏಷ್ಯಾದ ವ್ಯಾಪಾರ ಪಾಲುದಾರರೊಂದಿಗೆ ಮಾತುಕತೆಗಳು ತುಂಬಾ ಚೆನ್ನಾಗಿ ನಡೆಯುತ್ತಿವೆ. ಉಪಾಧ್ಯಕ್ಷ ವ್ಯಾನ್ಸ್ ಕಳೆದ ವಾರ ಭಾರತದಲ್ಲಿದ್ದರು. ಅವರು ಪ್ರಗತಿಯ ಬಗ್ಗೆ ಮಾತನಾಡಿದರು. ಕೊರಿಯಾ ಗಣರಾಜ್ಯದೊಂದಿಗಿನ ಮಾತುಕತೆಗಳು ತುಂಬಾ ಚೆನ್ನಾಗಿ ನಡೆದಿವೆ ಎಂದು ನಾನು ಉಲ್ಲೇಖಿಸಿದ್ದೇನೆ. ನಮ್ಮ ಜಪಾನಿನ ಮಿತ್ರರಾಷ್ಟ್ರಗಳೊಂದಿಗೆ ನಾವು ಕೆಲವು ಗಣನೀಯ ಮಾತುಕತೆಗಳನ್ನು ನಡೆಸಿದ್ದೇವೆ ಎಂದು ಬೆಸೆಂಟ್ ಹೇಳಿದ್ದಾರೆ.

ಡೊನಾಲ್ಡ್‌ ಟ್ರಂಪ್ ಅವರು 10 ಪ್ರತಿಶತದಷ್ಟು ಸುಂಕಗಳನ್ನು ಜಾರಿಗೆ ತರುವುದಾಗಿ ಹಾಗೂ ವೈಯಕ್ತಿಕ ವ್ಯಾಪಾರ ಪಾಲುದಾರರ ವಿರುದ್ಧ 90 ದಿನಗಳವರೆಗೆ ಹೆಚ್ಚು ಆಕ್ರಮಣಕಾರಿ ಸುಂಕಗಳನ್ನು ವಿರಾಮಗೊಳಿಸುವುದಾಗಿ ಘೋಷಿಸಿದ್ದರು. ಆಗಿನಿಂದಲೂ ಅಮೆರಿಕ ತನ್ನ ಮಾತುಕತೆಗಳಲ್ಲಿ ಪ್ರಗತಿ ಸಾಧಿಸಿದೆ ಎಂದು ಬೆಸೆಂಟ್ ಹೇಳಿದ್ದಾರೆ. ಮುಂಬರುವ ದಿನಗಳಲ್ಲಿ ಮಾತುಕತೆಗಳ ವಿಷಯವಾಗಿರುವ 15ರಿಂದ 18 ಪ್ರಮುಖ ವ್ಯಾಪಾರ ಸಂಬಂಧಗಳಲ್ಲಿ ಭಾರತವನ್ನು ಸಂಭಾವ್ಯ ಒಪ್ಪಂದಕ್ಕಾಗಿ ಪ್ರತ್ಯೇಕಿಸಿದ್ದಾರೆ ಎಂದು ಸಿಎನ್‌ಬಿಸಿ ವರದಿ ಮಾಡಿದೆ.

ಅನೇಕ ದೇಶಗಳು ಮುಂದೆ ಬಂದು ನಮಗೆ ಕೆಲವು ಉತ್ತಮ ಪ್ರಸ್ತಾಪಗಳನ್ನು ಮಂಡಿಸಿವೆ. ನಾವು ಅವುಗಳನ್ನು ಮೌಲ್ಯಮಾಪನ ಮಾಡುತ್ತಿದ್ದೇವೆ. ನಾವು ಸಹಿ ಹಾಕುವ ಮೊದಲ ವ್ಯಾಪಾರ ಒಪ್ಪಂದಗಳಲ್ಲಿ ಭಾರತವೂ ಒಂದು ಎಂದು ನಾನು ಭಾವಿಸುತ್ತೇನೆ. ನಾವು ಅವರಿಗೆ ಮಾರಾಟ ಮಾಡುವುದಕ್ಕಿಂತ ಐದು ಪಟ್ಟು ಹೆಚ್ಚು ಅವರು ನಮಗೆ ಮಾರಾಟ ಮಾಡುವುದರಿಂದ ಚೀನಾವು ಅದನ್ನು ಕಡಿಮೆ ಮಾಡಬೇಕು. ಆದ್ದರಿಂದ ಈ 120%, 145% ಸುಂಕಗಳು ಸಮರ್ಥನೀಯವಲ್ಲ ಎಂದೂ ಅವರು ಸಂದರ್ಶನದಲ್ಲಿ ಹೇಳಿದ್ದಾರೆ ಎಂದು ವರದಿಯಾಗಿದೆ.

ಟ್ರಂಪ್ ಅಧಿಕಾರ ವಹಿಸಿಕೊಂಡಾಗಿನಿಂದ ವಿವಿಧ ಸುಂಕಗಳನ್ನು ಜಾರಿಗೆ ತರುವ ಮೂಲಕ ಅಂತರರಾಷ್ಟ್ರೀಯ ವ್ಯಾಪಾರವನ್ನು ಶೇಕ್‌ ಮಾಡಿದ್ದಾರೆ. ಇದರಲ್ಲಿ ಕೆನಡಾ ಮತ್ತು ಮೆಕ್ಸಿಕೊ ಹೊರತುಪಡಿಸಿ ಎಲ್ಲ ರಾಷ್ಟ್ರಗಳಿಂದ ಆಮದು ಮಾಡಿಕೊಳ್ಳುವ ವಸ್ತುಗಳ ಮೇಲೆ ಶೇ 10ರಷ್ಟು ಸುಂಕ ಮತ್ತು ಚೀನಾದ ಸರಕುಗಳ ಮೇಲೆ ಶೇ 145ರಷ್ಟು ಹೊಸ ಸುಂಕಗಳು ಸೇರಿವೆ. ಚೀನಾ ತನ್ನದೇ ಆದ ಸುಂಕಗಳೊಂದಿಗೆ ಪ್ರತೀಕಾರ ತೀರಿಸಿಕೊಂಡಿದ್ದು, ಹೆಚ್ಚಿನ ರಾಷ್ಟ್ರಗಳ ಮೇಲಿನ ಹೊಸ ಸುಂಕಗಳು ಜುಲೈ 8ರಂದು ಶುರುವಾಗಲಿದೆ.

English summary

U.S. Treasury Secretary Scott Bessent indicates that India may be among the first to finalise a trade deal with the U.S. to avoid tariffs by President Trump.