360 ಡಿಗ್ರಿ ವಿಆರ್ ವೈಶಿಷ್ಟ್ಯದೊಂದಿಗೆ 75ನೇ ಸ್ವಾತಂತ್ರ್ಯ ಕಾರ್ಯಕ್ರಮ ವೀಕ್ಷಿಸಿ
ನವೆಹಲಿ, ಆಗಸ್ಟ್ 13: 1947 ಆಗಸ್ಟ್ 15 ಮಧ್ಯರಾತ್ರಿ 12 ಗಂಟೆಗೆ ಭಾರತಕ್ಕೆ ಸ್ವಾತಂತ್ರ್ಯ ಸಿಕ್ಕಿತು. ಇದರ ಅಂಗವಾಗಿ ಈ ವರ್ಷ ಭಾರತ 75ನೇ ಸ್ವಾತಂತ್ರ್ಯ ದಿನಾಚರಣೆ ಅಂದರೆ ಅಮೃತ ಮಹೋತ್ಸವ ಆಚರಿಸಿಕೊಳ್ಳುತ್ತಿದೆ.
ಇದೇ ವೇಳೆ ಭಾರತ ಸರ್ಕಾರವು ಈ ವರ್ಷ 75ನೇ ಸ್ವಾತಂತ್ರ್ಯ ದಿನಾಚರಣೆಗಾಗಿ ಹೊಸ ವೆಬ್ಸೈಟ್ ಅನ್ನು ಅನಾವರಣಗೊಳಿಸಿದೆ. ಈ ವರ್ಷದ ಸ್ವಾತಂತ್ರ್ಯ ದಿನಾಚರಣೆಯ ಅಂಗವಾಗಿ ರಕ್ಷಣಾ ಕಾರ್ಯದರ್ಶಿ ಡಾ. ಅಜಯ್ ಕುಮಾರ್ ಆಗಸ್ಟ್ 3 ರಂದು ನವದೆಹಲಿಯಲ್ಲಿ 75ನೇ ಸ್ವಾತಂತ್ರ್ಯ ದಿನಾಚರಣೆ 2021 (IDC 2021), indianidc2021.mod.gov.in ಎಂಬ ವೆಬ್ಸೈಟ್ಗೆ ಚಾಲನೆ ನೀಡಿದ್ದಾರೆ.
ಅಧಿಕೃತ ಸರ್ಕಾರಿ ಪ್ರಕಟಣೆಗಳ ಪ್ರಕಾರ ಈ ವೆಬ್ಸೈಟ್ ರಾಷ್ಟ್ರೀಯ ಹಬ್ಬವನ್ನು ಆಚರಿಸಲು ಪ್ರಪಂಚದಾದ್ಯಂತದ ಭಾರತೀಯರನ್ನು ಸಂಪರ್ಕಿಸುವ ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ. ಐಡಿಸಿ 2021 ಪ್ಲಾಟ್ಫಾರ್ಮ್ನ ಮೊಬೈಲ್ ಅಪ್ಲಿಕೇಶನ್ ಮುಂದಿನ ದಿನಗಳಲ್ಲಿ ಬಿಡುಗಡೆಯಾಗಲಿದೆ.
"ಈ ಮಹತ್ವದ 75ನೇ ಸ್ವಾತಂತ್ರ್ಯ ದಿನದ ಸಂದರ್ಭವನ್ನು ಆಚರಿಸಲು ಮತ್ತು ಭಾರತೀಯರು ಎಂಬ ಸಾಮಾನ್ಯ ಗುರುತಿನ ಅಡಿಯಲ್ಲಿ ಒಂದಾಗಲು ಜನಸಾಮಾನ್ಯರಲ್ಲಿ ಒಗ್ಗಟ್ಟಿನ ಸಂಸ್ಕೃತಿಯನ್ನು ಅಳವಡಿಸುವ ಉದ್ದೇಶವನ್ನು ವೇದಿಕೆ ಹೊಂದಿದೆ," ಎಂದು ಕುಮಾರ್ ಹೇಳಿದ್ದಾರೆ.
ನವದೆಹಲಿಯ ಕೆಂಪು ಕೋಟೆಯಿಂದ ಸ್ವಾತಂತ್ರ್ಯ ದಿನಾಚರಣೆಯನ್ನು 360 ಡಿಗ್ರಿ ರೂಪದಲ್ಲಿ ಪ್ರದರ್ಶಿಸಲು ವರ್ಚುವಲ್ ರಿಯಾಲಿಟಿ (ವಿಆರ್) ವೈಶಿಷ್ಟ್ಯವನ್ನು ವೆಬ್ಸೈಟ್ ಹೊಂದಿದೆ. ಇದೇ ಮೊದಲ ಬಾರಿಗೆ ಸ್ವಾತಂತ್ರ್ಯ ದಿನಾಚರಣೆಯನ್ನು ಐತಿಹಾಸಿಕ ಕೆಂಪು ಕೋಟೆಯಿಂದ ಆಗಸ್ಟ್ 15, 2021 ರಂದು ವರ್ಚುವಲ್ ರಿಯಾಲಿಟಿ (ವಿಆರ್) 360 ಡಿಗ್ರಿ ರೂಪದಲ್ಲಿ ಲೈವ್ ಸ್ಟ್ರೀಮ್ ಆಗಲಿದೆ. ಜನರು ಈ ವೈಶಿಷ್ಟ್ಯವನ್ನು ವಿಆರ್ ಗ್ಯಾಜೆಟ್ನೊಂದಿಗೆ ಅಥವಾ ಇಲ್ಲದೆ ಬಳಸಬಹುದು ಎಂದು ರಕ್ಷಣಾ ಇಲಾಖೆಯ ಪ್ರಕಟಣೆಯಲ್ಲಿ ಹೇಳಿದೆ.
ವಿಶೇಷ ಐಡಿಸಿ ರೇಡಿಯೋ, ಗ್ಯಾಲರಿ, ಇಂಟರಾಕ್ಟಿವ್ ಫಿಲ್ಟರ್ಗಳು, ಶೌರ್ಯ ಕಾರ್ಯಗಳ ಇ- ಪುಸ್ತಕಗಳು, 1971ರ ಯುದ್ಧ ವಿಜಯದ 50 ವರ್ಷಗಳು ಮತ್ತು ಸ್ವಾತಂತ್ರ್ಯ ಚಳುವಳಿ, ಯುದ್ಧಗಳು ಮತ್ತು ಯುದ್ಧ ಸ್ಮಾರಕಗಳ ಬ್ಲಾಗ್ಗಳಂತಹ ವೈಶಿಷ್ಟ್ಯಗಳು ವೆಬ್ಸೈಟ್ನಲ್ಲಿ ಸಿಗಲಿದೆ.
ಸ್ವಾತಂತ್ರ್ಯ ದಿನದ ಕಾರ್ಯಕ್ರಮಕ್ಕೆ ಸಂಬಂಧಿಸಿದ ಮಾಹಿತಿ, ಪ್ರತಿ ನಿಮಿಷದ ಕಾರ್ಯಕ್ರಮ, ಮಾರ್ಗ ನಕ್ಷೆ, ಪಾರ್ಕಿಂಗ್ ವಿವರಗಳು, ಆರ್ಎಸ್ವಿಪಿ ಮತ್ತು ಇತರ ಚಟುವಟಿಕೆಗಳ ವಿವರಗಳನ್ನು ತಿಳಿದುಕೊಳ್ಳಲು ನಾಗರಿಕರು ಲಾಗಿನ್ ಮಾಡಬಹುದು. ಈ ಸಂದರ್ಭವನ್ನು ಗುರುತಿಸಲು ವಿವಿಧ ಸಚಿವಾಲಯಗಳು ಕೈಗೊಂಡ ಎಲ್ಲಾ ಉಪಕ್ರಮಗಳ ಕಾರ್ಯಕ್ರಮ ಕ್ಯಾಲೆಂಡರ್ ಕೂಡ ವೇದಿಕೆಯಲ್ಲಿ ಲಭ್ಯವಿದೆ ಎಂದು ಪ್ರಕಟಣೆ ತಿಳಿಸಿದೆ.
ವೆಬ್ ಆಧಾರಿತ ಆರ್ಎಸ್ವಿಪಿ ವ್ಯವಸ್ಥೆಯಡಿಯಲ್ಲಿ ಪ್ರತಿ ಆಹ್ವಾನ ಕಾರ್ಡ್ನಲ್ಲಿ ಕ್ಯೂಆರ್ ಕೋಡ್ ಅನ್ನು ಅಂಟಿಸಲಾಗುತ್ತದೆ. ಇದನ್ನು ಆಹ್ವಾನಿತರು ಅವರವರ ಸ್ಮಾರ್ಟ್ ಫೋನ್ ಬಳಸಿ ಸ್ಕ್ಯಾನ್ ಮಾಡಬೇಕು. ಕ್ಯೂಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡುವಾಗ, ವೆಬ್ ಲಿಂಕ್ ಕ್ರಿಯೇಟ್ ಆಗುತ್ತದೆ. ಅದರ ಮೂಲಕ ಆಹ್ವಾನಿತರನ್ನು ವೆಬ್ ಪೋರ್ಟಲ್ಗೆ ಕನೆಕ್ಟ್ ಆಗುತ್ತದೆ. ಪೋರ್ಟಲ್ನಲ್ಲಿ, ಆಹ್ವಾನಿತರು ಸಮಾರಂಭಕ್ಕೆ ಹಾಜರಾಗಲು ತಮ್ಮ ಇಚ್ಛೆಯನ್ನು ಸಲ್ಲಿಸಬಹುದು.
ಇದೇ ಸಂದರ್ಭದಲ್ಲಿ ಮಾತನಾಡಿದ ರಕ್ಷಣಾ ಕಾರ್ಯದರ್ಶಿ ಡಾ. ಅಜಯ್ ಕುಮಾರ್, ಐಡಿಸಿ 2021ರ ಪೂರ್ವದಲ್ಲಿ ಯೋಜಿಸಲಾದ ಹಲವಾರು ಚಟುವಟಿಕೆಗಳ ಬಗ್ಗೆ ವಿವರಿಸಿದ್ದಾರೆ. ಇದರಲ್ಲಿ ಮೌಂಟ್ ಮನಿರಾಂಗ್ನಲ್ಲಿ ಮಹಿಳಾ ಪರ್ವತಾರೋಹಣ, 75 ವೈದ್ಯಕೀಯ ಶಿಬಿರಗಳು ಗಡಿ ರಸ್ತೆಗಳ ಸಂಘಟನೆ (ಬಿಆರ್ಒ) ಮತ್ತು ನ್ಯಾಷನಲ್ ಕೆಡೆಟ್ ಕಾರ್ಪ್ಸ್ (NCC) ಕೆಡೆಟ್ ಗಳು ದೇಶದಾದ್ಯಂತ 75 ಸ್ಥಳಗಳಲ್ಲಿ ನಡೆಸಿದ ಚಟುವಟಿಕೆಗಳು ಇವೆ.
Click it and Unblock the Notifications
Sign in with Google