ಭಾರತದ ಟಾಪ್‌ 10 ಶ್ರೀಮಂತ ರಾಜ್ಯಗಳ ಪಟ್ಟಿ: ಕರ್ನಾಟಕದ ಸ್ಥಾನ ಏನು? ಇಲ್ಲಿವೆ ಅಂಕಿಅಂಶಗಳು

India's Top 10 Richest States: ಭಾರತದಲ್ಲಿ ಆರ್ಥಿಕ ಅಭಿವೃದ್ಧಿಯ ದೃಷ್ಟಿಯಲ್ಲಿ ಕೆಲ ರಾಜ್ಯಗಳು ಮುಂಚೂಣಿಯಲ್ಲಿವೆ. ಜಿಡಿಪಿ ಅಳತೆ ಮೂಲಕ ಪರಿಶೀಲಿಸಿದಾಗ ಈ ರಾಜ್ಯಗಳು ಕೈಗಾರಿಕೆ, ಕೃಷಿ ಮತ್ತು ಮೂಲಭೂತ ಸೌಕರ್ಯದ ಬೆಳವಣಿಗೆ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ತಮ್ಮದೇ ಆದ ಛಾಪು ಮೂಡಿಸಿವೆ. ಇದೀಗ ದೇಶದ ಟಾಪ್‌ 10 ಶ್ರೀಮಂತ ರಾಜ್ಯಗಳ ಪಟ್ಟಿ ಬಿಡುಗಡೆಯಾಗಿದೆ. ಹಾಗಾದ್ರೆ, ಕರ್ನಾಟಕದ ಸ್ಥಾನ ಏನು ಎನ್ನುವ ಮಾಹಿತಿಯನ್ನು ಇಲ್ಲಿ ನೀಡಲಾಗಿದೆ ತಿಳಿಯಿರಿ.

ಭಾರತದ ಆರ್ಥಿಕ ಬೆಳವಣಿಗೆಯಲ್ಲಿ ರಾಜ್ಯಗಳ ಪಾತ್ರ ಅತ್ಯಂತ ಮಹತ್ವದ್ದಾಗಿದೆ. 2024-25ರ ಆರ್ಥಿಕ ವರ್ಷದ ಪ್ರಸ್ತುತ ಬೆಲೆ ಅಂದಾಜಿನ ಆಧಾರದಲ್ಲಿ, ಮಹಾರಾಷ್ಟ್ರ ಮತ್ತೊಮ್ಮೆ ದೇಶದ ಅತಿದೊಡ್ಡ ರಾಜ್ಯ ಆರ್ಥಿಕತೆಯಾಗಿ ಹೊರಹೊಮ್ಮಿದೆ. ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಪ್ರಕಟಿಸಿರುವ ರಾಜ್ಯಗಳ ಅಂಕಿಅಂಶಗಳ ಪ್ರಕಾರ, ಮಹಾರಾಷ್ಟ್ರದ ಒಟ್ಟು ರಾಜ್ಯ ದೇಶೀಯ ಉತ್ಪನ್ನ (GSDP) ಸುಮಾರು ₹45.31 ಲಕ್ಷ ಕೋಟಿ ಎಂದು ಅಂದಾಜಿಸಲಾಗಿದೆ. ಕೈಗಾರಿಕೆ, ಸೇವಾ ಕ್ಷೇತ್ರ ಮತ್ತು ಹೂಡಿಕೆ ಆಕರ್ಷಣೆಯಲ್ಲಿ ರಾಜ್ಯ ಮೊದಲ ಸ್ಥಾನದಲ್ಲಿದೆ.

ದ್ವಿತೀಯ ಸ್ಥಾನದಲ್ಲಿ ತಮಿಳುನಾಡು (₹31.1 ಲಕ್ಷ ಕೋಟಿ) ಇದ್ದು, ಮೂರನೇ ಸ್ಥಾನದಲ್ಲಿ ಉತ್ತರ ಪ್ರದೇಶ (₹29.7 ಲಕ್ಷ ಕೋಟಿ) ಏರಿದೆ. ಗಮನಾರ್ಹ ಸಂಗತಿಯೆಂದರೆ, ಉತ್ತರ ಪ್ರದೇಶವು ಉತ್ತಮ ಆರ್ಥಿಕತೆ ಹೊಂದುವ ಮೂಲಕ ಕರ್ನಾಟಕವನ್ನು (₹28.8 ಲಕ್ಷ ಕೋಟಿ) ಹಿಂದಿಕ್ಕಿ ಮೂರನೇ ಅತಿದೊಡ್ಡ ರಾಜ್ಯ ಆರ್ಥಿಕತೆಯಾಗಿ ಹೊರಹೊಮ್ಮಿದೆ. ಪಶ್ಚಿಮ ಬಂಗಾಳ ₹18.15 ಲಕ್ಷ ಕೋಟಿಯೊಂದಿಗೆ ಐದನೇ ಸ್ಥಾನದಲ್ಲಿದೆ.

6ರಿಂದ 10ನೇ ಸ್ಥಾನಗಳ ಪಟ್ಟಿಯಲ್ಲಿ ರಾಜಸ್ಥಾನ (₹17.04 ಲಕ್ಷ ಕೋಟಿ), ತೆಲಂಗಾಣ (₹16.41 ಲಕ್ಷ ಕೋಟಿ), ಆಂಧ್ರ ಪ್ರದೇಶ (₹15.93 ಲಕ್ಷ ಕೋಟಿ), ಮಧ್ಯ ಪ್ರದೇಶ (₹15.03 ಲಕ್ಷ ಕೋಟಿ) ಮತ್ತು ದೆಹಲಿ (₹12.15 ಲಕ್ಷ ಕೋಟಿ) ಸ್ಥಾನ ಪಡೆದಿವೆ. ಈ ಅಂಕಿಅಂಶಗಳು ವಿವಿಧ ರಾಜ್ಯಗಳ ಆರ್ಥಿಕ ಚಟುವಟಿಕೆ ಮತ್ತು ಅಭಿವೃದ್ಧಿಯ ಮಟ್ಟವನ್ನು ತೋರಿಸುತ್ತವೆ.

ದೇಶದ ಟಾಪ್ 10 ಶ್ರೀಮಂತ ರಾಜ್ಯಗಳು

* ಮಹಾರಾಷ್ಟ್ರ : ₹45.31 ಲಕ್ಷ ಕೋಟಿ
* ತಮಿಳುನಾಡು : ₹31.1 ಲಕ್ಷ ಕೋಟಿ
* ಉತ್ತರ ಪ್ರದೇಶ : ₹29.7 ಲಕ್ಷ ಕೋಟಿ
* ಕರ್ನಾಟಕ : ₹28.8 ಲಕ್ಷ ಕೋಟಿ
* ಪಶ್ಚಿಮ ಬಂಗಾಳ : ₹18.15 ಲಕ್ಷ ಕೋಟಿ
* ರಾಜಸ್ಥಾನ : ₹17.04 ಲಕ್ಷ ಕೋಟಿ
* ತೆಲಂಗಾಣ : ₹16.41 ಲಕ್ಷ ಕೋಟಿ
* ಆಂಧ್ರಪ್ರದೇಶ : ₹15.93 ಲಕ್ಷ ಕೋಟಿ
* ಮಧ್ಯಪ್ರದೇಶ : ₹15.03 ಲಕ್ಷ ಕೋಟಿ
* ದೆಹಲಿ : ₹12.15 ಲಕ್ಷ ಕೋಟಿ

ಇದಕ್ಕೆ ವಿರುದ್ಧವಾಗಿ, ಆರ್ಥಿಕತೆಯ ಆಧಾರದ ಮೇಲೆ ಕೆಲವು ರಾಜ್ಯಗಳು ಹಿನ್ನಡೆಯಲ್ಲಿವೆ. ಆರ್‌ಬಿಐ ದತ್ತಾಂಶದ ಪ್ರಕಾರ, ಅರುಣಾಚಲ ಪ್ರದೇಶದ ಜಿಎಸ್‌ಡಿಪಿ ಕೇವಲ ₹4,423 ಕೋಟಿ ಆಗಿದ್ದು, ಆರ್ಥಿಕ ಗಾತ್ರದ ದೃಷ್ಟಿಯಿಂದ ಕಡಿಮೆ ಸ್ಥಾನದಲ್ಲಿದೆ. ತ್ರಿಪುರ (₹8,968 ಕೋಟಿ), ಹಿಮಾಚಲ ಪ್ರದೇಶ (₹23,169 ಕೋಟಿ), ಜಮ್ಮು ಮತ್ತು ಕಾಶ್ಮೀರ (₹26,246 ಕೋಟಿ) ಹಾಗೂ ಉತ್ತರಾಖಂಡ (₹37,824 ಕೋಟಿ) ಕೂಡ ಆರ್ಥಿಕ ಗಾತ್ರದಲ್ಲಿ ತಗ್ಗಿದ ರಾಜ್ಯಗಳ ಪಟ್ಟಿಯಲ್ಲಿ ಸೇರಿವೆ.

ಆರ್ಥಿಕತೆಯಲ್ಲಿ ಹಿಂದುಳಿದ ರಾಜ್ಯಗಳು

* ಅರುಣಾಚಲ ಪ್ರದೇಶ : ₹4,423 ಕೋಟಿ
* ತ್ರಿಪುರ : ₹8,968 ಕೋಟಿ
* ಹಿಮಾಚಲ ಪ್ರದೇಶ : ₹23,169 ಕೋಟಿ
* ಜಮ್ಮು ಮತ್ತು ಕಾಶ್ಮೀರ: ₹26,246 ಕೋಟಿ
* ಉತ್ತರಾಖಂಡ : ₹37,824 ಕೋಟಿ

ಒಟ್ಟಿನಲ್ಲಿ ಹೇಳುವುದಾದರೆ, ಭಾರತವು ಜಾಗತಿಕ ಮಟ್ಟದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಯಾಗಿ ಹೊರಹೊಮ್ಮುತ್ತಿದೆ. ಈ ನಡುವೆ ರಾಜ್ಯಗಳ ನಡುವಿನ ಆರ್ಥಿಕ ವ್ಯತ್ಯಾಸಗಳು ಸ್ಪಷ್ಟವಾಗಿ ಗೋಚರಿಸುತ್ತವೆ. ಬಹುತೇಕ ದಕ್ಷಿಣ ಹಾಗೂ ಮಧ್ಯ ಭಾರತದ ರಾಜ್ಯಗಳು ಲಕ್ಷ ಕೋಟಿ ಮೌಲ್ಯದ ಆರ್ಥಿಕತೆಯನ್ನು ಹೊಂದಿದ್ದರೆ, ಇನ್ನೂ ಉತ್ತರದ ಕೆಲ ರಾಜ್ಯಗಳು ಆರ್ಥಿಕತೆಯಲ್ಲಿ ಸಂಪೂರ್ಣವಾಗಿ ಕುಸಿದಿರುವುದು ಕಂಡುಬಂದಿದೆ. ಆದರೂ, ಸಮತೋಲನಾಭಿವೃದ್ಧಿ ಮತ್ತು ಹೂಡಿಕೆಗಳ ಮೂಲಕ ಈ ವ್ಯತ್ಯಾಸವನ್ನು ಕಡಿಮೆ ಮಾಡುವ ಪ್ರಯತ್ನಗಳು ಮುಂದುವರೆದಿವೆ ಎನ್ನಲಾಗುತ್ತಿದೆ.

English summary

India’s latest GDP data for 2024-25 highlights the top 10 richest states driving the nation’s economic growth. Do you know what rank of Karnataka? Here see Complete List and Statistics details.