ವಾಹನ ಸವಾರರಿಗೆ ಮತ್ತೆ ಶಾಕ್: ಕಳೆದ 10 ದಿನಗಳಲ್ಲಿ 4ನೇ ಬಾರಿ ಏರಿಕೆ ಕಂಡ ಪೆಟ್ರೋಲ್, ಡೀಸೆಲ್ ಬೆಲೆ

Published: Monday, May 25, 2026, 7:29 [IST]

ನವದೆಹಲಿ: ವಾಹನ ಸವಾರರಿಗೆ ಮತ್ತೊಮ್ಮೆ ಆಘಾತ ಎದುರಾಗಿದ್ದು, ದೇಶಾದ್ಯಂತ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯಲ್ಲಿ ಮತ್ತೆ ಏರಿಕೆಯಾಗಿದೆ. ಕೇವಲ ಎರಡು ವಾರಗಳ ಅಂತರದಲ್ಲಿ (ಸರಿಸುಮಾರು 10 ದಿನಗಳಲ್ಲಿ) ಇದು 4ನೇ ಬಾರಿಗೆ ಆಗಿರುವ ಇಂಧನ ಬೆಲೆ ಹೆಚ್ಚಳವಾಗಿದೆ. ಈ ನಿರಂತರ ಬೆಲೆ ಏರಿಕೆಯು ಜನಸಾಮಾನ್ಯರ ಜೇಬಿಗೆ ಕತ್ತರಿ ಹಾಕುತ್ತಿದ್ದು, ದೈನಂದಿನ ಅಗತ್ಯ ವಸ್ತುಗಳ ಬೆಲೆ ಏರಿಕೆಗೂ ಕಾರಣವಾಗುವ ಆತಂಕವನ್ನು ಸೃಷ್ಟಿಸಿದೆ.

ರಾಷ್ಟ್ರ ರಾಜಧಾನಿ ನವದೆಹಲಿಯಲ್ಲಿ ಪೆಟ್ರೋಲ್ ಬೆಲೆ ಲೀಟರ್‌ಗೆ 102.12 ರೂ. ತಲುಪಿದ್ದರೆ, ಡೀಸೆಲ್ ದರ ಲೀಟರ್‌ಗೆ 95.20 ರೂ.ಗೆ ಮಾರಾಟವಾಗುತ್ತಿದೆ. ರಾಜ್ಯದ ವಿವಿಧೆಡೆ ಇರುವ ಪೆಟ್ರೋಲ್ ಬಂಕ್ ಹೊಸ ದರಗಳು ಈಗಾಗಲೇ ಜಾರಿಗೆ ಬಂದಿದ್ದು, ಬೆಲೆ ಏರಿಕೆಯ ಬಿಸಿ ಗ್ರಾಹಕರಿಗೆ ತಟ್ಟಿದೆ. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆಯಲ್ಲಿನ ಏರಿಳಿತಗಳೇ ಈ ಸತತ ದರ ಹೆಚ್ಚಳಕ್ಕೆ ಪ್ರಮುಖ ಕಾರಣ ಎಂದು ತೈಲ ಮಾರುಕಟ್ಟೆ ಕಂಪನಿಗಳು ತಿಳಿಸಿವೆ.

ಮೇ 25, 2026 ರಂದು ಪ್ರಮುಖ ಮೆಟ್ರೋ ನಗರಗಳಲ್ಲಿನ ಪೆಟ್ರೋಲ್ (MS) ರಿಟೇಲ್ ಮಾರಾಟ ದರ (RSP) ಈ ಕೆಳಗಿನಂತಿದೆ

ದೆಹಲಿ: ಲೀಟರ್‌ಗೆ 102.12 ರೂ. (+2.61 ರೂ. ಹೆಚ್ಚಳ)

ಕೋಲ್ಕತ್ತಾ: ಲೀಟರ್‌ಗೆ 113.51 ರೂ. (+2.87 ರೂ. ಹೆಚ್ಚಳ)

ಮುಂಬೈ: ಲೀಟರ್‌ಗೆ 111.21 ರೂ. (+2.72 ರೂ. ಹೆಚ್ಚಳ)

ಚೆನ್ನೈ: ಲೀಟರ್‌ಗೆ 107.77 ರೂ. (+2.46 ರೂ. ಹೆಚ್ಚಳ)

ಬೆಂಗಳೂರು: ಲೀಟರ್‌ಗೆ 108.09 ರೂ.

ಹೈ-ಸ್ಪೀಡ್ ಡೀಸೆಲ್ ದರಗಳು ಈ ಕೆಳಗಿನಂತಿವೆ

ದೆಹಲಿ: ಲೀಟರ್‌ಗೆ 95.20 ರೂ. (+2.71 ರೂ. ಹೆಚ್ಚಳ)

ಕೋಲ್ಕತ್ತಾ: ಲೀಟರ್‌ಗೆ 99.82 ರೂ. (+2.80 ರೂ. ಹೆಚ್ಚಳ)

ಮುಂಬೈ: ಲೀಟರ್‌ಗೆ 97.83 ರೂ. (+2.81 ರೂ. ಹೆಚ್ಚಳ)

ಚೆನ್ನೈ: ಲೀಟರ್‌ಗೆ 99.55 ರೂ. (+2.57 ರೂ. ಹೆಚ್ಚಳ)

ಬೆಂಗಳೂರು: ಲೀಟರ್‌ಗೆ 95.99 ರೂ.

ಕರ್ನಾಟಕದ ರಾಜಧಾನಿ ಬೆಂಗಳೂರಿನಲ್ಲಿ ಇಂದು ಪೆಟ್ರೋಲ್ ದರ ಲೀಟರ್‌ಗೆ 108.09 ರೂ. ಇದ್ದರೆ, ಡೀಸೆಲ್ ದರ ಲೀಟರ್‌ಗೆ 95.99 ರೂ. ಇದೆ. ವಾಹನ ಸವಾರರು ಪ್ರತಿದಿನ ಬೆಳಿಗ್ಗೆ 6 ಗಂಟೆಗೆ ಪರಿಷ್ಕರಣೆಯಾಗುವ ಹೊಸ ದರಗಳ ಬಗ್ಗೆ ಗಮನ ಹರಿಸುವುದು ಸೂಕ್ತ.

ಪೆಟ್ರೋಲ್ ಮತ್ತು ಡೀಸೆಲ್ ಮೇಲಿನ ಅಬಕಾರಿ ಸುಂಕ ಹಾಗೂ ಸ್ಥಳೀಯ ಮೌಲ್ಯವರ್ಧಿತ ತೆರಿಗೆ ರಾಜ್ಯದಿಂದ ರಾಜ್ಯಕ್ಕೆ ಬದಲಾಗುವುದರಿಂದ ವಿವಿಧ ನಗರಗಳಲ್ಲಿ ಇಂಧನ ಬೆಲೆಗಳಲ್ಲಿ ವ್ಯತ್ಯಾಸವಿರುತ್ತದೆ. ದೈನಂದಿನ ಬೆಲೆ ಪರಿಷ್ಕರಣೆ ನೀತಿಯ ಅಡಿಯಲ್ಲಿ, ತೈಲ ಕಂಪನಿಗಳು ಪ್ರತಿದಿನ ಬೆಳಿಗ್ಗೆ ಇಂಧನ ದರಗಳನ್ನು ನವೀಕರಿಸುತ್ತವೆ. ಸತತ ನಾಲ್ಕನೇ ಬಾರಿಗೆ ಬೆಲೆ ಏರಿಕೆಯಾಗಿರುವುದು ಸಾರಿಗೆ ವಲಯದ ಮೇಲೂ ನೇರ ಪರಿಣಾಮ ಬೀರಲಿದ್ದು, ಸರಕು ಸಾಗಣೆ ವೆಚ್ಚ ಹೆಚ್ಚಾಗುವ ಸಾಧ್ಯತೆ ಇದೆ. ಇದರಿಂದಾಗಿ ಮುಂದಿನ ದಿನಗಳಲ್ಲಿ ತರಕಾರಿ ಹಾಗೂ ದಿನಸಿ ವಸ್ತುಗಳ ಬೆಲೆಯೂ ದುಬಾರಿಯಾಗುವ ಭೀತಿ ಜನಸಾಮಾನ್ಯರನ್ನು ಕಾಡುತ್ತಿದೆ. ತೈಲ ಬೆಲೆ ಇಳಿಕೆಗೆ ಸರ್ಕಾರ ಸೂಕ್ತ ಕ್ರಮ ಕೈಗೊಳ್ಳಬೇಕೆಂಬ ಕೂಗು ಸಾರ್ವಜನಿಕ ವಲಯದಲ್ಲಿ ಜೋರಾಗಿದೆ.

Published On May 25, 2026