ಮೇ 23ಕ್ಕೆ 5ರಿಂದ 10 ರುಪಾಯಿ ತೈಲ ಬೆಲೆ ಏರಿಕೆಗೆ ನಡೆದಿದೆಯಂತೆ ಸಿದ್ಧತೆ!
ನವದೆಹಲಿ, ಏಪ್ರಿಲ್ 23: ಇರಾನ್ ನಿಂದ ಭಾರತಕ್ಕೆ ಕಚ್ಚಾ ತೈಲ ಆಮದು ಮಾಡಿಕೊಳ್ಳಲು ಇಷ್ಟು ಸಮಯ ವಿನಾಯಿತಿ ನೀಡಿದ್ದ ಅಮೆರಿಕ, ಅದನ್ನು ಕೊನೆ ಮಾಡಲಿದೆ. ಮೇ ತಿಂಗಳಿಂದ ಇರಾನ್ ನಿಂದ ತೈಲ ಖರೀದಿ ಮುಂದುವರಿಸಿದರೆ ಅಮೆರಿಕವು ದಿಗ್ಬಂಧನ ಹೇರಲಿದೆ. ಕಾಂಗ್ರೆಸ್ ಈಗ ಪ್ರಧಾನಿ ಮೋದಿ ಮೇಲೆ ಆರೋಪ ಮಾಡಿದ್ದು, ಮೇ 23ರ ನಂತರ ಪೆಟ್ರೋಲ್-ಡೀಸೆಲ್ ದರ ಏರಿಸುವಂತೆ ತೈಲ ಕಂಪೆನಿಗಳಿಗೆ ತಿಳಿಸಿದ್ದಾರೆ ಎಂದಿದೆ.
ತಮ್ಮ ಧೈರ್ಯದ ಬಗ್ಗೆ ದಿನವೂ ಕೊಚ್ಚಿಕೊಳ್ಳುತ್ತಿದ್ದ ನರೇಂದ್ರ ಮೋದಿ ಜೀ ಈಗೇಕೆ ಮೌನವಾಗಿದ್ದಾರೆ? ದೇಶದ ಜನರಿಗೆ ಈ ವಿಚಾರವನ್ನು ತಿಳಿಸುತ್ತಿಲ್ಲ. ಜನರನ್ನು ಮರುಳು ಮಾಡಲು ಹಾಗೂ ಮತ ಸೆಳೆಯಲು ಹೀಗೆ ಮಾಡುತ್ತಿದ್ದಾರೆ ಎಂದು ಕಾಂಗ್ರೆಸ್ ಆರೋಪ ಮಾಡಿದೆ.
ಕಚ್ಚಾತೈಲ ಬೆಲೆ ಏರಿಕೆ, ಭಾರತದಲ್ಲಿ ಪೆಟ್ರೋಲ್, ಡೀಸೆಲ್ ದರ ದುಬಾರಿ
ಮೇ ಇಪ್ಪತ್ಮೂರನೇ ತಾರೀಕಿನ ತನಕ ತೈಲ ಬೆಲೆ ಏರಿಸದಂತೆ ಕಂಪೆನಿಗಳಿ ನರೇಂದ್ರ ಮೋದಿ ನಿರ್ದೇಶನ ನೀಡಿದ್ದಾರೆ ಎಂದು ಕಾಂಗ್ರೆಸ್ ವಕ್ತಾರ ರಣ್ ದೀಪ್ ಸುರ್ಜೇವಾಲಾ ಟ್ವೀಟ್ ಮಾಡಿದ್ದಾರೆ. ಫಲಿತಾಂಶ ಬಂದ ದಿನ ಪೆಟ್ರೋಲ್-ಡೀಸೆಕ್ ಐದರಿಂದ ಹತ್ತು ರುಪಾಯಿ ಏರಿಕೆ ಮಾಡಲು ಸಿದ್ಧತೆ ನಡೆದಿದೆ ಎಂದಿದ್ದಾರೆ.
ಕಳೆದ ಆರು ತಿಂಗಳಲ್ಲೇ ಗರಿಷ್ಠ ಮಟ್ಟಕ್ಕೆ ಕಚ್ಚಾ ತೈಲ ಬೆಲೆ ಏರಿಕೆ ಆಗಿದೆ. ಡಾಲರ್ ವಿರುದ್ಧ ರುಪಾಯಿ ಮೌಲ್ಯ ಎಪ್ಪತ್ತರ ಸಮೀಪ ಇದೆ. ಇರಾನ್ ನಿಂದ ತೈಲ ಆಮದು ಮಾಡಿಕೊಂಡರೆ ನಿರ್ಬಂಧ ಹೇರುವುದಾಗಿ ಅಮೆರಿಕ ತಿಳಿಸಿದೆ ಎಂದು ಸುರ್ಜೇವಾಲಾ ಹೇಳಿದ್ದಾರೆ. ದೇಶದ ತೈಲ ಅಗತ್ಯ ಮತ್ತು ಭದ್ರತೆ ವಿಚಾರದಲ್ಲಿ ಮೋದಿ 'ಮೂಕ ಪ್ರೇಕ್ಷಕ'ರಂತೆ ಕೂತಿದ್ದಾರೆ ಎಂದು ಆರೋಪ ಮಾಡಿದ್ದಾರೆ.
ಮೇ ಒಂದನೇ ತಾರೀಕಿನಿಂದ ಇರಾನ್ ನಿಂದ ತೈಲ ಆಮದು ಮಾಡಿಕೊಳ್ಳುವುದನ್ನು ನಿಲ್ಲಿಸಬೇಕು ಅಥವಾ ನಿರ್ಬಂಧ ಎದುರಿಸಬೇಕಾಗುತ್ತದೆ ಎಂದು ಅಮೆರಿಕ ಎಚ್ಚರಿಸಿದೆ. ಇರಾನ್ ನಿಂದ ತೈಲ ಆಮದು ಮಾಡಿಕೊಳ್ಳುವ ಎಂಟು ಅತಿ ದೊಡ್ಡ ಗ್ರಾಹಕ ದೇಶಗಳಿಗೆ ಇಷ್ಟು ಸಮಯ ವಿನಾಯಿತಿ ನೀಡಲಾಗಿತ್ತು. ಚೀನಾ ನಂತರ ಇರಾನ್ ನಿಂದ ಅತಿ ಹೆಚ್ಚು ತೈಲ ಆಮದು ಮಾಡಿಕೊಳ್ಳುವ ದೇಶ ಭಾರತ. ಈ ವರೆಗೆ ವಿನಾಯಿತಿ ಸಿಕ್ಕಿತ್ತು.
ವಿದೇಶಾಂಗ ಸಚಿವಾಲಯದ ವಕ್ತಾರ ರವೀಶ್ ಕುಮಾರ್ ಮಾತನಾಡಿ, ಇರಾನ್ ನಿಂದ ತೈಲ ಆಮದು ನಿಲ್ಲಿಸುವ ನಿರ್ಧಾರದಿಂದ ಆಗುವ ಪರಿಣಾಮಗಳನ್ನು ಎದುರಿಸಲು ಸಿದ್ಧವಾಗಿದ್ದೇವೆ ಎಂದು ಹೇಳಿದ್ದಾರೆ.