Gold: ದಾಖಲೆ ಮಟ್ಟಕ್ಕೆ ಏರಿದ ಬೆಲೆ; ಈ ವರ್ಷ ಚಿನ್ನದ ಬೇಡಿಕೆ ಕುಸಿಯುವ ಸಾಧ್ಯತೆ

ಭಾರತದಲ್ಲಿ ಚಿನ್ನದ ಬೆಲೆಗಳು ಇತ್ತೀಚಿನ ವರ್ಷಗಳಲ್ಲಿ ದಾಖಲೆಯ ಮಟ್ಟಕ್ಕೆ ಏರಿಕೆಯಾಗಿದ್ದು, ಇದೇ ಪ್ರವೃತ್ತಿ ಮುಂದುವರಿದರೆ 2026ರಲ್ಲಿ ಚಿನ್ನದ ಒಟ್ಟು ಬೇಡಿಕೆ ಮತ್ತಷ್ಟು ಕುಸಿಯುವ ಸಾಧ್ಯತೆ ಇದೆ ಎಂದು ವರ್ಲ್ಡ್‌ ಗೋಲ್ಡ್‌ ಕೌನ್ಸಿಲ್‌ (WGC) ಎಚ್ಚರಿಕೆ ನೀಡಿದೆ. ಈಗಾಗಲೇ 2025ರಲ್ಲಿ ಚಿನ್ನದ ಬೇಡಿಕೆ ಶೇ.11ರಷ್ಟು ಇಳಿಕೆಯಾಗಿದೆ. ಮುಂದಿನ ವರ್ಷದಲ್ಲಿ ಭಾರತದಲ್ಲಿ ಚಿನ್ನದ ಒಟ್ಟು ಬೇಡಿಕೆ 600ರಿಂದ 700 ಮೆಟ್ರಿಕ್ ಟನ್‌ಗಳ ನಡುವಿನಲ್ಲಿರಬಹುದು ಎಂದು ಕೌನ್ಸಿಲ್‌ನ ಭಾರತದ ಕಾರ್ಯಾಚರಣೆಗಳ ಸಿಇಒ ಸಚಿನ್ ಜೈನ್ ತಿಳಿಸಿದ್ದಾರೆ.

ಇದು 2025ರಲ್ಲಿ ದಾಖಲಾಗಿದ್ದ 710.9 ಮೆಟ್ರಿಕ್ ಟನ್‌ಗಳಿಗಿಂತಲೂ ಕಡಿಮೆ ಆಗಲಿದೆ. ಕಳೆದ ಐದು ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಚಿನ್ನದ ಬೇಡಿಕೆ ಇಷ್ಟು ಕಡಿಮೆ ಮಟ್ಟ ತಲುಪಿದೆ. ಚಿನ್ನದ ಬೆಲೆ ಏರಿಕೆ ಮತ್ತು ನಿರಂತರ ಅಸ್ಥಿರತೆಯೇ ಈ ಕುಸಿತಕ್ಕೆ ಪ್ರಮುಖ ಕಾರಣ ಎಂದು ವಿಶ್ವ ಚಿನ್ನ ಮಂಡಳಿ ವಿಶ್ಲೇಷಿಸಿದೆ.

2025ರಲ್ಲಿ ದೇಶೀಯ ಮಾರುಕಟ್ಟೆಯಲ್ಲಿ ಚಿನ್ನದ ಬೆಲೆ ಶೇ.76.5ರಷ್ಟು ಏರಿಕೆಯಾಗಿದ್ದು, ಸಾಮಾನ್ಯ ಗ್ರಾಹಕರ ಖರೀದಿ ಸಾಮರ್ಥ್ಯಕ್ಕೆ ಇದು ಮೀರಿದೆ. ಅದರಲ್ಲೂ ಆಭರಣ ಖರೀದಿ ಮಾಡುವ ಮಧ್ಯಮ ಮತ್ತು ಕೆಳಮಧ್ಯಮ ವರ್ಗದ ಗ್ರಾಹಕರು ಚಿನ್ನದ ಆಭರಣಗಳನ್ನು ಖರೀದಿಸುವುದರಿಂದ ದೂರ ಉಳಿದಿದ್ದಾರೆ. ಇದರ ಪರಿಣಾಮವಾಗಿ 2025ರಲ್ಲಿ ಆಭರಣ ಚಿನ್ನದ ಬೇಡಿಕೆ ಹಿಂದಿನ ವರ್ಷದ ಹೋಲಿಕೆಗೆ ಶೇ.24ರಷ್ಟು ಕುಸಿದು, 430.5 ಮೆಟ್ರಿಕ್ ಟನ್‌ಗೆ ಇಳಿದಿದೆ. ಇದು ಸುಮಾರು ಮೂರು ದಶಕಗಳಲ್ಲೇ ಅತ್ಯಂತ ಕಡಿಮೆ ಮಟ್ಟವಾಗಿದೆ ಎಂದು ವರದಿ ತಿಳಿಸಿದೆ.

ಹೂಡಿಕೆ ಉದ್ದೇಶದ ಚಿನ್ನದ ಬೇಡಿಕೆ ಏರಿಕೆ

ಆದರೆ ಆಭರಣ ಬೇಡಿಕೆ ಕುಸಿದಿದ್ದರೂ, ಹೂಡಿಕೆ ಉದ್ದೇಶದ ಚಿನ್ನದ ಬೇಡಿಕೆಯಲ್ಲಿ ಗಮನಾರ್ಹ ಏರಿಕೆ ಕಂಡುಬಂದಿದೆ. 2025ರಲ್ಲಿ ಭಾರತೀಯ ಷೇರುಪೇಟೆ ನಿರೀಕ್ಷಿತ ಮಟ್ಟದಲ್ಲಿ ಪ್ರದರ್ಶನ ನೀಡದ ಹಿನ್ನೆಲೆಯಲ್ಲಿ ಅನೇಕ ಹೂಡಿಕೆದಾರರು ಸುರಕ್ಷಿತ ಹೂಡಿಕೆ ಆಯ್ಕೆಯಾಗಿ ಚಿನ್ನದತ್ತ ಮುಖ ಮಾಡಿದ್ದಾರೆ. ಇದರ ಪರಿಣಾಮವಾಗಿ ಚಿನ್ನದ ಬಾಂಡ್‌ಗಳು ಮತ್ತು ಚಿನ್ನದ ಇಟಿಎಫ್‌ಗಳಲ್ಲಿ ಹೂಡಿಕೆ ಗಣನೀಯವಾಗಿ ಹೆಚ್ಚಾಗಿದೆ. 2025ರಲ್ಲಿ ಚಿನ್ನದ ಇಟಿಎಫ್‌ಗಳಿಗೆ ಆಗಿರುವ ಹಣದ ಒಳಹರಿವು ಶೇ.283ರಷ್ಟು ಏರಿಕೆಯಾಗಿ ದಾಖಲೆಯ ₹44,000 ಕೋಟಿಗೆ ತಲುಪಿದೆ. ಇದೇ ಅವಧಿಯಲ್ಲಿ ಚಿನ್ನದ ಬಾಂಡ್‌ಗಳ ಹೂಡಿಕೆ ಶೇ.17ರಷ್ಟು ಹೆಚ್ಚಾಗಿ, 280.4 ಮೆಟ್ರಿಕ್ ಟನ್‌ಗೆ ಏರಿದ್ದು, ಇದು 2013ರ ನಂತರದ ಗರಿಷ್ಠ ಮಟ್ಟದ್ದು ಎನ್ನಲಾಗಿದೆ.

ವಿಶ್ವ ಚಿನ್ನ ಮಂಡಳಿ ವರದಿ ಪ್ರಕಾರ, ಭಾರತೀಯ ಗ್ರಾಹಕರಲ್ಲಿ ಈಗ ನಿಧಾನವಾಗಿ ಆದರೆ ಸ್ಪಷ್ಟವಾಗಿ ಒಂದು ಬದಲಾವಣೆ ಕಾಣಿಸುತ್ತಿದೆ. ಪರಂಪರೆಯಾಗಿ ಆಭರಣ ಖರೀದಿಗೆ ಆದ್ಯತೆ ನೀಡುತ್ತಿದ್ದ ಗ್ರಾಹಕರು ಇದೀಗ ಚಿನ್ನದ ಬಾರ್‌ಗಳು ಮತ್ತು ನಾಣ್ಯಗಳತ್ತ ಹೆಚ್ಚು ಆಸಕ್ತಿ ತೋರುತ್ತಿದ್ದಾರೆ. ಹೂಡಿಕೆ ದೃಷ್ಟಿಯಿಂದ ಇವು ಹೆಚ್ಚು ಲವಚಿಕ ಮತ್ತು ಸುರಕ್ಷಿತ ಎಂದು ಗ್ರಾಹಕರು ಪರಿಗಣಿಸುತ್ತಿದ್ದಾರೆ.

ಹಳೆಯ ಆಭರಣ ಮಾರಾಟವೂ ಕುಸಿತ

ಮತ್ತೊಂದೆಡೆ, ಚಿನ್ನದ ಬೆಲೆ ಏರಿದಾಗ ಹಳೆಯ ಆಭರಣಗಳನ್ನು ಮಾರಾಟ ಮಾಡಿ ಲಾಭ ಪಡೆಯುವ ಪದ್ಧತಿಯೂ ಇತ್ತು. ಆದರೆ 2025ರಲ್ಲಿ ಮರುಬಳಕೆಗಾಗಿ ಮಾರಾಟವಾಗುವ ಚಿನ್ನ ಶೇ.19ರಷ್ಟು ಇಳಿದು 92.7 ಮೆಟ್ರಿಕ್ ಟನ್‌ಗೆ ಕುಸಿದಿದೆ. ಮುಂದಿನ ದಿನಗಳಲ್ಲಿ ಚಿನ್ನದ ಬೆಲೆ ಇನ್ನಷ್ಟು ಏರಬಹುದು ಎಂಬ ನಿರೀಕ್ಷೆಯಿಂದ ಗ್ರಾಹಕರು ತಮ್ಮ ಹಳೆಯ ಆಭರಣಗಳನ್ನು ಮಾರಾಟ ಮಾಡುವುದನ್ನು ಮುಂದೂಡುತ್ತಿದ್ದಾರೆ ಎಂದು ಹೇಳಿದೆ.

ಭಾರತದಲ್ಲಿ ಚಿನ್ನದ ಮಾರುಕಟ್ಟೆ ಎರಡು ವಿಭಿನ್ನ ದಿಕ್ಕುಗಳಲ್ಲಿ ಸಾಗುತ್ತಿದೆ. ಒಂದು ಕಡೆ, ಆಭರಣಗಳ ಮೇಲಿನ ಪರಂಪರೆಯ ಬೇಡಿಕೆ ಬೆಲೆ ಏರಿಕೆಯ ಹೊಡೆತಕ್ಕೆ ಒಳಗಾಗಿ ಕುಸಿಯುತ್ತಿದೆ. ಇನ್ನೊಂದು ಕಡೆ, ಹೂಡಿಕೆ ರೂಪದ ಚಿನ್ನ-ಬಾಂಡ್‌ಗಳು, ಇಟಿಎಫ್‌ಗಳು, ಬಾರ್‌ಗಳು ಮತ್ತು ನಾಣ್ಯಗಳು ಹೆಚ್ಚು ಜನಪ್ರಿಯವಾಗುತ್ತಿವೆ. ಈ ಸ್ಥಿತಿಗತಿ ಮುಂದುವರಿದರೆ 2026ರಲ್ಲಿ ಚಿನ್ನದ ಒಟ್ಟು ಬೇಡಿಕೆ ಇಳಿಕೆಯಾದರೂ, ಹೂಡಿಕೆ ಚಿನ್ನದ ಪಾಲು ಹೆಚ್ಚಾಗುವ ಸಾಧ್ಯತೆ ಹೆಚ್ಚಿದೆ ಎಂದು ವಿಶ್ವ ಚಿನ್ನ ಮಂಡಳಿ ವಿಶ್ಲೇಷಿಸಿದೆ.

English summary

With gold prices at record highs, India’s total gold demand may fall to 600–700 tonnes in 2026, warns World Gold Council. Jewellery demand dips while investment in gold ETFs and bonds surges.