ಟ್ರಾಫಿಕ್ ಉಲ್ಲಂಘನೆ, ದುಬಾರಿ ಫೈನ್: ಬೆಂಗಳೂರು ಪೊಲೀಸ್ ಆಯುಕ್ತರ ಮಹತ್ವದ ಆದೇಶ

ಬೆಂಗಳೂರು, ಸೆ 2: ಕೇಂದ್ರ ಸರಕಾರ ಹೊಸದಾಗಿ ಜಾರಿಗೆ ತಂದಿರುವ ಮೋಟರ್ ವಾಹನ ಕಾಯ್ದೆ ಉಲ್ಲಂಘನೆಯ ಪರಿಸ್ಕೃತ ಜುಲ್ಮಾನೆ, ಸೆಪ್ಟಂಬರ್ ಒಂದರಿಂದ ಜಾರಿಗೆ ಬರಬೇಕಾಗಿತ್ತು. ಆದರೆ, ಬೆಂಗಳೂರಿನಲ್ಲಿ ಅದು ಕೆಲವು ದಿನದ ಮಟ್ಟಿಗೆ ಕಾರ್ಯರೂಪಕ್ಕೆ ಬರುತ್ತಿಲ್ಲ.

ಬೆಂಗಳೂರು ನಗರ ಪೊಲೀಸರಿಗೆ ಈ ಹೊಸ ಕಾನೂನು ಜಾರಿಗೆ ತರಲು ತಾಂತ್ರಿಕ ಸಮಸ್ಯೆ ಎದುರಾಗಿರುವುದರಿಂದ, ಈ ವಾರಾಂತ್ಯದೊಳಗೆ (ಸೆ 7) ಜಾರಿಗೆ ತರುವುದಾಗಿ ನಗರ ಪೊಲೀಸ್ ಆಯುಕ್ತ ಭಾಸ್ಕರ್ ರಾವ್ ಹೇಳಿದ್ದಾರೆ.

ನಿಯಮ ಉಲ್ಲಂಘನೆಗೆ ಕೇಂದ್ರ ಸರಕಾರ ಬಹುತೇಕ ಹತ್ತುಪಟ್ಟು ಹೆಚ್ಚು ದಂಡವನ್ನು ವಿಧಿಸುವ ನಿರ್ಣಯಕ್ಕೆ ಬಂದ ನಂತರ, ಹೊಸ ನಿಯಮ ಜಾರಿಗೆ ಬರಬೇಕಾಗಿತ್ತು.

ಆದರೆ, ಗಣೇಶ ಹಬ್ಬದ ವಾರಾಂತ್ಯದ ಹಿನ್ನಲೆಯಲ್ಲಿ ಅಧಿಸೂಚನೆ ಕೈಸೇರಲು ಇನ್ನೂ ಮೂರ್ನಾಲ್ಕು ದಿನ ಬೇಕಾಗಿರುವುದರಿಂದ, ಬೆಂಗಳೂರು ಪೊಲೀಸರು, ಸದ್ಯಕ್ಕೆ ಹಳೆಯ ದಂಡ ಪದ್ದತಿಯನ್ನೇ ಮುಂದುವರಿಸಲಿದ್ದಾರೆ.

" ಕೆಲವು ತಾಂತ್ರಿಕ ಸಮಸ್ಯೆಗಳು ಬಗೆಹರಿದ ನಂತರ, ಹೊಸ ನಿಯಮವನ್ನು ಜಾರಿಗೆ ತರಲಾಗುವುದು" ಎಂದು ಬೆಂಗಳೂರು ನಗರ ಪೊಲೀಸ್ ಆಯುಕ್ತರಾದ ಭಾಸ್ಕರ್ ರಾವ್ ಹೇಳಿದ್ದಾರೆ.

"ಹೊಸ ನಿಯಮದ ಪ್ರಕಾರ ದಂಡ ವಿಧಿಸಲು, ಪರ್ಸನಲ್ ಡಿಜಿಟಲ್ ಅಸಿಸ್ಟೆಂಟ್ (ಪಿಡಿಎ) ಆಪ್ ಅನ್ನು ಅಪ್ಡೇಟ್ ಮಾಡಲು ಸಂಚಾರ ಪೊಲೀಸರಿಗೆ ಕಾಲಾವಕಾಶ ಬೇಕಾಗಿದೆ" ಎಂದು ಬೆಂಗಳೂರು ಟ್ರಾಫಿಕ್ ಪೊಲೀಸರು ಹೇಳಿದ್ದಾರೆ.

ಹೊಸ ತೆರಿಗೆ ನಿಯಮಗಳು ಸೆಪ್ಟೆಂಬರ್ 01 ರಿಂದ ದೇಶದಾದ್ಯಂತ ಚಾಲ್ತಿಗೆ ಬಂದಿದೆ. ಹೊಸ ತೆರಿಗೆ ನಿಯಮಗಳು ಗ್ರಾಹಕರಿಗೆ ಇನ್ನಷ್ಟು ಹೊರೆಯನ್ನು ಹೆಚ್ಚಿಸಲಿವೆ. ಇದರಲ್ಲಿ, ಹೊಸ ಸಂಚಾರಿ ನಿಯಮ ಉಲ್ಲಂಘನೆಯ ದಂಡವೂ ಒಂದು.

English summary

New Motor Vehicle Violation Fine Structure Will Be Delayed For Couple Of Days Since There Is Some Technical Glitches, Bengaluru City Police Commissioner Bhaskar Rao.