E Khata: ಬೆಂಗಳೂರಿನ ಈ ಆಸ್ತಿದಾರರಿಗೆ ನೋಟಿಸ್ ಶಾಕ್: ಬಿಬಿಎಂಪಿ ಹೇಳಿದ್ದೇನು ?
E Khata: ಬೆಂಗಳೂರಿನಲ್ಲಿ ಕೆಲವು ನಿರ್ದಿಷ್ಟ ಆಸ್ತಿದಾರರಿಗೆ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಕಂದಾಯ ವಿಭಾಗದ ಅಧಿಕಾರಿಗಳು ಶಾಕ್ ನೀಡಿದ್ದಾರೆ ಎಂದು ಕೆಲವು ಆಸ್ತಿದಾರರು ಆಕ್ಷೇಪ ವ್ಯಕ್ತಪಡಿಸಿದ್ದರು. ಬೆಂಗಳೂರಿನ ಯಾವ ಆಸ್ತಿಗಳಿಗೆ ನೋಟಿಸ್ ನೀಡಲಾಗಿದೆ ಹಾಗೂ ಯಾವ ಕಾರಣಕ್ಕಾಗಿ ಈ ನೋಟಿಸ್ ನೀಡಲಾಗಿದೆ ಎನ್ನುವ ಬಗ್ಗೆ ಬಿಬಿಎಂಪಿಯ ಅಧಿಕಾರಿಗಳು ಮಾಹಿತಿ ಹಂಚಿಕೊಂಡಿದ್ದಾರೆ.
ಬೆಂಗಳೂರಿನಲ್ಲಿ ಪ್ರತಿಯೊಬ್ಬರು ಸಾರ್ವಜನಿಕರು ಅಥವಾ ಆಸ್ತಿದಾರರು ತಮ್ಮ ಕ್ರಯಪತ್ರದಲ್ಲಿ ನಮೂದಿಸಿರುವ ಫ್ಲ್ಯಾಟ್ ಪ್ರದೇಶಕ್ಕೆ ಆಸ್ತಿ ತೆರಿಗೆ ಪಾವತಿಸಬೇಕು. ಇದು ಫ್ಲ್ಯಾಟ್ ಖರೀದಿಸುವಾಗ ಪಾವತಿಸಿದ ಪ್ರದೇಶವೇ ಆಗಿರುತ್ತದೆ. ಪ್ರತಿ ಫ್ಲ್ಯಾಟ್ ಖರೀದಿದಾರನಿಗೂ ತಾನು ಎಷ್ಟು ಚದರ ಅಡಿ ಖರೀದಿಸಿದ್ದಾನೆ ಎಂಬುದು ಗೊತ್ತಿರುತ್ತದೆ ಮತ್ತು ಆಷ್ಟು ಪ್ರದೇಶಕ್ಕಷ್ಟೇ ತೆರಿಗೆ ಪಾವತಿಸಬೇಕು ಎಂದು ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಮುಂದುವರಿದು ಬೆಂಗಳೂರಿನಲ್ಲಿ ಕೆಲವರು ತಮ್ಮ ಕ್ರಯ ಪತ್ರದಲ್ಲಿರುವ ಪ್ರದೇಶಕ್ಕಿಂತ ಕಡಿಮೆ ಪ್ರದೇಶವನ್ನು ಆಸ್ತಿ ತೆರಿಗೆ ವ್ಯವಸ್ಥೆಯಲ್ಲಿ ಘೋಷಿಸಿದ್ದಾರೆ. ಈಗ ಇ-ಖಾತಾ ವ್ಯವಸ್ಥೆಯಲ್ಲಿ, ಕ್ರಯ ಪತ್ರಗಳು ಕಾವೇರಿ ಪೋರ್ಟಲ್ನಿಂದ ಪಡೆಯಲ್ಪಡುವುದರಿಂದ, ಕ್ರಯ ಪತ್ರದಲ್ಲಿರುವ ಪ್ರದೇಶವನ್ನು ಪಾವತಿಸಿದ ತೆರಿಗೆ ಪ್ರದೇಶದೊಂದಿಗೆ ಹೋಲಿಸಲಾಗಿದೆ. ಈ ಹೋಲಿಕೆ ಆನ್ ಲೈನ್ ಮುಖಾಂತರ ನಡೆಯುತ್ತದೆ, ಏಕೆಂದರೆ ಕಾವೇರಿ ಪೋರ್ಟಲ್ ಕ್ರಯ ಪತ್ರದಲ್ಲಿರುವ ಫ್ಲ್ಯಾಟ್ ಪ್ರದೇಶವನ್ನು ಒದಗಿಸುತ್ತದೆ.
ಕ್ರಯ ಪತ್ರದಲ್ಲಿರುವ ಪ್ರದೇಶಕ್ಕಿಂತ ಕಡಿಮೆ ಪ್ರದೇಶಕ್ಕೆ ತೆರಿಗೆ ಪಾವತಿಸಿದ ಸಂದರ್ಭದಲ್ಲಷ್ಟೇ ಬಿಬಿಎಂಪಿ ನೋಟಿಸ್ ನೀಡಿದೆ. ಆನ್ಲೈನ್ನಲ್ಲಿ ಆಕ್ಷೇಪಣೆ ಅಥವಾ ಮೇಲ್ಮನವಿ ಸಲ್ಲಿಸುವ ಅವಕಾಶವಿದೆ ಮತ್ತು ದಾಖಲೆಗಳ ಆಧಾರದ ಮೇಲೆ ತೀರ್ಮಾನ ಕೈಗೊಳ್ಳಲಾಗುತ್ತದೆ. ಪ್ರಸ್ತುತ ನೋಟಿಸ್ ಮಾತ್ರ ನೀಡಲಾಗಿದ್ದು, ನಾಗರಿಕರು BBMPeNyaya.karnataka.gov.in ಮೂಲಕ ಆನ್ಲೈನ್ನಲ್ಲಿ ಅಗತ್ಯ ದಾಖಲೆಗಳೊಂದಿಗೆ ತಮ್ಮ ಉತ್ತರ ಅಥವಾ ಆಕ್ಷೇಪಣೆ ಸಲ್ಲಿಸಬಹುದಾಗಿದೆ.
ಹಿಂದಿನ ಹಸ್ತಚಾಲಿತ ವ್ಯವಸ್ಥೆಗೆ ಹೋಲಿಸಿದರೆ ಇದು ತುಂಬಾ ಪಾರದರ್ಶಕ ಮತ್ತು ಆನ್ಲೈನ್ ವ್ಯವಸ್ಥೆಯಾಗಿದೆ. ಹಿಂದಿನ ವ್ಯವಸ್ಥೆಯಲ್ಲಿ ಸ್ಥಳೀಯ ಕಂದಾಯ ಪರಿವೀಕ್ಷಕರು/ತೆರಿಗೆ ನಿರೀಕ್ಷಕರು ನೋಟಿಸ್ ನೀಡುತ್ತಿದ್ದರು ಮತ್ತು ಆಕ್ಷೇಪಣೆ/ಮೇಲ್ಮನವಿ ಕೇವಲ ಸ್ಥಳೀಯ ಸಹಾಯಕ ಕಂದಾಯ ಅಧಿಕಾರಿ ಕಚೇರಿಗೆ ಭೇಟಿ ನೀಡಿ ಸಲ್ಲಿಸಬೇಕಾಗುತ್ತಿತ್ತು. ಇದರಿಂದ ಸಾರ್ವಜನಿಕರು ಅಥವಾ ಆಸ್ತಿದಾರರು ಸ್ಥಳೀಯ ಸಿಬ್ಬಂದಿಯ ಮೇಲೆ ಅವಲಂಬಿತರಾಗುತ್ತಿದ್ದರು. ಜೊತೆಗೆ, ಫ್ಲ್ಯಾಟ್ಗಳ ಪ್ರದೇಶವನ್ನು ಕೈಯಿಂದ ಅಳೆಯುವುದು ಬಹುತೇಕ ಅಸಾಧ್ಯವಾಗಿದ್ದರಿಂದ ಯಾವುದೇ ಕ್ರಮ ಕೈಗೊಳ್ಳಲಾಗುತ್ತಿರಲಿಲ್ಲ ಎಂದು ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಕಂದಾಯ ವಿಭಾಗದ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಸೂಚನೆ: ವಾಹನ ನಿಲ್ದಾಣ ಪ್ರದೇಶವನ್ನು ಫ್ಲ್ಯಾಟ್ನ ತೆರಿಗೆಗೆ ಸೇರಿಸಲಾಗುವುದಿಲ್ಲ. ವಾಹನ ನಿಲ್ದಾಣ ಹೊಂದಿರುವವರು ಅದಕ್ಕೆ ಪ್ರತ್ಯೇಕವಾಗಿ ತೆರಿಗೆ ಪಾವತಿಸುತ್ತಾರೆ. ಹಾಗೂ ಹೇಳುವುದಾದರೆ - ವಾಹನ ನಿಲ್ದಾಣವನ್ನು ಫ್ಲ್ಯಾಟ್ ಪ್ರದೇಶಕ್ಕೆ ಸೇರಿಸಿ ಆಸ್ತಿ ತೆರಿಗೆ ವಿಧಿಸಲಾಗುವುದಿಲ್ಲ. ಇದಕ್ಕೆ ಫ್ಲ್ಯಾಟ್ ದರದ ಅರ್ಧ ದರದಲ್ಲಿ ಪ್ರತ್ಯೇಕ ತೆರಿಗೆ ವಿಧಿಸಲಾಗುತ್ತದೆ. ಇದು 2008ರಿಂದಲೇ ಜಾರಿಯಲ್ಲಿದೆ ಎಂದು ಬಿಬಿಎಂಪಿ ಹೇಳಿದೆ.
Click it and Unblock the Notifications
Sign in with Google