Bengaluru: ಒಂದು ಸೀರೆಗಾಗಿ ಜಯನಗರದ KSIC ಶೋರೂಮ್ ಮುಂದೆ ಬರೋಬ್ಬರಿ 6 ಗಂಟೆ ಕಾದ ಮಹಿಳೆ

ಬೆಂಗಳೂರಿನ ಜಯನಗರದಲ್ಲಿರುವ ಜನಪ್ರಿಯ ಕರ್ನಾಟಕ ರೇಷ್ಮೆ ಕೈಗಾರಿಕಾ ನಿಗಮದ (KSIC) ಶೋರೂಮ್‌ನಲ್ಲಿ ಕೇವಲ 10 ನಿಮಿಷ ಶಾಪಿಂಗ್ ಮಾಡಲು ಮಹಿಳೆಯೊಬ್ಬರು ಬರೋಬ್ಬರಿ 6 ಗಂಟೆಗಳ ಕಾಲ ಕಾಯ್ದಿದ್ದಾರೆ. ಅಸಲಿ KSIC ಮೈಸೂರು ಸಿಲ್ಕ್ ಸೀರೆಗಳಿಗಾಗಿ ಗ್ರಾಹಕರು ಮುಂಜಾನೆಯಿಂದಲೇ ಸರತಿ ಸಾಲಿನಲ್ಲಿ ನಿಲ್ಲುವ ಈ ಘಟನೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಇನ್‌ಸ್ಟಾಗ್ರಾಮ್‌ನಲ್ಲಿ @off.script ಎಂಬ ಹೆಸರಿನ ಖಾತೆಯಲ್ಲಿ ಮಹಿಳೆಯೊಬ್ಬರು ತಮ್ಮ ಈ ವಿಶಿಷ್ಟ ಅನುಭವದ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ಜಯನಗರದಲ್ಲಿರುವ ಕೆಎಸ್‌ಐಸಿ ಮೈಸೂರು ಸಿಲ್ಕ್ ಶೋರೂಮ್‌ಗೆ ಭೇಟಿ ನೀಡಿದ ಅವರು, ಕೇವಲ ತಮ್ಮ ಹೆಸರನ್ನು ವೈಟಿಂಗ್ ಲಿಸ್ಟ್‌ನಲ್ಲಿ ಸೇರಿಸಲು ಮುಂಜಾನೆ 4 ಗಂಟೆಗೆ ಅಂಗಡಿಯ ಬಳಿ ತಲುಪಿದ್ದಾಗಿ ತಿಳಿಸಿದ್ದಾರೆ. "ಈಗ ಸಮಯ ಮುಂಜಾನೆ 3:45 ಆಗಿದೆ ಮತ್ತು ಯಾರೂ ಹೆಚ್ಚು ಮಾತನಾಡದ ಜಾಗಕ್ಕೆ ನಾವು ಹೋಗುತ್ತಿದ್ದೇವೆ. ಇಂದಿನ ಯುವ ಪೀಳಿಗೆಗೆ ಈ ಸ್ಟೋರ್ ಬಗ್ಗೆ ತಿಳಿದಿಲ್ಲದಿರಬಹುದು" ಎಂದು ಅವರು ವಿಡಿಯೋದಲ್ಲಿ ಹೇಳಿದ್ದಾರೆ.

ಬೆಳಗಿನ ಜಾವವೇ ಶೋರೂಮ್ ತಲುಪಿದರೂ, ಅವರಿಗಿಂತ ಮುಂಚೆಯೇ ಹಲವರು ಸರತಿ ಸಾಲಿನಲ್ಲಿ ಕಾಯುತ್ತಿರುವುದು ಆ ಮಹಿಳೆಗೆ ಅಚ್ಚರಿ ಮೂಡಿಸಿದೆ. ಸ್ವಲ್ಪ ಹೊತ್ತು ಕಾಫಿ ಕುಡಿಯಲು ಹೊರಗೆ ಹೋಗಿ ವಾಪಸ್ ಬರುವಷ್ಟರಲ್ಲಿ ಲಿಸ್ಟ್‌ನಲ್ಲಿ 53 ಹೆಸರುಗಳು ಸೇರ್ಪಡೆಯಾಗಿದ್ದವು. ಕಾಯುವ ಸಮಯದಲ್ಲಿ ಮಹಿಳೆ ಇತರ ಗ್ರಾಹಕರೊಂದಿಗೆ ಮಾತನಾಡಿದ್ದಾರೆ. ಈ ವೇಳೆ ಮಹಿಳೆಯೊಬ್ಬರು ತಾನು ಮುಂಜಾನೆ 3 ಗಂಟೆಗೆ ಬಂದಿರುವುದಾಗಿ ಹೇಳಿದರೆ, ಮತ್ತೊಬ್ಬ ವ್ಯಕ್ತಿ ಮೊದಲ ಸ್ಥಾನ ಪಡೆಯಲು ಹಿಂದಿನ ದಿನ ರಾತ್ರಿ 9 ಗಂಟೆಗೇ ಬಂದು ಕಾಯುತ್ತಿರುವುದಾಗಿ ತಿಳಿಸಿದ್ದಾರೆ. ಆದರೆ, ಈ ಶೋರೂಮ್ ತೆರೆಯುವುದು ಬೆಳಗ್ಗೆ 10 ರಿಂದ 10:30 ರ ಸುಮಾರಿಗೆ.

ಈ ಶೋರೂಮ್‌ನಲ್ಲಿ ಸೀರೆ ಖರೀದಿಸುವ ಪ್ರಕ್ರಿಯೆಯು ಬಹಳ ಕಟ್ಟುನಿಟ್ಟಾಗಿದೆ ಎಂದು ಮಹಿಳೆ ವಿವರಿಸಿದ್ದಾರೆ. ಗ್ರಾಹಕರು ಮೊದಲು ಟೋಕನ್ ಪಡೆಯಬೇಕು. ಈ ಪ್ರಕ್ರಿಯೆಗಾಗಿಯೇ ಆ ಮಹಿಳೆಗೆ ಸುಮಾರು 6 ಗಂಟೆಗಳ ಕಾಲಾವಕಾಶ ಬೇಕಾಯಿತು. ಒಂದು ಬಾರಿಗೆ ಕೇವಲ 10 ಜನರನ್ನು ಮಾತ್ರ ಶೋರೂಮ್ ಒಳಗೆ ಬಿಡಲಾಗುತ್ತದೆ. ಪ್ರತಿಯೊಂದು ಬ್ಯಾಚ್‌ಗೂ ತಮ್ಮ ಖರೀದಿಗೆ ಕೇವಲ 10 ನಿಮಿಷಗಳ ಕಾಲಾವಕಾಶ ಮಾತ್ರ ನೀಡಲಾಗುತ್ತದೆ. "ನಿಮಗೆ ಒಂದು ಟೋಕನ್‌ಗೆ ಕೇವಲ ಒಂದು ಸೀರೆ ಮಾತ್ರ ಸಿಗುತ್ತದೆ" ಎಂದು ಮಹಿಳೆ ವಿಡಿಯೋದಲ್ಲಿ ಹೇಳಿಕೊಂಡಿದ್ದಾರೆ.

KSIC ಸೀರೆಗಳಿಗೆ ಇಷ್ಟೊಂದು ಬೇಡಿಕೆ ಏಕೆ?

ಸರತಿ ಸಾಲಿನಲ್ಲಿ ಕಾಯುತ್ತಿದ್ದ ಗ್ರಾಹಕರು ವಿವರಿಸುವಂತೆ, ಈ ಸೀರೆಗಳನ್ನು ಉತ್ತಮ ಗುಣಮಟ್ಟದ ಮಲ್ಬರಿ ರೇಷ್ಮೆಯಿಂದ ತಯಾರಿಸಲಾಗುತ್ತದೆ. ಶುದ್ಧ ಚಿನ್ನದ ಜರಿಯನ್ನು ಬಳಸುವುದರಿಂದ, ಚಿನ್ನದ ದರಗಳ ಆಧಾರದ ಮೇಲೆ ಈ ಸೀರೆಗಳ ಬೆಲೆಯೂ ಬದಲಾಗುತ್ತದೆ. ಜಯನಗರದ 4ನೇ ಕ್ರಾಸ್‌ನಲ್ಲಿರುವ ಈ ಸ್ಟೋರ್‌ನಲ್ಲಿ ಸೀರೆಗಳ ಬೆಲೆ ₹25,000 ದಿಂದ ₹1 ಲಕ್ಷದವರೆಗೆ ಇರುತ್ತದೆ. "ಇಲ್ಲಿ ಗುರುವಾರ ಮತ್ತು ಶನಿವಾರದಂದು ಸ್ಟಾಕ್ ನವೀಕರಿಸಲಾಗುತ್ತದೆ ಹಾಗೂ ಒಮ್ಮೆಗೆ ಕೇವಲ 100 ಸೀರೆಗಳು ಮಾತ್ರ ಬರುತ್ತವೆ" ಎಂದು ಮಹಿಳೆ ಬರೆದುಕೊಂಡಿದ್ದಾರೆ.

ಮಹಿಳೆ ತಮ್ಮ ಈ ಕಾಯುವಿಕೆಯನ್ನು "ಒಂದು ಉತ್ತಮ ಅನುಭವ" ಎಂದು ಕರೆದಿದ್ದು, "ಇದು ನನ್ನ ಜೀವನದಲ್ಲಿ ಮೊದಲ ಮತ್ತು ಕೊನೆಯ ಬಾರಿ" ಎಂದು ತಮಾಷೆಯಾಗಿ ಹೇಳಿದ್ದಾರೆ. ಕರ್ನಾಟಕ ರೇಷ್ಮೆ ಕೈಗಾರಿಕಾ ನಿಗಮವು (KSIC) ತನ್ನ ಅಸಲಿ ಮೈಸೂರು ಸಿಲ್ಕ್ ಸೀರೆಗಳಿಗೆ ಹೆಸರುವಾಸಿಯಾಗಿದೆ. ಇವು ಭೌಗೋಳಿಕ ಸೂಚ್ಯಂಕ (GI) ಟ್ಯಾಗ್ ಹೊಂದಿದ್ದು, ಗುಣಮಟ್ಟ ಮತ್ತು ನೈಜತೆಯನ್ನು ಖಚಿತಪಡಿಸುತ್ತವೆ. ಪ್ರತಿ ಸೀರೆಯು ತನ್ನದೇ ಆದ ವಿಶಿಷ್ಟ ಕೋಡ್ ಮತ್ತು ಹೊಲೊಗ್ರಾಮ್ ಅನ್ನು ಹೊಂದಿರುತ್ತದೆ. ಈ ಸ್ಟೋರ್ ಕೇವಲ ಟೋಕನ್ ಆಧಾರಿತ ಪ್ರವೇಶ ವ್ಯವಸ್ಥೆಯನ್ನು ಹೊಂದಿದೆ, ಒಬ್ಬ ಗ್ರಾಹಕನಿಗೆ ಒಂದೇ ಸೀರೆ ಖರೀದಿಸಲು ಮಾತ್ರ ಅವಕಾಶವಿರುತ್ತದೆ.

English summary

A Bengaluru woman's viral video shows her waiting for 6 hours starting at 4 AM just to spend 10 minutes buying an authentic KSIC Mysore silk saree at the Jayanagar store.