ಡ್ರಾಪ್ ನೆಪದಲ್ಲಿ ಸಾಫ್ಟ್ ವೇರ್ ಟೆಕ್ಕಿ ದೋಚಿದ್ರು

ಬೆಂಗಳೂರು, ಫೆ.9: ಸಾಫ್ಟ್ ವೇರ್ ಟೆಕ್ಕಿಯೊಬ್ಬ ರಾತ್ರಿ ವೇಳೆ ಆಫೀಸ್ ಮುಗಿಸಿಕೊಂಡು ಮನೆಗೆ ಹೋಗುವಾಗ ಅಪರಿಚಿತರ ಹತ್ತಿರ ಡ್ರಾಪ್ ಕೇಳಿ ಎಲ್ಲವನ್ನು ಕಳೆದುಕೊಂಡು ಬರಿಗೈಯಲ್ಲಿ ನಿಂತ ಘಟನೆ ನಡೆದಿದೆ. ಇಂಡಿಕಾ ಕಾರಿನಲ್ಲಿ ಟೆಕ್ಕಿ ವಿಕ್ರಮ್ ನನ್ನು ಹತ್ತಿಸಿಕೊಂಡ ದರೋಡೆಕೋರರು ಮಾರ್ಗಮಧ್ಯದಲ್ಲಿ ಹಲ್ಲೆ ಮಾಡಿ ಎಲ್ಲವನ್ನೂ ದೋಚಿದ್ದಾರೆ.

ವಿಕ್ರಮ್ ಬಳಿ ಇದ್ದ ಲ್ಯಾಪ್ ಟಾಪ್, ಸರ, ಮೊಬೈಲ್, ನಗದು ಹಣ ಎಲ್ಲವನ್ನು ಕಸಿದುಕೊಂಡ ಕಳ್ಳರು ನಂತರ ವಿಕ್ರಮ್ ನನ್ನು ಕಾರಿನಿಂದ ಹೊರಕ್ಕೆ ತಳ್ಳಿದ ಘಟನೆ ಎಚ್ ಎಎಲ್ ವಿಮಾನ ನಿಲ್ದಾಣ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

ಐಟಿಪಿಎಲ್ ನಲ್ಲಿ ಖಾಸಗಿ ಸಂಸ್ಥೆಯೊಂದರಲ್ಲಿ ಸಾಫ್ಟ್ ವೇರ್ ಇಂಜಿನಿಯರ್ ಆಗಿರುವ ವಿಕ್ರಮ್ ರಾತ್ರಿ 11.30ರ ಸುಮಾರಿಗೆ ಮನೆಗೆ ಹೊರಟಿದ್ದಾನೆ. ಕ್ಯಾಬ್ ವಾಹನದ್ದಂತ್ತಿದ್ದ ಟಾಟಾ ಇಂಡಿಕಾ ಕಾರು ಈತನ ಬಳಿ ಬಂದ ಕಾರಿನ ಚಾಲಕ ಡ್ರಾಪ್ ಕೊಡುವುದಾಗಿ ಹೇಳಿದ್ದಾನೆ. ಅದನ್ನು ನಂಬಿ ಕಾರು ಹತ್ತಿದ ವಿಕ್ರಮ್ ಗೆ ನಂತರ ಜೊತೆಯಲ್ಲೇ ಕೂತಿರುವವರು ದರೋಡೆಕೋರರು ಎಂಬ ಸಂಶಯ ಮೂಡಿದೆ.

ಈ ಸಮಯದಲ್ಲಿ ಪ್ರತಿಭಟನೆಗೆ ಮುಂದಾದ ವಿಕ್ರಮ್ ಮೇಲೆ ಹಲ್ಲೆ ನಡೆಸಿದ ತಂಡ, ಆತನ ಬಳಿ ಇದ್ದ ವಸ್ತುಗಳನ್ನು ದೋಚಿ, ಎಚ್ಎಎಲ್ ಬಳಿ ಇರುವ ಹೆರಿಟೇಜ್ ಕಂಪನಿ ಬಳಿ ಆತನನ್ನು ತಳ್ಳಿ ಪರಾರಿಯಾಗಿದ್ದಾರೆ.

ಈ ಘಟನೆಯಿಂದ ಕಂಗಾಲಾದ ವಿಕ್ರಮ್ ಎಚ್ ಎಎಲ್ ಠಾಣೆ ಪೊಲೀಸರಿಗೆ ದೂರು ನೀಡಿದ್ದಾನೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ದರೋಡೆಕೋರರ ಪತ್ತೆಗಾಗಿ ಶೋಧಕಾರ್ಯ ನಡೆಸಿದ್ದಾರೆ.

English summary

A software engineer Vikram working in private firm in ITPL, took a lift in Tata Indica late night, was allegedly robbed by the driver and his accomplices in the HAL airport police station limits. Police registered a robbery case and are searching for the culprits.