3500 ಉಪನ್ಯಾಸಕರ ಹುದ್ದೆಗಳಿವೆ! ಪ್ರಯತ್ನಿಸಲು ಸಕಾಲ!

ಬೆಂಗಳೂರು : ಖಾಸಗಿ ಅನುದಾನಿತ ಕಾಲೇಜುಗಳಲ್ಲಿ ಉಪನ್ಯಾಸಕರ ಹುದ್ದೆ ನೇಮಕಾತಿಗೆ ವಿಧಿಸಲಾಗಿದ್ದ ನಿರ್ಬಂಧವನ್ನು ಸರ್ಕಾರ ತೆರವುಗೊಳಿಸಿದೆ. ಇದರಿಂದ ರಾಜ್ಯದ ಕಾಲೇಜು ಮಂಡಳಿಗಳು, ಖಾಲಿಯಿರುವ 3500 ಹುದ್ದೆಗಳನ್ನು ಭರ್ತಿ ಮಾಡಿಕೊಳ್ಳಲು ಸಹಾಯಕವಾಗಲಿದೆ.

ನಿರ್ಬಂಧದ ಆದೇಶ ಹೊರಬಂದದ್ದರಿಂದ ನಿರುದ್ಯೋಗಿಗಳು ಮತ್ತು ಕಾಲೇಜು ಆಡಳಿತ ಮಂಡಳಿಗಳು ಹರ್ಷಗೊಂಡಿವೆ.

‘ಹಣ ಬಲ, ಒತ್ತಡದ ಬಲ ಉಳ್ಳವರು ಇಲ್ಲಿ ಪ್ರವೇಶ ಗಿಟ್ಟಿಸಬಹುದು. ಈ ಸಲ ಏನಾದರೂ ಮಾಡಲೇ ಬೇಕು. ಉಪನ್ಯಾಸಕನಾಗಿ ಯಾವುದಾದರೂ ಕಾಲೇಜಿಗೆ ನುಗ್ಗಲೇ ಬೇಕು ಎನ್ನುತ್ತಾರೆ ಕಳೆದ ನಾಲ್ಕು ವರ್ಷಗಳಿಂದ ಖಾಸಗಿ ಕಾಲೇಜಿನಲ್ಲಿ ಕಡಿಮೆ ಸಂಬಳಕ್ಕೆ ದುಡಿಯುತ್ತಿರುವ ನಗರದ ಉದ್ಯೋಗಾಕಾಂಕ್ಷಿಗಳಾದ ವಿ.ಎನ್‌.ಯತೀಶ, ನಾಗರಾಜ, ಅನಂತರಾಜ್‌, ರಂಗನಾಥ್‌ ಮತ್ತಿತರರು.

ಪೂರ್ಣ ವಿವರ : 1984ರಲ್ಲಿ ಖಾಸಗಿ ಅನುದಾನಿತ ಕಾಲೇಜುಗಳಲ್ಲಿ ಉಪನ್ಯಾಸಕರ ಹುದ್ದೆ ನೇಮಕಾತಿಗೆ ಸರ್ಕಾರ ನಿರ್ಬಂಧ ವಿಧಿಸಿತ್ತು. ಈಗ ತೆರವುಗೊಳಿಸಿರುವುದರಿಂದ, ರಾಜ್ಯ ಸರ್ಕಾರಕ್ಕೆ ಪ್ರತಿ ವರ್ಷ 60ರಿಂದ 70ಕೋಟಿ ಹೊರೆ ಬೀಳಲಿದೆ.

ಕಾಲೇಜು ಆಡಳಿತ ಮಂಡಳಿಗಳು ಸಂದರ್ಶನದ ಮೂಲಕ ನೇಮಕಾತಿ ಮಾಡಿಕೊಳ್ಳಬಹುದಾಗಿದ್ದು, ಈ ಸಂಬಂಧ ಸಮಿತಿಯಲ್ಲಿ ಸರ್ಕಾರದ ಪ್ರತಿನಿಧಿಯಾಬ್ಬರು ಇರುತ್ತಾರೆ. ಮೀಸಲಾತಿ ನಿಯಮಾನುಸಾರ ಭರ್ತಿ ಮಾಡಿಕೊಳ್ಳಲು ಆದೇಶಿಸಲಾಗಿದೆ. ಈ ನಿಯಮ ಉಲ್ಲಂಘನೆಯಾದರೆ, ಅಂತಹ ನೇಮಕಾತಿಯನ್ನು ಯಾವುದೇ ಪೂರ್ವ ಸೂಚನೆ ಇಲ್ಲದೆ ಸರ್ಕಾರ ರದ್ದುಗೊಳಿಸಲಿದೆ ಎನ್ನಲಾಗಿದೆ.

(ದಟ್ಸ್‌ ಕನ್ನಡ ವಾರ್ತೆ)