ಬಣ್ಣ ಬಳಿದು ಅಖಾಡಕ್ಕಿಳಿದ ಸಾಹಸಸಿಂಹ, ರೆಬೆಲ್‌ ಸ್ಟಾರ್‌

ಬೆಂಗಳೂರು : ಡಾ. ರಾಜ್‌ಕುಮಾರ್‌ ಅಪಹರಣವಾದ ನಂತರ ರಾಜ್‌ ಬಿಡುಗಡೆ ಪ್ರಕ್ರಿಯೆಯಲ್ಲಿ ಸಕ್ರಿಯವಾಗಿ ಓಡಾಡುತ್ತಾ ದಾಡಿ ಬೆಳೆಸಿಕೊಂಡು, ಅಣ್ಣಾವ್ರು ಬರುವತನಕ ಕನ್ನಡ ಚಿತ್ರ ಚಟುವಟಿಕೆ ನಡೆಯದು ಎಂದು ಹೇಳುತ್ತಿದ್ದ ರೆಬೆಲ್‌ಸ್ಟಾರ್‌ ಅಂಬರೀಶ್‌ ಕಳೆದ ಶುಕ್ರವಾರ ಚಿನ್ನಿ ಫಿಲಂಸ್‌ ಅವರ ಜಯಶ್ರೀ ದೇವಿ ನಿರ್ಮಾಣದ ವಂದೇ ಮಾತರಂ ಚಿತ್ರಕ್ಕಾಗಿ ಪ್ರಸಾದ್‌ ಸ್ಟುಡಿಯೋದಲ್ಲಿ ತಮ್ಮ ಭಾಗದ ಮಾತುಗಳ ಮರು ಜೋಡಣೆಯ ಕಾರ್ಯದಲ್ಲಿ ತಲ್ಲೀನರಾಗಿದ್ದರು ಎಂಬ ಸುದ್ದಿಯ ಬೆನ್ನಲ್ಲೇ ಅಂಬರೀಶ್‌ ಹಾಗೂ ವಿಷ್ಣುವರ್ಧನ್‌ ಬಣ್ಣ ಹಚ್ಚಿ ಶನಿವಾರ ಚಿತ್ರೀಕರಣದಲ್ಲಿ ಪಾಲ್ಗೊಂಡಿದ್ದಾರೆ.

ರಾಕ್‌ಲೈನ್‌ ವೆಂಕಟೇಶ್‌ ಅವರ ದಿಗ್ಗಜರು ಚಿತ್ರಕ್ಕಾಗಿ ಕಳೆದ ಮೂರು ತಿಂಗಳಿನಿಂದ ರಾಜ್‌ ಭಕ್ತಿಯಿಂದ ಹಾಗೂ ರಾಜ್‌ ಅಭಿಮಾನಿಗಳ ಭಯದಿಂದ ಬಣ್ಣ ಹಚ್ಚದಿದ್ದ ಅಂಬರೀಶ್‌ ಹಾಗೂ ವಿಷ್ಣುವರ್ಧನ್‌ ಚಿತ್ರೀಕರಣದಲ್ಲಿ ಪಾಲ್ಗೊಳ್ಳುವುದರೊಂದಿಗೆ ಸ್ವಯಂಘೋಷಿತ ಬಂದ್‌ನಿಂದ ಕನ್ನಡ ಚಿತ್ರರಂಗಕ್ಕೆ ಸಂಪೂರ್ಣ ಮುಕ್ತಿ ದೊರೆತಿದೆ.

ಎರಡು ತಿಂಗಳ ಕಾಲ ಸಂಪೂರ್ಣ ಸ್ಥಗಿತಗೊಂಡಿದ್ದ ಚಿತ್ರೀಕರಣ ಅಂತೂ ಇಂತು ಕರ್ನಾಟಕ ಬಂದ್‌ ನಂತರ ಪ್ರಾರಂಭವಾಗಿತ್ತಾದರೂ, ದೊಡ್ಡ ಬ್ಯಾನರ್‌ಗಳ ಹಾಗೂ ಹೆಸರಾಂತ ನಟರ ಪಾಲ್ಗೊಳ್ಳುವಿಕೆ ಇಲ್ಲದೆ ಸೊರಗಿ ಹೋಗಿತ್ತು. ರಾಜ್‌ಪುತ್ರರು, ರವಿಚಂದ್ರನ್‌, ಅಂಬರೀಶ್‌ ಚಿತ್ರೀಕರಣದಲ್ಲಿ ಪಾಲ್ಗೊಳ್ಳದ ಕಾರಣ ಕಾರ್ಮಿಕರು ಕೈತುಂಬ ಕೆಲಸವಿಲ್ಲದೆ ಹೊಟ್ಟೆಪಾಡಿಗಾಗಿ ಪರದಾಡುವ ಸ್ಥಿತಿ ನಿರ್ಮಾಣವಾಗಿತ್ತು.

ಕಾಡಿನಿಂದಲೇ ರಾಜ್‌ಕುಮಾರ್‌ ಅವರು ಮಾಡಿಕೊಂಡಿದ್ದ ಮನವಿಯ ಮೇರೆಗೆ ಚಿತ್ರ ಚಟುವಟಿಕೆ ಪುನಾರಂಭಿಸುವಂತೆ ಹೇಳಿಕೆ ನೀಡುತ್ತಿದ್ದ ಹಿರಿಯ ಹಾಗೂ ಪ್ರಭಾವಿ ನಟರೇ ದಾಡಿ ಬೋಳಿಸಲು ಹಿಂದು ಮುಂದು ನೋಡಿದಾಗ ಚಿತ್ರೀಕರಣ ಆರಂಭವಾಗುವುದಾದರೂ ಎಂತು ಎಂಬ ಜಿಜ್ಞಾಸೆ ಗಾಂಧೀನಗರದಲ್ಲಿ ಸುಳಿದಾಡುತ್ತಿತ್ತು.

ರಾಜ್‌ಕುಮಾರ್‌ ಅಪಹರಣವಾದ ದಿನದಿಂದಲೂ ರಾಜ್‌ಕುಮಾರ್‌ ಕುಟುಂಬದವರ ನೋವಿಗೆ - ಆತಂಕಕ್ಕೆ ಪ್ರತಿಕ್ಷಣವೂ ಸ್ಪಂದಿಸುತ್ತಿದ್ದ ರಾಕ್‌ಲೈನ್‌ ವೆಂಕಟೇಶ್‌ ಈಗ ಪಾರ್ವತಮ್ಮ ರಾಜ್‌ಕುಮಾರ್‌ ಅವರ ಸಲಹೆಯ ಮೇರೆಗೆ ಹಾಗೂ ಚಿತ್ರೋದ್ಯಮದ ಒತ್ತಾಯಕ್ಕೆ ಮಣಿದು ದಿಗ್ಗಜರು ಚಿತ್ರದ ಚಿತ್ರೀಕರಣ ಆರಂಭಿಸಿದ್ದಾರೆ.

ಶನಿವಾರ ಮೈಸೂರಿನಲ್ಲಿ ನಡೆದ ಚಿತ್ರೀಕರಣದಲ್ಲಿ ವಿಷ್ಣುವರ್ಧನ್‌, ಅಂಬರೀಶ್‌, ಲಕ್ಷ್ಮೀ ಮುಂತಾದವರು ಪಾಲ್ಗೊಂಡಿದ್ದರೆ, ಹಾಲು ಸಕ್ಕರೆ ಚಿತ್ರಕ್ಕೆ ಬೆಂಗಳೂರಿನಲ್ಲಿ ನಡೆದ ಚಿತ್ರೀಕರಣದಲ್ಲಿ ಸಂಸತ್‌ ಸದಸ್ಯ ಶಶಿಕುಮಾರ್‌, ಸುಹಾಸಿನಿ, ದೇವರಾಜ್‌ ಪಾಲ್ಗೊಂಡಿದ್ದಾರೆ.

ಟಿ.ಎನ್‌. ಸೀತಾರಾಂರ ಮತದಾನದಲ್ಲಿ ಅನಂತನಾಗ್‌, ಪ್ರೇಮಿ ನಂ.1ನಲ್ಲಿ ರಮೇಶ್‌, ಪ್ರೇಮಾ ನಟಿಸುತ್ತಿದ್ದಾರೆ. ರವಿಚಂದ್ರನ್‌ ಅವರ ಚಿತ್ರವೊಂದು ಸೆಟ್ಟೇರುವ ಲಕ್ಷಣ ಕಂಡು ಬಂದಿದೆ. ಆದರೆ, ಶಿವರಾಜ್‌ಕುಮಾರ್‌ ಅಭಿನಯದ ಯಾವ ಚಿತ್ರಗಳೂ ಸದ್ಯಕ್ಕಂತೂ ಸೆಟ್ಟೇರುವ ಸಾಧ್ಯತೆ ಇಲ್ಲವೇ ಇಲ್ಲ.