20ರಂದು ಮೆರವಣಿಗೆ, 25ರಿಂದ ಚಲನಚಿತ್ರ ಚಟುವಟಿಕೆ ಆರಂಭ

ಬೆಂಗಳೂರು : ರಾಜ್‌ಕುಮಾರ್‌ ಅವರ ಅಪಹರಣವಾದ ದಿನದಿಂದಲೂ ಸ್ತಬ್ಧವಾಗಿರುವ ಕನ್ನಡ ಚಲನಚಿತ್ರ ಚಟುವಟಿಕೆ 25ರಿಂದ ಪುನಾರಂಭಗೊಳ್ಳಲಿದೆ. ಇದಕ್ಕೂ ಮುನ್ನ ರಾಜ್‌ಕುಮಾರ್‌ ಅವರ ಶೀಘ್ರ ಬಿಡುಗಡೆಗೆ ಆಗ್ರಹಿಸಿ ಬೆಂಗಳೂರಿನಲ್ಲಿ ಬೃಹತ್‌ ಮೆರವಣಿಗೆ ನಡೆಸಲು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ನಿರ್ಧಾರ ಕೈಗೊಂಡಿದೆ.

ರಾಜ್‌ಕುಮಾರ್‌ ಅವರೇ ಸ್ವತಃ ಚಿತ್ರ ಚಟುವಟಿಕೆ ಆರಂಭಿಸುವಂತೆ ಮನವಿ ಮಾಡಿದರೂ ಕೂಡ ನಿರ್ಧಾರ ಕೈಗೊಳ್ಳಲು ಹಿಂಜರಿದಿದ್ದ ಮಂಡಳಿ, ಕೊನೆಗೂ ಚಿತ್ರ ಪ್ರದರ್ಶಕರ ಒತ್ತಡಕ್ಕೆ ಮಣಿದು ಸೆಪ್ಟೆಂಬರ್‌ 1ರಿಂದ ಚಲನ ಚಿತ್ರ ಪ್ರದರ್ಶನ ನಡೆಸುವ ನಿರ್ಧಾರ ಕೈಗೊಂಡಿತು. ಆದರೆ, ಚಿತ್ರೀಕರಣ ಮುಂತಾದ ಚಿತ್ರನಗರಿಯ ಚಟುವಟಿಕೆಗಳು ಆರಂಭಗೊಂಡಿರಲಿಲ್ಲ.

ಚಿತ್ರನಗರಿಯಲ್ಲಿ ಕೆಲಸವಿಲ್ಲದೇ ಚಿತ್ರ ಕಾರ್ಮಿಕರು ಹೊಟ್ಟೆಪಾಡಿಗೆ ಕಷ್ಟಪಡುತ್ತಿದ್ದು, ಈಗ ವಿಧಿ ಇಲ್ಲದೆ, 25ರಿಂದ ಚಿತ್ರೀಕರಣವೂ ಸೇರಿದಂತೆ ಚಿತ್ರರಂಗದ ಎಲ್ಲ ಚಟುವಟಿಕೆಗಳನ್ನೂ ಆರಂಭಿಸುವ ನಿರ್ಧಾರವನ್ನು ಶನಿವಾರ ಸೇರಿದ್ದ ಮಂಡಳಿಯ ತುರ್ತು ಸಭೆಯಲ್ಲಿ ಕೈಗೊಳ್ಳಲಾಗಿದೆ.

ಇತ್ತ ವಾಣಿಜ್ಯ ಮಂಡಳಿ ಸಭೆ ನಡೆಯುತ್ತಿದ್ದರೆ, ಅತ್ತ ಸುಚಿತ್ರ ಫಿಲಂ ಸೊಸೈಟಿಯಲ್ಲಿ ಕಿರುತೆರೆಯ ಹಿರಿಯ ಸಂಘಟನೆ ಸಭೆ ಸೇರಿ 18ರ ಸೋಮವಾರದಿಂದಲೇ ಕಿರುತೆರೆಯ ಎಲ್ಲ ಚಟುವಟಿಕೆ ಆರಂಭಿಸುವ ತೀರ್ಮಾನ ಕೈಗೊಂಡಿತು. ನಂದಕುಮಾರ್‌ ಅವರ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಗಿರೀಶ್‌ ಕಾಸರವಳ್ಳಿ, ನಾಗಾಭರಣ ಸೇರಿದಂತೆ 600ಕ್ಕೂ ಹೆಚ್ಚು ಕಲಾವಿದರು ಹಾಗೂ ಕಾರ್ಮಿಕರು ಪಾಲ್ಗೊಂಡಿದ್ದರು.

ಕಿರುತೆರೆಯ ಕಾರ್ಮಿಕರ ಈ ನಿರ್ಧಾರ ಕಿವಿಗೆ ಬಿದ್ದೊಡನೆ ಕಾರ್ಯ ಪ್ರವೃತ್ತರಾದ ಚಿತ್ರನಟ ಅಂಬರೀಶ್‌ ಅವರು ಕಿರುತೆರೆಯ ಕಾರ್ಮಿಕರ ಮನವೊಲಿಸಿ, 20ರಂದು ನಡೆಯಲಿರುವ ಮೆರವಣಿಗೆಯಲ್ಲಿ ಪಾಲ್ಗೊಳ್ಳುವಂತೆ ಕೋರಿದ್ದಾರೆ. ಮೆರವಣಿಗೆಯ ನಂತರದ ಒಂದೆರಡು ದಿನದಲ್ಲೇ ಕಿರುತೆರೆಯ ಚಟುವಟಿಕೆ ಆರಂಭಿಸುವ ಭರವಸೆಯನ್ನೂ ನೀಡಿದ್ದಾರೆ.

ಈ ಮಧ್ಯೆ ಮೊನ್ನೆ ಮೊನ್ನೆಯಷ್ಟೇ ಹೊಸ ಕಿರುತೆರೆಯ ಕಲಾವಿದರ ಸಂಘವನ್ನು ಕಟ್ಟಿಕೊಂಡು ಅಧ್ಯಕ್ಷರೆಂದು ಘೋಷಿಸಿಕೊಂಡಿದ್ದ ಕಿರುತೆರೆಯ ಕಲಾವಿದ ವೆಂಕಿ, ಪುನಃ ಕಿರುತೆರೆಯ ಹಿರಿಯ ಸಂಘದ ಮುಖ್ಯ ವಾಹಿನಿಯಲ್ಲಿಯೇ ವಿಲೀನವಾಗುವ ಮಾತುಗಳನ್ನು ಆಡಿದ್ದಾರೆ. 3 ದಿನದ ಹಿಂದಷ್ಟೇ ಜನ್ಮ ತಾಳಿದ ಹೊಸ ಸಂಘ ಹಳೇ ಗಂಡನ ಪಾದವೇ ಗತಿ ಎಂದು ಮಾತೃ ಸಂಸ್ಥೆಗೇ ಶರಣು ಹೋಗಿದೆ. ಅಂದ ಹಾಗೆ ಹೊಸ ಸಂಘ ಜನ್ಮ ತಾಳಲು ಚಲನಚಿತ್ರ ಕಾರ್ಮಿಕರ ಒಕ್ಕೂಟದ ಅಧ್ಯಕ್ಷ ಅಶೋಕ್‌ ಅವರ ಕುಮ್ಮಕ್ಕು ಇತ್ತು ಎಂಬುದು ಈಗ ಗುಟ್ಟಾಗೇನೂ ಉಳಿದಿಲ್ಲ.

(ನಮ್ಮ ಪ್ರತಿನಿಧಿಯಿಂದ)