ಸೋಗಲಾಡಿತನ

* ಡಾ. ಉಷಾ ಪಾಠಕ್, ಮೈಸೂರು

ಇದ್ದಾಗ ದೂರದಲಿ ನೀನು ಹತ್ತಿರವಿದ್ದೆ
ಕಣ್ಣ ಮುಂದೆಯೆ ಇರುವ ನೀ ದೂರವಾಗಿಹೆ ಏಕೆ

ನ್ಯಾಯಕ್ಕೆ ಕೂಗಾಡಿ ಸದ್ದಿನಲೆ ಒದ್ದಾಡಿ ಗುದ್ದಾಡಿ ಛಲಕಾಯುವ
ವಾಸ್ತವಕೆ ಕಣ್ತೆರೆವ ಧೀರೆ ಬೇಕು ನಿನಗೆ
ದಿನಕೆ ಸರಸಕೆ ಬರಿಯ ಗೆಳೆತನಕೆ

ಕರೆದೊಡನೆ ಓಗೊಡುವ ದೊರೆತನವ ಕಾದಿಡುವ ಸಜ್ಜನಿಕೆಯ
ಸಾತ್ವಿಕ ಸರಳ ಹರಿಣಿ ಬೇಕು ನಿನಗೆ
ಮದುವೆ ಮಂಟಪಕೆ ಅನುಗಾಲ ಜೀತಕ್ಕೆ

ಹೀಗೇಕೆ ಗೆಳೆಯ, ಬದಿಗೊತ್ತಿ ಇಬ್ಬಂದಿತನ ಬಹು
ಭಾವಗಳನರಿತು ಬೇಕುಬೇಡಗಳ ಅನುಸರಿಸು ಬೇಟೆ ಬೇಡ
ಬೇಕು ಅಂತರಂಗದ ಶುದ್ಧಿ ಮನೋವಿಕಾಸಕೆ