ಗಾಂಧಿ ತಾತ

• ಮೋಹನಚಂದ ಪಾಟೀಲ, ಬಿಣಗಾ, ಉತ್ತರ ಕನ್ನಡ ಜಿಲ್ಲೆ
  [email protected]

ಗುಂಡು ತಲೆ ದುಂಡು ಕನ್ನಡಕ

ಬೊಚ್ಚು ಬಾಯಿಯ

ಕುಳಿತಿದ್ದ ಸುಮ್ಮನೆ ನೋಡುತ

ಸಾಬರಮತಿಯ ಆಶ್ರಮದಲಿ

ಮಾರಾಟ ಮಳಿಗೆಯ ಮೂಲೆಗಳಲಿ

ಲಕಲಕ ಹೊಳೆವ ಪ್ರತಿಮೆಗಳಲಿ

ನೂರರ ನೋಟು ಕೊಟ್ಟು ಕರೆದೆ
ಬಂದ ಬ್ಯಾಗಲಿ ಕೂತು ಮನೆಗೆ
ಕಪಾಟ ಖಾನೆ ಖಾಲಿ ಮಾಡಿ
ಕೂರಲು ತುಸು ಜಾಗ ಮಾಡಿದೆ
ಕೂತ ಎದುರಲಿ ಟೀವಿಯ ನೋಡುತ
ಸುದ್ದಿ ಸಮಾಚಾರಗಳ ಕೇಳುತ

ತನ್ನ ಆಶ್ರಮದಲಿ ಬೆಳೆದ
ಸೈತಾನಗಳ ಸಂತಾನದ
ಅನಾಚಾರ ಭ್ರಷ್ಟಾಚಾರ
ಕುತಂತ್ರಿಗಳ ಕಾರಬಾರ
ನೋಡಿ ನಲುಗದ ನಿರ್ಲಿಪ್ತ ತಾತ
ಮದ್ಯ ಮಾಂಸ ಮಿತ್ಯ ತ್ಯಜಿಸಿದಾತ

ಕ್ರಾಂತಿ ಶಾಂತಿಗಳ ಕಾದಾಟ
ದೀನ ದಲಿತರ ಹೋರಾಟ
ಧರ್ಮ ನೀತಿಗಳ ಮಾರಾಟ
ಅವನೆದುರು ನಡೆದಿದೆ ನಿತ್ಯ
ನಮ್ಮ ನಡೆ ನುಡಿ ಎಲ್ಲ ಮಿತ್ಯ
ಅವನಿರುವಿಕೆ ಭ್ರಮೆಯೊಂದೆ ಸತ್ಯ

ನನ್ನ ಮನಸಿನ ಮೂಲೆಯಲಿ
ಖಾನೆಯಲಿರುವ ಪ್ರತಿಮೆಯಲಿ
ಸತ್ಯ ಅಹಿಂಸೆಗಳ ಧೂತ
ಸಂತೆಯೊಳಗಿನ ಸಂತನಂತೆ
ಕುಳಿತಿದ್ದ ತನ್ನೊಳಗೆ ಧ್ಯಾನಿಸುತ
ನಮ್ಮ ಗುಂಡು ತಲೆಯ

ಮುಖಪುಟ / ಸಾಹಿತ್ಯ-ಸಂಸ್ಕೃತಿ