ಕಳೆದು ಹೋಗಿದ್ದಾಳೆ ರಾಧೆ ; ಹುಡುಕಿ ತರುವೆಯಾ ಶಾಮ?

;?ಸಂತೆಯ ನಡುವೆ ದಿವ್ಯಪ್ರೇಮದ ಆಲಾಪದಂತಿರುವ ಓ ಗೆಳತಿ, ಒಲುಮೆಯ ಹೂವೆ ನೀಹೋದೆ ಎಲ್ಲಿಗೆ? ಬರಹವನ್ನು ನೀವು ಮೆಲುಕುಹಾಕಿರಬಹುದು. ಅಲ್ಲಿನ ಅಕ್ಷರ ಅನುಸಂಧಾನ ಅನೇಕರಿಗೆ ಇಷ್ಟವಾಗಿದೆ , ಕಷ್ಟವಾಗಿದೆ. ತಮಗನಿಸಿದ್ದನ್ನು ಪ್ರತಿಕ್ರಿಯೆ ರೂಪದಲ್ಲಿ ಅಪಾರ ಓದುಗರು ನಮ್ಮೊಂದಿಗೆ ಹಂಚಿಕೊಂಡಿದ್ದಾರೆ. ಅವುಗಳಲ್ಲಿ ಆಯ್ದ ಕವನ ಕುಸುಮವೊಂದು ಇಲ್ಲಿದೆ. ಆಧುನಿಕ ರಾಧೆಯ ಇಕ್ಕಟ್ಟು ಮತ್ತು ಬಿಕ್ಕಟ್ಟುಗಳಿಗೆ ಈ ಕವಯತ್ರಿ ಹಿಡಿದ ಕನ್ನಡಿಯಲ್ಲಿ, ಯಾರ್ಯಾರ ಪ್ರತಿಬಿಂಬಗಳು ಮೂಡಿವೆಯೋ?

• ಅಂಜಲಿ ರಾಮಣ್ಣ, ಬೆಂಗಳೂರು
  [email protected]

ಅಲಾರಂ ಸದ್ದಲ್ಲಿ ಬೆಳಗು ಕಾಣುತ್ತಾ...

ಬಿಸಿನೀರಿಗೆ ಒಲೆ ಒಟ್ಟುತ್ತಾ...

ಕಾಫಿ‚ಯನ್ನು ಫಿ‚ಲ್ಟ್‌ರ್‌ನಲ್ಲಿ ಹನಿಸುತ್ತ...

ಅಕ್ಕಿ ಬೇಯಿಸಿ ಅನ್ನ ಬಸಿದು ಸಾಸಿವೆ ಸಿಡಿಸುತ್ತಾ...

ಮಕ್ಕಳ ಹೆಗಲಿಗೆ ಪಾಠಿ ಚೀಲ ಹಾಕುತ್ತಾ...

ಗಂಡನ ಬಗಲಿಗೆ ಬುತ್ತಿ ಗಂಟನ್ನು ಸಿಕ್ಕಿಸುತ್ತಾ...

ಬಸ್ಸಿನ ಬಾಗಿಲು-ಬೆವರು ತೊಗಲಿನೊಡನೆ ಗುದ್ದಾಡುತ್ತಾ...

ಕಂಪ್ಯೂಟರ್‌ ಫ‚ಾ್ಯಕ್ಸ್‌ಗಳಿಗೆ ‘ಎಸ್‌ ಬಾಸ್‌’ ಎನ್ನುತ್ತಾ...

ಕೀಲು ಬೊಂಬೆಯಂತೆ ತರಕಾರಿ ಕತ್ತರಿಸುತ್ತಾ...

ಇರುಳಿಗೆ ತುತ್ತು ಊಡಿಸುತ್ತಾ...

ಹಾಸಿಗೆಯ ಹೊಟ್ಟೆ ತುಂಬಿಸುತ್ತಾ...

ಗೊಂದಲದಲಿ...ಒತ್ತಡದಲ್ಲಿ...

ಕಳೆದು ಹೋಗಿದ್ದಾಳೆ ರಾಧೆ

ಹುಡುಕಿಕೊಡುವೆಯಾ ಶಾಮ?...

*

ನಿನ್ನ ನಡಿಗೆಗೆ ಹೆಜ್ಜೆಯಾಗುತ್ತಾ...
ನಿನ್ನ ಭುಜಕ್ಕೆ ಬಳ್ಳಿಯಾಗುತ್ತಾ...
ನಿನ್ನ ಅಧರಕ್ಕೆ ಮಧುವಾಗುತ್ತಾ...
ನಿನ್ನ ಉಸಿರಿನ ಬಿಸಿಗೆ ಶಾಖವಾಗುತ್ತಾ...
ನಿನ್ನ ಕಿವಿಯಲ್ಲಿ ಅಂತರಂಗದ ತರಂಗವನ್ನೆಬ್ಬಿಸುತ್ತಾ...
ನಿನ್ನ ಬೆರಳುಗಳಿಗೆ ಸ್ಪರ್ಶವಾಗುತ್ತಾ...
ನಿನ್ನ ಕೊಡುವಿಕೆಗೆ ಕಣ್ಣಂಚಿನ ಹನಿಯ ಹುಸಿ ನಗುವಾಗುತ್ತಾ. .
ನಿನ್ನಲ್ಲಿ ತನ್ನನ್ನೆ ಅರಸುತ್ತಾ...
ನಿನ್ನ ಆಕಾಶಕ್ಕೆ ಅವಕಾಶವಾಗುತ್ತಾ...
ನಿನ್ನಯ ಮುರಳಿಯ ನಾದವಾಗುತ್ತಾ...
ಹಂಬಲದಲ್ಲಿ...ಕನವರಿಕೆಯಲ್ಲಿ...
ಕಳೆದು ಹೋಗಿದ್ದಾಳೆ ರಾಧೆ
ಹುಡುಕಿತರುವೆಯಾ ಶಾಮ?...

ಮುಖಪುಟ / ಸಾಹಿತ್ಯ-ಸಂಸ್ಕೃತಿ