ಒಪ್ಪಿಗೆಯಾದರೆ...

• ಪ್ರೇಮಶೇಖರ, ಪಾಂಡಿಚೇರಿ
  [email protected]

ನೀ ನಡೆವ ಹಾದಿಯಲ್ಲೆಲ್ಲ

ಹೂ ಹಾಸುವುದು...

ನನ್ನಿಂದಾಗದು

ಬೇಕಾದರೆ

ಹೆಜ್ಜೆಗೊಂದು ಜೋಕು ಹೇಳುತ್ತೇನೆ

ಗಂಟೆಗಟ್ಟಲೇ ಪಕ್ಕ ಕೂತು
‘ಸ್ವೀಟ್‌ ನಥಿಂಗ್‌’ ಮಾತಾಡಲಾರೆ
ಬೇಕಾದರೆ
ನಿನ್ನ ಕೂದಲಲ್ಲಿ ಬೆರಳಾಡಿಸುತ್ತೇನೆ

ನಿನ್ನ ಹುಟ್ಟುಹಬ್ಬಕ್ಕೆ
ಮುತ್ತಿನ ಹಾರ ವಜ್ರದ ಓಲೆ
ಉಡುಗೊರೆ ತರಲಾರೆ...
ಬಡಕವಿ ನಾನು
ಬೇಕಾದರೆ
ನಿನ್ನ ಮೇಲೆಂದೂ
ಕೋಪ ತೋರಲಾರೆನೆಂದು
ಮಾತು ಕೊಡುತ್ತೇನೆ
ಅದರಂತೆ ನಡೆಯುತ್ತೇನೆ

ನಿನ್ನ ಹೆಸರಲ್ಲೊಂದು ಸೈಟು ಮಾಡಿ
ಮಹಡಿಮನೆ ಕಟ್ಟಿಸಿ
ನಿನ್ನ ಹೆಸರಿಡಲು...
ಬಹುಷಃ ಸಾಧ್ಯವಾಗಲಾರದೇನೋ
ಬೇಕಾದರೆ
ನಿನ್ನ ಹೆಸರನ್ನು
ನನ್ನ ಕಾವ್ಯನಾಮವನ್ನಾಗಿಸಿಕೊಳ್ಳುತ್ತೇನೆ
ಬಾ

ಮುಖಪುಟ / ಸಾಹಿತ್ಯ-ಸಂಸ್ಕೃತಿ