ಅಳಲು

• ಸ್ವರ್ಣ ಜ್ಯೋತಿ, ಪಾಂಡಿಚೆರಿ
  [email protected]

ಒಂದು ಬೆರಳಿನಿಂದ

ಹಸೀ ಮರಳಿನ ಮೇಲೆ ಬರೆದ

ನಿನ್ನ ಹೆಸರು

ಅಲೆಗಳ ಜತೆ

ತೇಲಿ ಹೋಗಿರಬೇಕು

ಒಂದು ಬೆರಳಿನಿಂದ
ಮಣ್ಣಗೋಡೆಯ ಮೇಲೆ ಬರೆದ
ನಿನ್ನ ಹೆಸರು
ತುಂತುರು ಹನಿಯೊಂದಿಗೆ
ಕರಗಿಹೋಗಿರಬೇಕು

ಆರಾಧನಾ ಕರಗಳಿಂದ
ಮನದ ಪುಟದ ಮೇಲೆ ಬರೆದ
ನಿನ್ನ ಹೆಸರು
ಬಂಡೆಯ ಮೇಲೆ
ಕೊರೆದ ಗೀರು

ಯಾರಿಗೂ ಕಾಣಲಿಲ್ಲ
ನೀನೂ ಅರಿಯಲಿಲ್ಲ
ಕೊನೆಗೂ ತಡೆಯಲಾರದೆ
ನಿನ್ನ ಕಣ್ಣ ಪಾಪೆಯಲ್ಲೊಂದು ಕಿಂಡಿ
ಕೊರೆದು ಒಳಹೊಕ್ಕು ನಿಂತಾಗ

ಎದುರಾದದ್ದು
ಬಟಾ ಬಯಲು ... ವಿಸ್ತಾರ ಸಹಾರಾ ...
ಇನ್ನೂ ಅಲೆಯುತ್ತಿದ್ದೇನೆ
ನಿನ್ನಾಸರೆಯ ತನಿನೆರಳು
ನಿನ್ನ ಹೆಸರಿನ ಸಿಹಿಖರ್ಜೂರದ
ಗುರಿಯನರಸಿ

ಮುಖಪುಟ / ಸಾಹಿತ್ಯ-ಸಂಸ್ಕೃತಿ