ಅನಾಥ ಆಸೆ

• ಪ್ರೇಮಶೇಖರ, ಪಾಂಡಿಚೆರಿ
  [email protected]

ನಿನ್ನೆಮೊನ್ನೆಯವರೆಗೆ

ನಿನ್ನಿರವಿನರಿವಿರಲೇ ಇಲ್ಲ ನನಗೆ

ನೀ ಮಲೆನಾಡ ಹುಡುಗಿ

ಹಸಿರುಸಿರಿನ ಬೆಡಗಿ

ನಾನೋ... ಹಚ್ಚ ಹಸಿರು ಕಾನನ

ದಂಚಿನಲ್ಲಿ ನಿಂತ ಒಂಟಿ

ಪರದೇಶೀ ಬೋಳುಮರ

ಅಂದು ಸಹ್ಯಾದ್ರಿಯ ಸೆರಗಿನಿಂದ
ನೀ ಹನಿ
ಹನಿಯಾಗಿ ತೇಲಿ
ಬಂದು ನಿಂತಾಗ ನನಗೆ ಕನಸು
ಹರಿಯುವ ಹೊತ್ತು
ಶತಶತಮಾನಗಳ ಕಾಯುವಿಕೆಗೆ
ತೆರೆ ಬಿತ್ತು ಅನಿಸಿತ್ತು

ಕನಸಿನಿಂದ ನನಸಿಗೋ
ಮತ್ತೊಂದು ಕನಸಿಗೋ ಜಾರಿ
ದಂಥ ಸುಷುಪ್ತಿಯಲ್ಲಿ ಮಿನುಗಿ
ದ ಅಗ್ನಿಯ ಸುತ್ತ ನನ್ನ
ಬೆನ್ನ ಹಿಂದೆ ಸಪ್ತ
ಪದಿ ತುಳಿದದ್ದು ನೀನೋ
ಅಥವಾ ಬರೀ ನನ್ನ ನೆರಳೋ?
ಅರಿವಾಗದೇ ಬೆರಗಾದೆ ಒಂದು ಕ್ಷಣ

ಮೈಮನಗಳ ಮಿಲನ
ದ ನನಸಿನಂಥಾ ಕನಸು
ಭೋರ್ಗರೆದುಕ್ಕಿದ ನೆರೆಗಂಗೆ
ಯಾಳಕ್ಕೆ ನನ್ನನ್ನು ಸೆಳೆದದ್ದು ನೀನೋ
ಅಥವಾ ಬರೀ ನಿನ್ನ ನೆನಪೋ?
ತಿಳಿಯದೇ ತೊಳಲಿದೆ ಒಂದುಕ್ಷಣ

ಬೆಳಗಾಗುವ ಹೊತ್ತಿಗೆ ಎಲ್ಲ ಮಳೆ
ಯ ಹಾಗೇ ನಿನ್ನ ಜೇನಹನಿ
ಮಳೆ ನಿಂತೇಹೋಗಿತ್ತು
ನೀ ನಾನಾಗಿ ನಾ ನೀನಾಗಿ ಮತ್ತೆ
ನೀ ನೀನೇ ನಾ ನಾನೇ ಆಗಿ
ಹೋದದ್ದು ಕಣ್ಣಂಚಿನಲ್ಲೇ ಕರಗಿ
ದ ಕನಸೆನಿಸುತ್ತಿತ್ತು

ಎದೆಯಲ್ಲಿ ಬಯಕೆ
ಯಾಂದು ಅನಾಥವಾಗಿ ಅತ್ತಿತ್ತು
ಈ ಬದುಕಿಗೆ ನೀನಲ್ಲದಿದ್ದರೂ
ನಿನ್ನಂಥವಳೊಬ್ಬಳು ಬೇಕಿತ್ತು

ಮುಖಪುಟ / ಸಾಹಿತ್ಯ-ಸಂಸ್ಕೃತಿ