ಜಾನಪದ ಗೀತೆ : ನಂಜುಂಡ

ತಾನಿತಾನಂದನೋ ತಂದೆನಾನಾ
ತಂದನಿತಾನಂದದನೋ ತಂದೆನಾನಾ।।

ತಿಂಗಾನೆ ತಿಂಗಳಿಗೆ ಚಂದಾ ನಂಜನಗೂಡು
ಗಂಧ ತುಂಬೀದೇ ಗುಡಿಗೆಲ್ಲ
ಗಂಧ ತುಂಬೀದೇ ಗುಡಿಗೆಲ್ಲ ನಂಜುಂಡ್ನ
ಕಳಸ ತುಂಬೀದೇ ಹಿಡಿ ಹೊನ್ನು ।। ತಾನಿತಾ।।

ಎಪ್ಪತ್ತು ಗಾವುದಕೆ ನೆಪ್ಪು ನಂಜನಗೂಡು
ಹಿಪ್ಪೇಯ ತೋಪು ಹೊಳೆಸಾಲು
ಹಿಪ್ಪೇಯ ತೋಪು ಹೊಳೆಸಾಲು ಒಳ್ಳೇದೆಂದು
ಅಪ್ಪ ನಂಜುಂಡ ನೆಲೆಗೊಂಡ ।। ತಾನಿತಾ।।

ನಂಜನಗೂಡಲ್ಲಿ ನಮಗ್ಯಾರು ನೆಂಟಾರು
ನಂಜಪ್ಪಸ್ವಾಮಿ ಹಿರಿಯಣ್ಣ
ನಂಜಪ್ಪಸ್ವಾಮಿ ಹಿರಿಯಣ್ಣ ಇದ್ದಾಗ
ಮುಂದ್ಹೋಗಿ ಹೊರಜಿ ಹಿಡಿದೆವು ।। ತಾನಿತಾ।।

ನಂಜನಗೂಡಲ್ಲಿ ನಾಲ್ಕೈದು ಬಾಗೀಲು
ನಂದೀ ಕೋಲೈದು ಪಟವೈದು
ನಂದೀ ಕೋಲೈದು ಪಟವೈದು ನಂಜಪ್ನ
ಮಂಗಳಾರತಿ ಹದಿನೈದು ।। ತಾನಿತಾ।।

ನಂಜನಗೂಡಲ್ಲಿ ಸಂಬಳದ ಸೂಳೇರು
ಕಂಬೀಯ ಸೀರೆ ಎಡಗಾಸೆ ಹಾಕ್ಕೊಂಡು
ನಂಜುಂಡಗಾರ್ತಿ ಬೆಳಗ್ಯಾರೋ ।। ತಾನಿತಾ।।

ನಿಂಬೇ ಹಣ್ಣಿನ ಉಜೆ ತುಂಬೆ ಹೂವಿನ ಗಮಲ
ಇಂದು ನಂಜುಂಡ್ನ ಗುಡಿಯಲ್ಲಿ
ಇಂದು ನಂಜುಡ್ನ ಗುಡಿಯ ಬಾಗಿಲ ಮುಂದೆ
ಜಂಗಮಾ ಗಮನ ನಿಲುಭಾರ ।। ತಾನಿತಾ।।

ಎಡವಲಯ್ಯನ ತೇರು ಬಲದಮ್ಮನ ತೇರು
ರಾಟೇಳಿ ತೇರು ಕೈತೇರು
ರಾಟೇಳಿ ತೇರು ಕೈತೇರು ಗೊಂಬೆ ತೇರು
ಹರಿದೋ ನಂಜಯ್ನ ಎಡಬಲಕೆ ।। ತಾನಿತಾ।।

ಏಳೀರಿ ನಂಜುಂಡ ಏಟ್ಹೊತ್ತು ಸುಖ ನಿದ್ರೇ
ಆನೆ ಬಂದಿದೇ ಅರಮನೆಗೆ
ಆನೆ ಬಂದಿದೇ ಅರಮನೆಗೆ ನಂಜುಂಡ
ಸೂಳೇ ಬಂದವಳೇ ಪಗಡೇಗೆ ।। ತಾನಿತಾ।।

ಮುಖಪುಟ / ಸಾಹಿತ್ಯ-ಸಂಸ್ಕೃತಿ