ತಾಯಿ ಹಕ್ಕಿಯ ಹಾಡು

• ಚಿಂತಾಮಣಿ ಕೊಡ್ಲೆಕೆರೆ

ಮರಿಹಕ್ಕಿಯೇ ಹಾರು ಆಗಸಕ್ಕೆ

ಬಡಿ ನಿನ್ನ ರೆಕ್ಕೆ

ತಾಯಿ-ಗುಟುಕನ್ನಿಟ್ಟು

ಇಷ್ಟು ದಿನ ಸಲುಹಿದೆ

ಹಾರಲೂ ಕಲಿಸಿದೆ

ನೀನೀಗ ಆಗಸಕ್ಕೆ ಹಾರಿ ಹೋಗು
ಆಗಸದಲ್ಲಿ ಚಂದ್ರಾಮನಿದ್ದಾನೆ
ಮಳೆರಾಯನಿದ್ದಾನೆ
ಚುಕ್ಕಿಗಳಿವೆ
ಅಲ್ಲೂ - ಹಕ್ಕಿಗಳಿವೆ

ಮರಿ ಹಕ್ಕಿಯೇ ಹಾರು ಆಗಸಕ್ಕೆ
ನಾ ಕಾಣದೆಲ್ಲೆಗಳ ಕಾಣು ಹೋಗು
ನಾ ಮೀರದೆಲ್ಲೆಗಳ ಮೀರು ಹೋಗು

ನಿನ್ನ ರೆಕ್ಕೆ ದಣಿಯುವವರೆಗೂ
(ದಣಿಯದಿರಲಿ ಮಗೂ)
ಹಾರುತ್ತಿರು
ನಿನ್ನ ಗಂಟಲೊಣಗುವವರೆಗೂ
(ಒಣಗದಿರಲಿ ಮಗೂ)
ಹಾಡುತ್ತಿರು

ಮುಖಪುಟ / ಸಾಹಿತ್ಯ-ಸಂಸ್ಕೃತಿ