ಸುನಾಮಿ

• ಪಿ.ಜಿ. ರಘುನಾಥ್‌, ಬೆಂಗಳೂರು.
  [email protected]

ನಾನು ನಾನೇ ಎಂದು ಅಟ್ಟಹಾಸದಿ

ಮೆರೆಯುತ್ತಿದ್ದ ಮನುಜನ ಕಣ್ಣ ತೆರೆಸಲು

ಬಂದಾನೊಬ್ಬ ದಾನವ ಮುಂಜಾವಿನ

ತಂಪು ವೇಳೆಯಲಿ ಕಡಲ ತೀರದಿ ಭುಗಿಲೆದ್ದು

ಅಡ್ಡ ಬಂದವರನ್ನೆಲ್ಲಾ ತನ್ನೊಡಲಲಿ ಸೆಳೆಯುತ !

ಏನು ಹೇಳಲಿ ಅವನ ಅಟ್ಟಹಾಸ, ಅಬ್ಬರ
ಅಬ್ಬಬ್ಬಾ, ಅವನಿಗಾರು ಸರಿಸಾಟಿ ಆ ದಿನ,
ಮಿಂಚು ಗುಡುಗಿಗೂ ಸೆಡ್ಡುಹೊಡೆದು ನಿಲ್ಲುವಂತ
ಧೈರ್ಯ, ನಾವ್ಯಾರೂ ಕಂಡರಿಯದ ಆ ಮರ್ಮಾ
ಅವನಲ್ಲಿರಲಿಲ್ಲ ನಮ್ಮಲ್ಲಿನ ಭೇದಭಾವ !

ಕಣ್ಣು ಮುಚ್ಚಿ ತೆರೆಯುವುದರಲಿ ತಿಂದು
ತೇಗಿದ ಸಾವಿರಾರು ಕಂದಮ್ಮಗಳ, ತಾನೇ ಹೆತ್ತ
ಮಕ್ಕಳ ತಾನೇ ನುಂಗಿದಂತಿತ್ತು ಅವನ ಭಾವ,
ಇರಲಿಲ್ಲ ಅವನಲ್ಲಿ ಪಶ್ಚಾತಾಪದ ಭಾವ
ಮನುಜನಲ್ಲಿಲ್ಲದ್ದು ನನಗೇಕೆ ಎಂದು !

ಸಾವಿರಾರು ಜೀವಗಳು ಲೀನವಾದವು ಮಣ್ಣಾಗಿ
ಮುಂದೆಂದೂ ಬರದಿರಲಿ ಆ ದುರ್ಗಮ ದುರಂತ
ಏನ ಮಾಡಬಲ್ಲೆವು ನಾವು ಆ ದೇವನಣತಿಯ ಮುಂದೆ
ಸಾಗೋಣ ಮುಂದೆ ನಮ್ಮ ಆರ್ಭಟಗಳ ಮೆಟ್ಟಿಮೀರಿ
ಅದುವೇ ನಮಗಿಹುದೊಂದು ದಾರಿ ಈ ಹೊಸವರುಷದಲಿ!

ಮುಖಪುಟ / ಸಾಹಿತ್ಯ-ಸಂಸ್ಕೃತಿ