ಏನಿದ್ದರೇನು ಶಿವಾ !!

• ರೇಣುಕಾ ಶ್ಯಾಮ್‌, ನವದೆಹಲಿ
  [email protected]

ಪಾಲಿಗೆ ಇದ್ದದ್ದು ಮನ ಒಪ್ಪದೇ

ಇಲ್ಲದ್ದಕ್ಕೆ ತುಡಿಯುವದು ಜೀವ

ಧರೆಗೆ ಆಕಾಶದ ಚಪ್ಪರ ಹಾಕಿಸಿ

ಕೈಗೆಟುಕದಂತೆ ಚಿಕ್ಕೆಗಳ ಮೇಲಿಟ್ಟುಬಿಟ್ಟೆ.

ಎಂಥ ಮಾಯೆ ಹಿಡಿಸಿಬಿಟ್ಟೆ ನೀ ಶಿವಾ !!

ಬಾರದವರು ಎತ್ತ ಹೋದರೋ
ನೋಂಪಿ ಹಿಡಿದು ಜಪ್ಪಿಸಿದೆ ಮನ
ನೋಟಹಾದಿಯಾಗಿ ವರುಷಗಳೇ ಕಾದವು
ಬರದವರು ಬಂದಾರೆಂಬ ಹುಚ್ಚು ನೆಚ್ಚಿಗೆ
ಎಂಥ ಮರಳುರೋಗ ಹಿಡಿಸಿಬಿಟ್ಟೆ ಶಿವಾ !!

ಆಕಳಿಕೆ ಬಿಕ್ಕಳಿಕೆ ಒಂಟಿ ಸೀನಿಗೂ
ಮರೆತವರು ನೆನೆದಾರೆಂಬ ಹುಸಿಭ್ರಾಂತಿ
ಅಡ್ಡಗೋಡೆಯ ಮೇಲಿಟ್ಟ ದೀಪದಂತೆ
ಕರುಳುಹೊತ್ತಿ ಉರಿಯುವದು ಜೀವ
ಎಂಥ ಲಾಲಸೆಯ ಹೊತ್ತಿಸಿಬಿಟ್ಟೆ ಶಿವಾ !!

ಏನು ಓದಿಕೊಂಡರೇನು ಬಂತು ?
ಏನು ಬರೆದುಕೊಂಡರೆಷ್ಟು ಬಿಟ್ಟರೆಷ್ಟು
ನೀನೇ ಇಲ್ಲದಿದ್ದಮೇಲೆ ಏನಿದ್ದರೇನು ?
ಹಿತ್ತಲು ತುಂಬ ಬೆಳದಿಂಗಳು ಚೆಲ್ಲಿದರೇನು?
ಎಂಥಾ ತಂಪೊಡಲಲಿ ಕಿಚ್ಚು ಬಚ್ಚಿಟ್ಟೆ ಶಿವಾ ..!

ಬುದ್ಧನಂತಾ ಮನಸ್ಥಿತಿ ಕೊಡು ದೇವ
ಕಿಸಾಗೌತಮಿಯ ಒಳಜ್ಞಾನದ ಅರಿವು ಕೊಡು
ಮೋಹ-ವ್ಯಾಮೋಹಗಳನೂ ಕಿತ್ತೆಸೆದು ಬಿಡು.
ಲೋಕದಾಚೆಗಿನ ಅಲೌಕಿಕದ ಬೆಳಕ ನೀ ತೋರು,
ಇನ್ನೇನ ಬೇಡಲಿ ನಾ ಹುಲುಮಾನವನಯ್ಯಾ ಶಿವಾ...!!!

ಮುಖಪುಟ / ಸಾಹಿತ್ಯ-ಸಂಸ್ಕೃತಿ