ಸಾಂತ್ವನ

• ರಘುನಾಥ್‌.ಪಿ.ಜಿ., ಬೆಂಗಳೂರು
  [email protected]

ಓ ಗೆಳತೀ ನಿನಗೊಮ್ಮೆ ಅಳುವಂತಾದರೆ

ಮರೆಯದೇ ಕರೆ ಎನ್ನ.

ತಪ್ಪದೇ ನಾ ಬಂದು

ನಿನ್ನ ಅಳು ನಿಲ್ಲಿಸಿ ನಕ್ಕೇ

ನಗಿಸುವೆ ಎಂಬಾಸೆ ಬೇಡ,

ಆದರೆ ಖಂಡಿತ ನಾನೂ ಕಣ್ಣೀರಿಡುವೇ

ನಿನ್ನ ಜೊತೆಗೂಡಿ !

ಓ ಗೆಳತೀ
ನಿನಗೊಮ್ಮೆ ಎಲ್ಲಾದರೂ ಓಡಿ
ಹೋಗಬೇಕೆಂದಾದರೆ
ಯೋಚಿಸದೇ ಕರೆ ಎನ್ನ
ತಪ್ಪದೇ ನಾ ಬರುವೆ,
ತಡೆಯಲಾರೆ ನಿನ್ನ
ಓಡಬೇಡ ಎಂದು,
ಆದರೆ ಓಡುವೆ ಖಂಡಿತ
ನಾನೂ ನಿನ್ನ ಜೊತೆಗೂಡಿ!!

ಓ ಗೆಳತೀ
ನಿನಗೊಮ್ಮೆ ಯಾರಾದರೂ
ನಿನ್ನ ಮಾತ ಕೇಳಬೇಕೆನಿಸಿದರೆ
ಚಿಂತಿಸದೇ ನೆನೆ ಎನ್ನ .
ನಾ ಬಂದು ಎನ್ನ
ಮಾತ ನಿನಗೆ ಕೇಳಿಸದಿದ್ದರೂ
ತಪ್ಪದೇ ಕೂರುವೆ ನಿನ್ನೆದುರು
ಏನೂ ಮಾತಾಡದೇ !!!

ಓ ಗೆಳತೀ
ನಿನಗೊಮ್ಮೆ ಏನಾದರೂ
ನನ್ನೊಲವಾಸರೆ ಬೇಕೆನಿಸಿದರೆ
ಅಳುಕದೇ ಕರೆಯೆನ್ನ.
ನಾ ಬರುವೆ ತಪ್ಪದೇ
ನೀಡದಿದ್ದರೂ ಎನ್ನ ಒಲವ ಸೆರೆ,
ಖಂಡಿತ ನೀಡುವೆ ಎನ್ನ ಹೆಗಲಾಸರೆ!!

ಮುಖಪುಟ / ಸಾಹಿತ್ಯ-ಸಂಸ್ಕೃತಿ