ಅರ್ಧಚಂದ್ರ

• ಜಯಂತ ಕಾಯ್ಕಿಣಿ
  [email protected]

ಪೋರರು ಟೈರು ಓಡಿಸಿದಂತೆ ಹುಲಿಯ

ಅಟ್ಟಿಸಿಕೊಂಡು ಹೋಗಿದ್ದ ಹುಡುಗಿ

ನಿನ್ನೆ ಮರಳಿ ಬಂದಳು

ಊರಲ್ಲಿ ಯಾರಿಗೂ ಧೈರ್ಯವಿಲ್ಲ ಅವಳ

ಕಂಡು ಮಾತಾಡಿಸಿ ಬರಲು

ಬೇಕೆಂದೇ ಬಾವಿಗೆ ಬಂದಿದ್ದಾಳೆ ಈಗ
ತನ್ನ ಗಂಡುಮೈಯಲ್ಲಿ ವೈಯಾರದಿಂದಲೇ
ಸೇದಿದ್ದಾಳೆ ಅರ್ಧ ತುಂಬಿದ ಕೊಡ

ಅಲ್ಲಿಂದಲೇ ಕೂಗಿ ಪೋರರ ಕರೆದು
ಬೆನ್ನು ಉಜ್ಜಿಸಿಕೊಂಡಳು
ಸುರಿದುಕೊಂಡು ಅರ್ಧಕೊಡ

ಅರೆಬರೆ ತೊಯ್ಯುತ್ತ ಹೊಳೆಯುತ್ತ
ಹಣೆಯ ಹಚ್ಚೆಯ ಕಪ್ಪು, ಅರ್ಧ ಚಂದ್ರ

ಸಾರ್‌ ಸ್ವಲ್ಪ ಈ ಕಡೆ ಜರುಗಿ ಇನ್ನೇನು
ಆ ಕಡೆ ಅಡ್ಡಾಡುತಾವೆ ಹುಲಿಗಳು
ಎಸ್ಟಿಡಿ ಬೂತು ಝೆರಾಕ್ಸು ಗೋಬಿ ಮಂಚೂರಿ

ಎಲ್ಲ ನೋಡಿಕೊಂಡಿರಾಣ ಈ ಕಡೆ
ಆಕೆ ನಡೆಸಲಿ ಹುಲಿಗಳೊಂದಿಗೆ ತನ್ನ ಸಂಸಾರ ಆ ಕಡೆ

ಕರೆದಂತಾದರೂ ಹೋಗಬೇಡಿ ಆ ಕಡೆ
ವಿತ್‌ ಇದೀರಿ. ನೋಡ್ಕಳಿ ಫ್ಯಾಮಿಲಿ
ಮಗನ ಹೊಸಾ ಪುಸ್ತಕಕ್ಕೆ ಬೈಂಡು
ಮಗಳ ಯೂನಿಫಾರ್ಮಿನ ಚೌಕ ನಿರಿಗೆಗೆ ಇಸ್ತ್ರಿ

ನೋ ನೋಡಬೇಡಿ ಆ ಕಡೆ
ಎಲ್ಲಾ ಸುಳ್ಳು ಅದೇ ಖರೆ ಅನಿಸಿದರೂ ಸಹ
ನೋಡಿದರೇ ಮಾಯವಾಗುವುದು ವಾಸ್ತವ

ಸ್ವಪ್ನದಲ್ಲಿ ಅಳುತ್ತಿದ್ದವರು
ಬೆಚ್ಚಿಕೂತಿದ್ದೀರಿ ಎದ್ದು
ಕಣ್ಣಂಚಿನಲ್ಲಿ ಕಂಬನಿಯಿದೆ ನೋಡಿ
ಹೇಳಿ ಸಾರ್‌ ಈ ಪುಟ್ಟ ಕೋರಾ ಕಂಬನಿ
ಯಾವ ಲೋಕದ್ದು

ಮುಖಪುಟ / ಸಾಹಿತ್ಯ-ಸಂಸ್ಕೃತಿ