ಕವನವೆರಡು - ಕೊಳೆಗೇರಿ ಮತ್ತು ಕನ್ನಡಿ

• ಲೀನಾ ಪಿ., ಬೆಂಗಳೂರು
  [email protected]

ಕೊಳೆಗೇರಿ ಇಲ್ಲಿ ನಡೆದಿಹುದು
ಜೀವನದ ಕಲ್ಲಾಟ
ಬರೀ ಗುಡಿಸಲುಗಳೇ ತುಂಬಿವೆಯಿಲ್ಲಿ
ನೊಣ ಸೊಳ್ಳೆಗಳದೇ ಆಡಳಿತ

ರೋಗ ರುಜಿನಗಳ ತವರುಮನೆ
ಜನರಿಗೆ ಬಿಡುವಿಲ್ಲ ಒಂದು ನಿಮಿಷ
ಗುಡಿಸಲು ಗಲ್ಲಿಗಳಲ್ಲಿ
ಜನರ ಗಜಿಬಿಜಿಯ ಓಡಾಟ

ಹಗಲು ದುಡಿದು ದಣಿವಾಗಿ
ರಾತ್ರಿ ಏರಿಸುವರು ಅಮೃತ
ಅದರದೇ ಅಮಲಿನಲಿ ನಡೆಸುವರು
ರಾತ್ರಿಯಿಡೀ ರಾಮಾಯಣ ಮಹಾಭಾರತ

ಮತ್ತದೇ ಬೆಳಕು ಹರಿದಾಗ ಇರುವರು
ಇವರು ಕೃಷ್ಣ ಕುಚೇಲರಂತೆ
ಈ ಜನರು ಮುಟ್ಟಿದರೆ ಮೈಲಿಗೆ
ಕೆಲಸ ಮಾಡಿಕೊಟ್ಟರೆ ಕೂಲಿ
ಹೇಗಿದೆ ನೋಡಿ ಇವರ ಜೀವನ ಶೈಲಿ

*

ಕನ್ನಡಿ

ಎಂತಹ ವಯಸಿದು ನೋಡಿ
ನಿಲ್ಲದು ಮನಸು ಒಂದು ಕಡೆ
ಕನ್ನಡಿ ಮಾಡಿಹ ಮೋಡಿ
ನಿಲ್ಲುವುದದರ ಎದುರುಗಡೆ!

ಮನಸು ಇರಬಯಸುವುದು ಅಲ್ಲೆ
ಅದೇ ಆ ಕನ್ನಡಿಯ ಮುಂದುಗಡೆ
ಅಮೂಲ್ಯ ಸಮಯ ಕಳೆದುದು ಹೇಗೆ?
ತಿಳಿಯದು ಈ ಮನಸಿಗೆ

ನೋಡುತ ನೋಡುತ ಚಲಿಸದು ಎಲ್ಲು
ತನ್ನನೆ ತಾನು ಮೋಹಿಸಿ ನಿಲ್ಲಲು
ಮನಸಿಗೂ ಹಾಕಿದೆ ಕಡಿವಾಣ
ಆ ಮಟ್ಟಿಗೆ ಕನ್ನಡಿ ಬಲುಜಾಣ

ನೋಡಿ ನೋಡಿ ಕನ್ನಡಿ
ಮಾಡಿಹ ಈ ಮಧುರ ಮೋಡಿ...

ಮುಖಪುಟ / ಸಾಹಿತ್ಯ-ಸಂಸ್ಕೃತಿ