ಮೂರು ಕವಿತೆಗಳು

• ಬಸವರಾಜೇಶ್ವರಿ ಪಾಟೀಲ, ಲಕ್ಕುಂಡಿ.
  [email protected]

ಅಂತರಂಗದ ಮೌನಗೀತೆ
ಭಾವನೆಗಳೆ ಪಲ್ಲವಿ-ಚರಣ
ಕಲ್ಪನೆಯೇ ತಾಳ
ಯಾವ ವಾದ್ಯವಿಲ್ಲದೆ
ನಾದಲಹರಿ ಹೊಮ್ಮುತ್ತಿದೆ ;
ಯಾವ ತಾಳವಿಲ್ಲದೆ
ರಾಗಲಹರಿ ಹರಿಯುತಿದೆ :
ನುಡಿಯುವ ವಾದ್ಯವಿಲ್ಲ
ನುಡಿಸುವಂತಹ ಕೈಗಳಿಲ್ಲ.
ಮಿಡಿಯುವ ಮನವಿರಲು
ಮೌನಗೀತೆಗೆ ಬರವಿಲ್ಲ
ರಾಗ ತಾಳ ಭಾವ ಭಂಗಿ ಆವುದರ ಅರಿವಿಲ್ಲ
ಇತಿ ಮಿತಿ ರೀತಿ ನೀತಿ ಯಾವುದರ ಪರಿವಿಲ್ಲ
ಹಾಡಲು ಬಾಯಿಯಿಲ್ಲ
ಕೇಳುವ ಮನಗಳಿಲ್ಲ
ಹೊಮ್ಮಿ ಬರುವ ಮೌನಗೀತೆಯ
ಅರಿತಿಹುದು ಮನವೆಲ್ಲ !

*

ಬಂದವರು ಬಾರದವರು

ಯಾರು ಬರುವರೆಂದು ಕೊಂಡೆ
ಅವರೆ ಬಾರದೇ ಹೋದರು
ಯಾರು ಬಾರರು ಎಂದುಕೊಂಡೆ
ಅವರೆ ಬಂದು ನಿಂತರು

ಬಂದವರು ನನಗಾರು ?
ಬಾರದವರು ಯಾರು ?
ಬಾರದವರ ಕಾತುರದ
ದಾರಿಯಲಿ ಬೇರಾರು ?
ಬಾರದವರ ನೆನಪಿನ
ಪಯಣದಿ ಜೋತೆಯಾರು ?
ಬಾರದವರು ಮರೀಚಿಕೆಯೋ ?
ಬಂದವರು ಬಾರದವರಿಗೆ
ಸರಿಯಾ ? ಸರಿಸಮವೋ ?

ಬಯಸದವರ ಕಳಿಸಿ
ಬಯಸಿದವರ ತಡೆದು
ನಿಲಿಸಿದವರಾರು ?
ಯಾರು ಅವರಾರು ?

*

ವಿಸ್ಮಯ

ಜಗವು ಎಷ್ಟು ದೊಡ್ಡದು
ಕಾಣೋ ನಯನ ಕಿರಿಯದು ;
ಮನಸು ಕೂಡ ಚಿಕ್ಕದು
ಅದರ ಭಾವ ಹಿರಿಯದು !

ಜಗವ ನೋಡೋ ನಮ್ಮ ಕಣ್ಣು
ನಮ್ಮನೋಡಲರಿಯದು !
ಎಮ್ಮ ನೋಡಲೆಮ್ಮ ಕಣ್ಣು
ಕನ್ನಡಿಯ ಬಯಸುವದು !

ಮುಖಪುಟ / ಸಾಹಿತ್ಯ-ಸಂಸ್ಕೃತಿ