ಅಂಟು ಜಿಬಿಟಿನ ನಂಟು

• ರೇಣುಕಾ ಶ್ಯಾಮ್‌, ನವದೆಹಲಿ
  [email protected]

ನಿಮ್ಮೂರ ದಾರಿಯಲಿ ನಮ್ಮೂರು ಬಂದಾಗ

ಸುಳಿಗಲ್ಲ ಶ್ಯಾಮಲೆ ನೆನಪಾಗುವಳೆ

ಮಾವುಸೀಬೆಯ ತೋಟ ನೀ ದಾಟಿ ಹೋದಾಗ

ಕವಳೆಹಣ್ಣಿನ ಕಣ್ಣವಳು ನೆನಪಾದಳೇ!

ಬೆಲ್ಲ ಕೊಬರೀ ಗಿಟುಕು ಅಜ್ಜಿಯ ಅರಳಿಟ್ಟು
ಕದ್ದುತರುವಾ ಹುರಿಗಡಲೆ ತಂಬಿಟ್ಟು ,
ದಿನ್ನೆಮೇಲಿನ ಹಾದಿ ತುಳಿದು ನೀ ಸರಿದಾಗ
ಗುಬ್ಬಿ ಎಂಜಲದ ಸವಿ ನೆನಪಾಗುವದೆ?

ಮೆದ್ದ ಮಾವಿನ ಮಿಡಿ, ಖಾರಹುಣಿಸೆ ಚಿಗಳೀ,
ಹೊಲದಲ್ಲಿ ಕಬ್ಬಿನ ಗಾಣ, ನೊರೆಹಾಲು ಬಾಯ್ಗೆ,
ಬೊಗಸೆ ತುಂಬಿದ ಬಿಸಿಬೆಲ್ಲ ನೀ ಚಪ್ಪರಿಸಿದಾಗ
ನೆನಪಾಯಿತೇ ?

ಮರಳಿಬಾರದ ಬಾಲ್ಯ ನೆನಪಿನ ಪುಟದಲ್ಲೇ
ಮೆಲಕುಹಾಕದ ಮನುಜ ಈ ಜಗದಿ ಉಂಟೆ
ತಿಳಿನೀರ ಸೆಲೆಯಂತೆ ಬತ್ತದೆಂದಿಗೂ ಬಲ್ಲೆ ,
ಆಡಿ-ಅತ್ತು ಮಾಡಿದ ಹಠ ನೆನಪಾಯಿತೆ?

ಮುಖಪುಟ / ಸಾಹಿತ್ಯ-ಸಂಸ್ಕೃತಿ